1Korɛntea 13 - BII BILA

Kaolaa

¹ I soo bɛɛ o sɔɔn mangalan vanndacieea a o sɔɔn mɛlɛkaa nin, te kaolaa co ya o kɔl te, mɛɛ i siŋnun maa diom ibamba, te kon te maa diom kɛ́ŋii comulaa.

² Hali i sɔla bɛɛ vallo le diom Hala-o tɛɛnguuo, mì sínà dɛnnda kɔndɔfiltan kpow, mì nɔ dɛnɛ sinaa kpede, i nɔ vɛlɛ bɛɛ laalanndo háá mì faŋa pembon o fonda n co-o, te i nɔ kaola o kɔl te, mɛɛ i co ɲɛ-ɲɛ le.

³ I piɔw bɛɛ ɲɛm nun kpow le vannda baloo dɔvɔɔ, i yɔngu bɛɛ dialun nun le lomɔɔ, te kaola co ya o kɔl te, kon co ɲɛ-ɲɛ le ya le.

⁴ Biwnɔnndo kaolaa biwnun ni, o nɔ kɛndɛi, o paŋala le, o kuundian te, o pe a yonga le,

⁵ o tosa dɛnnda lasiɛmbu lan te, o toofia tɔnɔ ndɔ ndu pila le, o fula kɔl te, o tuunun dɛnɛ vɔɔn o kɔl te,

⁶ o niŋ kɔl a dɛnɛ sendu loo le, kɛ le toɲaa mò dɔwnun ɲaale.

⁷ Dɛnndan kpow kaolaa mal haki ni, mò laalan ndan kpow, mò tiindan ndan kpow, mò yulu kpow.

⁸ Kaolaa cuu lɔ́ɔ́-lɔ́ɔ̀ le, diom Hala-o tɛɛnguuo co hunɔɔ hiovɔɔ, sɔɔn mangalan co hunɔɔ cuvɔɔ, dɛnɛ sinaa co hunɔɔ hiovɔɔ.

⁹ Kani ɲɛ-pɔmbɔ koni naa n sínà ni, ɲɛ-pɔmbɔ koni naa n tɛɛnguu diom Hala-a ni.

¹⁰ Kɛ lɔ́ɔ́ o tiwnun-ndo hunnin-ndo, o tiwnun too cuunin ni.

¹¹ Lɔ́ɔ́ ya va cuaambɔ-o, i va sɔɛi maa cuaambɔ, i va yiyanndo maa cuaambɔ, i va sɔɔn dimio maa cuaambɔ. Kɛ yáà siŋnɔnndo kaasonɔɔ, mí mal dɛnnda icuaambɔya lan.

¹² Hau, n co dɛnndan cɔu yifidii maa o tofan nin, kɛ o kon kɔɔli, n cannannin kpendekele. Sunsun, ɲɛ-pɔmbɔ ya sínà ni, kɛ telen co hunɔɔ tiiya, mì n sínà kpow mɛɛ nda sínà ya yɛ.

¹³ Sunsun yɛ niko, ɲɛm yaan mun n co ni: laalanndo, kɔlkɛsiaa a kaolaa, kɛ o hiow lan kpow-vo co kaolaa ni.