1Korɛntea 16 - BII BILA

Mala biinun le vanaa diandaa-o

¹ Le mala co biinɔnndo le vanaa diandaa-o yɛ, la tosa mɛɛ ya dimul vanaa laalannda Kalasi yɛ.

² O niaa tɛɛn, vana-vana kɛsi ɲɛ pum landɔ o ndu lo cɛinin mɛɛ o tiw ba yɛ le hunɔɔ a ndu o paale tasele co o lɔ́ɔ́ o lɔ́ɔ́ bɛngu len, haliko la cum telen ya kɔanin-ndo le ɲɛm mun cuungiaa le.

³ Tuma ya tiiyanin lon-ndo, la hɛli vanaa niaa laalan-nda, i yɔngu nda sɛbɛlan a cuungiaala lan, a kɔɛ a lan Yerusalɛm.

⁴ Te o va yɛ pɛ mì ya pila kɔɛ, n kɔɛ naa ndaa latulu.

Tuula Pol tuu lan

⁵ I cɛn pɛ Maseduan, i kɔɛ o niaa lo, kani lon ya keinin ni.

⁶ Bɔɔle i tosanin telen pum o niaa lo, mì hivi sialten ndon, haliko nɛɛ-nɛɛ ya va pɛ kɔlan kelaa, la mala ya.

⁷ I yeema mì kei niaa yilɔɔ o laan o hiownɔn nin te. I co yiyanndo le telenndo pum hivio naa niaa, te Mɛlɛka cɛl pɛ.

⁸ Kɛ i lonin Efɛs háá mì kafo koavaa tiiya,

⁹ kani dioo kumbilun ya kumbilɔnndo pila, kɛ yaamɔaa nia co sɛ́lɛ́.

¹⁰ Te Timote komal niaa pɛ, la caa ndu biyɔɔ, o va a isiòòn niaa tɛɛn te, kani o co vallo tosaa maa ya o baala Maalii-o nin.

¹¹ Vana-vana kialun ndu yii le. La mala ndu mò kɔɛ nɛɛ o co lan-nda a kɔlɲuloo, mò muungu ya o ibuŋ. I co ndu cumndo nda puapilɛa.

¹² Apolɔs puapilɛ naa yɛ, i co ndu yoomuan lueiyo taw le niaa kɔlan yilɔɔ nda puapilɛa, kɛ o yiyan ndɔ le lakɔ sunsun te, o sɔlan pɛ ba, o kɔanin.

Congɔnndan a yilɔɔla mɛɛlaalan

¹³ La pɔɛɛnun te, la sim yili o laalanndo nin, la luei yoomuan a kpaayaa.

¹⁴ La tosa dɛnndan kpow niaa tɛɛn o kaolaa nin.

¹⁵ Puapilɛa nia, la sínà maa yungu Stefanas-o yɔŋnun vanaa laalaŋa tasea Akaii ni, má va vanaa diandaa baalaa tosallo. Lelan i co niaa yoomuan luei,

¹⁶ haliko mi la tuei vanaa vaa lende a vana-vana nda co vallo tosaa nda ndaa diom.

¹⁷ I dɔwnun ɲaale le hunɔɔ Stefanas, Fɔrtinatis a Akaikus-o, kani a cuu ya ɲɛm va ya pɛŋnden-ndon, la ve nanu le.

¹⁸ Kani a ɲulul-la kɔllo má ɲulul kɔlta niaalan. La biilu vanaa vaa lende-a.

¹⁹ Kundala vanaa laalannda Asii a yil niaa. Akilas, Priska a vanaa laalaŋaa co bɔɔŋianndo biyɔɔ o nda lo cɛinin-nda bɛɛ a yil niaa.

²⁰ Puapilɛa co nanu-a kpow a yil niaa lapi. La yilan vellaa-velle a kɔɔmianndo.

²¹ Yilɔɔlan ndan, ya pila sɛva lan a ba ni.

²² Te vanndo kaola Maalii Yeesu Krista le, ndu siŋnun vana dangaa. Maranata - Maalii naa co hunɔɔ.

²³ Màá Maalii Yeesu tosal niaa kɛndɛi!

²⁴ Niaa kpow, i kaola niaa o Yeesu nin.