1Korɛntea 14 - BII BILA

Valtan le diom Hala-o tɛɛnguuo a sɔɛi o sɔɔn mangalan celen nin

¹ Lelan, la nuwviaa fɔlɔn kaolaa, mì la nuwviaa vɛlɛ valta Kɔl-Diandaa a yeemɛi, kɛ taama-taama vali tɛɛngaa diom Hala-o.

² Kani vana soo pɛ o sɔɔn mangalan celen nin, ndu co isɔɔ o n'vanndaciee lo le, kɛ o Hala lo, bau vana-vana tiwba mò bii ndu bila le, o kɔl nin o co dɛnnda kaamaalan dimio ni.

³ Kɛ vana-vana tɛɛngul pɛ vanndacieea diom Hala-o, ndu hivi nda laci o laalanndo nin, o luei nda yoomuan, o ɲɔɔlu nda.

⁴ Vana soo pɛ o sɔɔn mangalan celen nin, ndu pila malan. Kɛ vana tɛɛngu pɛ diom Hala-o, ndu hivi vanaa laalannda laci o laalan ndaa nin.

⁵ I yeema mì niaa kpow soo o sɔɔn mangalan celen nin, kɛ o ya hiow yeema-o co ni mì la tɛɛngu diom Hala-o. Kani vana co sɔɔn Halan vannda tɛɛngullo-o hiow vana co sɔɛi o sɔɔn mangalan celen nin-ndo, fɔ dɔ́ɔ́ mò tɛɛsial vannda sɔɔn o co dimio-on, o kon mì vanaa laalannda kpede a sɔla malaa.

⁶ Puapilɛa nia, te i kɔɛ pɛ o niaa lo, mì kɔ soo o sɔɔn mangalan celen nin, yɛɛ kon nɛŋul-lɛnin niaa? Kon nɛŋul niaa ɲɛ-ɲɛ le, mɛɛ mì tɛɛngul niaa sɔɛi cɔmnun-nde, te kon te dɛnɛ sinaa, te kon te mì tɛɛngul niaa diom Hala-o, te kon te vɛlɛ mì pɛɛku niaa?

⁷ O va bɛɛ mì ɲɛm-caan yɛ́-yɛ́ɔn va sɔɛi, maa mɛɛ sɛ̀ŋnden a bangaa co nuaa yɛ, te n soli diomndan yɛ́-yɛ́ mɛɛ o bɛnda yɛ le, vɛ̀ɛ̀ vana sínà yɛ diom lesɛ̀ŋndo a diom bangaa?

⁸ Te bulu cɔwvo suu válán te, nɛ̀ɛ́ toosian yɛnin le cɔwvo?

⁹ Lende koni vɛlɛ o co le niaa ni, te la dimi pɛ sɔɔn mangalan vannda sínà loon, vɛ̀ɛ̀ ɲɛ niaa co dimio-o sinan yɛnin? Hoeyii fondoei kínɛí niaa solinin o kon ni.

¹⁰ Sɔɔn yɛ́-yɛ́-on n co o ceendo coo taw, kɛ sɔɛi co le, i kɛɛ kɔlɔɔ nɔ-e.

¹¹ Lelan, te i bii diomnde vanndo co dimio len bila le, i siŋnun miallo vana kon o hɔl, ndu bɛɛ siŋnun miallo le ya.

¹² Lende vɛlɛ koni, le mɛɛ niaa nɔ yeemɛi taw le valta Hala lan sɔlaa yɛ, la kindin niko mò va valta hivi vanaa laalannda laci lan.

¹³ Lelan, vana va pɛ sɔɛi o sɔɛi mangalɛi celen nin, ndu piɛi Hala mò hivul vannda sɔɔn mun.

¹⁴ Kani i va pɛ Hala piɛiyo o sɔɔn celen nin, kɔl nuu piɛi ni, kɛ kɔlkalu nuu tosa ɲɛ-ɲɛ le.

¹⁵ O kon, yɛɛ nɛ ya tosa yɛ? I vanin Hala piɛiyo o kɔl nin, mì va vɛlɛ piɛilen a kɔlkalu nuu. I vanin condei o kɔl nin, mì va vɛlɛ condei a kɔlkalu nuu.

¹⁶ Dɔw bɛɛ duaa o diola Kɔl-Diandaa, vɛ̀ɛ̀ vana co icali vannda tɛɛn-ndo muli yɛnin aa: «Amiina» te o bii ɲɛ n dimi-o bila le?

¹⁷ Caa bɛɛ piɛile malaa balika len, le soli vana celen mako le.

¹⁸ I mel Hala balika le tùú ya co sɔɛi o sɔɔn mangalan celen nin hivɔɔ niaa kpow-vo.

¹⁹ Kɛ vanaa laalannda tɛɛn yɛ, o co fisa mì dimi sɔɔn nda bii bila-on mún ŋuɛɛnu le nda pɛɛkoo a sɔɔn vaalan tɔ́ dimio o sɔɔn mangalan nda tui loon nin.

²⁰ Puapilɛa nia, la va n'cuaambɔ o kɔlkalu niaa nin te, kɛ la va cuaambɔa le dɛnɛ vɔɔndo, mì la va kaasonnda o yiyannda niaalan nin.

