1Korɛntea 8 - BII BILA

Silalan a ɲɛm nda solul piɔmnda sálàlan-ndon o kɔɔ

¹ Le visin nda co piɔmnda sálàlan solullo-on yɛ, muli ndɔɔ co hoo ni. I co toɲa maa «Naa kpow n sínà dɛnɛ» maa mɛɛ niaa co dimio yɛ. Kɛ nduyɛ, kuundianndo dɛnɛ sinaa yɔngu vana ni. Kaolaa yɛ, diom pilɔɔ o luei vannda tɛɛn ni.

² Te vanndo yiyan pɛ maa o sínà dɛnɛ, mɛɛ o sínà vɔ mɛɛ o bɛnda le sinaa yɛ le.

³ Kɛ te vana kaola pɛ Hala, Hala sínà vana kon.

⁴ Le ɲuna niaa ɲuna ya a visin nda solul piɔmnda sálàlan-ndon dioo o kɔɔ-o yɛ, n sínà maa piɔmndo co ɲɛ-ɲɛ o ceendo ho coo le, n sínà vɛlɛ maa Hala ndu pilɛ kpé co ni.

⁵ O va bɛɛ aa ɲɛm vannda co veeloo aa hala-on n co o halataala a o lɛŋnden coo nuaa, kani «halaa» a «maaliia» co taw,

⁶ kɛ, le naa naa, n sínà maa Mɛlɛka ndu pilɛ kpé co ni, Hala Fuɲaa, o cɔw ɲɔɔn kpow-vo. Nduyɛ le ndu naa n co yoomu ni. Maalii ndu pilɛ kpé co vɛlɛ ni, Yeesu Krista, o ɲɔɔn kpow n fula o ba-o, le ndu naa n co yoomu ni.

⁷ Kɛ o co nda kpow le a sínà toɲa kon te. A pum a hiw dɛlio a piɔmnda. Háá sunsun, a co vɔ visin nda co piɔmnda sálàlan solullo-on dioo, vana ca ko bɛɛ aa le piɔmnda nda co ni. A nɔ mayoomu o yiyannda ndalan nin te, lelan nda nɔɔlian o dɛnnda lan nin ni.

⁸ O co ɲɛdiaa le tosanin mì n sɔɔnguu Hala ikɛi le, hali mì n di bɛɛ ndu le, n fola ɲɛ-ɲɛ lelan te, n sɔla vɛlɛ ɲɛ-ɲɛ lelan te.

⁹ Kɛ nduyɛ, la caa taw, yɔŋii hɔ́ɔ́yɛi niɛi niaa co dɛnndan tosaa-e i luei vanaa nɔ mayoomu o laalanndo nin te-a o pɔwlan nin.

¹⁰ Kani te vana nɔ mayoomu o laalanndo nin too ce nɔm pɛ, nɔm vana sina-o, ma va vision sɔmndo o máándo nin, vɛ̀ɛ̀ o sɔla yoomuan mò de visin nda co sálàlan solio-on te?

¹¹ O kon vana mayoomu lepɛŋ kon, o Yeesu vi kon le ndu-o lo le sínà n sínà kon-ndo.

¹² Te la pɛɛku pɛ puapilɛa niaa lende, mì la tɛɛmbuu nda kɔltan, mɛɛ la cua hakio a Yeesu Krista pila.

¹³ Lelan, te ɲɛdiaa co tosa ni mì puapilɛ nuu luɛi o pɔwlan nin, mɛɛ i di lɛ ɲɛ kon te, yɔŋii puapilɛ ni kon del.