²¹ Kani o co o sɛvaa aa: «I keinin a sɔɔn mangalan celen a á sondola mialla, mì dimul vannda ha sɔɔn, kɛ a kon kpow, a yeŋnin ya lani le.»

²² Lelan, sɔɛi o sɔɔn mangalan celen nin, kon co leponda le vanaa laalannda le, kɛ le vanaa laalan te-a. Kɛ nduyɛ, diom Hala-o tɛɛnguuo ndu, pondalen o co le vanaa laalannda ni, kɛ o co le vanaa laalan te-a le.

²³ Te o va pɛ mì vanaa laalannda kpow a cuungian o fonda pilɔɔ, mì nda kpede a va sɔɛi o sɔɔn mangalan celen nin, mì vanaa bii dɛnɛ kon bila le-a te kon te vanaa co vanaa laalan te-a hin, vɛ̀ɛ̀ a diminin te maa la seema?

²⁴ Kɛ te nda kpow a va pɛ diom Hala-o tɛɛnguuo, mì vana co vana laalan too, te kon te mì vana sínà dɛnɛ kon too hin sɔɔn mun nilan yaŋɔɔ daama, sɔɔn mun kpow n pilannin ndu kɔllo mì nda kpow a kelu ndu iyama,

²⁵ mì sɔɔn viannan n co ndu o kɔl-lon n cɔmnun. O kon, o delnin o kɔl coo hɔlla a kuumbuan lɛŋ, mò biilu Hala, mò dimi aa: «Lekɛ́ndɛi, Hala co niaa tɛɛn.»

O bɛnda mì sɔɔn n kɔɛ o polalen vanaa laalannda tɛɛn

²⁶ Puapilɛa nia, vɛ̀ɛ̀ vana tosa yɛ niko? Te la cuungian pɛ, mì vana pum nɔ le condei solio, mì o pum nɔ pɛɛkoo le yɔngoo, mì o pum nɔ dɛnɛ cɔɔmun ndu-o, mì o pum nɔ yoongoo le dimio o sɔɛi mangalɛi celen nin, te kon te mì o pum ndu nɔ sɔɛi pum le tɛɛsiaa, kon kpow bɛnda mò tosan le vanaa laalannda yoomuan lueiyo.

²⁷ Te o va yɛ pɛ le sɔɛi o sɔɔn mangalan celen nin, o hiaw vanaa ŋiɔn te kon te vanaa yaa coo le. A va sɔɛi a pilɛn-pilɛnnda, mì vanndo va le sɔɔn mun hivio.

²⁸ Kɛ te vana ve le hivio le, mɛɛ vana co sɔɛi-yo meinun vanaa laalannda tɛɛn, mò soo o kɔl nin a o Hala lo.

²⁹ Vanaa-tɛɛngaa-diom Hala-a a ŋiɔn te kon te a yaa soo pɛ, a tɔ̀a kelu ɲɛ nda co dimio-o iyama.

³⁰ Kɛ te Mɛlɛka cɔɔmul pɛ vana co icali-o dɛnɔɔ pum, vana tase va sɔɛiyo bɛnda mò mei.

³¹ Kani niaa kpow, la tiwba mì la tɛɛngu diom Hala-o o polalen, haliko mi vannda kpow a sɔla pɛɛkoo, mà sɔla vɛlɛ yoomuan.

³² Vanaa-tɛɛngaa-diom Hala-a bɛnda mà nɔla kɔlta ndalan biyɔɔ, mà va o nda pila nin.

³³ Kani Hala co Hala laasi-laasi le, kɛ Hala kɔlɲuloo o co ni. Mɛɛ sɔɔn co kɔlan o kunda vanaa laalannda kpow tɛɛn yɛ co ni maa,

³⁴ o bɛnda mì vanlaandua mei o cuungiannda lekaanndan, kani a nɔ dí ma soo lon te. O bɛnda mà tuisin tootoo mɛɛ tɔŋ Hala-o bɛɛ dimi yɛ.

³⁵ Te vanalanɔɔ yeema pɛ le sɔɛi pum ɲunaa, o kɔ mò kɔ ɲuna pɔnɔ ndɔ o nda lo cɛinin, kani o co dɛnɛ lasiɛmbu le vanalanɔɔ sɔɛi cuaa o bɔŋan lekaanndo coo.

³⁶ Vɛ̀ɛ̀ o niaa lo sɔɛi Hala-e i kandun ni baa niaa daama nda tiiyal ndi ni?

³⁷ Te vana pum cennun pɛ maa vana-tɛɛngaa-diom Hala-o o co ni, te kon te maa Kɔl Hala-o cɔm ndu dɛnɔɔ pum, mɛɛ mò sina maa tɔŋ Mɛlɛka-o sɔɔn ya co niaa sɛvallo-on n co ni.

³⁸ Te vanndo sínà sɔɛi he pɛɛngu le, mɛɛ ndu bɛɛ la pɔɛɛnun a ndu.

³⁹ Lelan puapilɛa nia, yeemɛi bii niaa le diom Hala-o tɛɛnguuo, la kuuna vannda sɔɛi o sɔɔn mangalan celen nin te.

⁴⁰ Kɛ la va dɛnndan kpow tosaa o bɛɛlen nin a o polalen.