1Korɛntea 11 - BII BILA

¹ La tuula ya mɛɛ ya bɛɛ co Krista tuulaa yɛ.

Mɛɛ vanalanɔɔ bɛnda mò bii bolle ndɔlen o kaannden yɛ

² I co niaa candɔɔ le yiyan niaa co ya coo o dɛnndan kpow nin-ndo a le silala nila niaa co biyɔɔ mɛɛ ya dimul niaa yɛ lan.

³ Nduyɛ, i yeema mì la sínà maa Krista co vanndacieea kpow bollen ni. Vanapɔnɔɔ co vanalanɔɔ bollen ni, Hala co Krista bollen ni.

⁴ Vanapɔnɔ oo vanapɔnɔ piɛi pɛ Hala, te kon te mò va diom Hala-o tɛɛnguuo a ɲɛ pum o lebol, mɛɛ o cii vana co ndu bollen-ndo bɛ̀ɛ̀lan tɛɛmbuu.

⁵ Kɛ nduyɛ, vanalanɔ oo vanalanɔ va pɛ Hala piɛiyo, te kon te mò va diom Hala-o tɛɛnguuo bolle fondo, mɛɛ ndu tɛɛmbuu vana co ndu bollen-ndo labɛɛ. Bau, o co ko kpen a sendin ndóò sendin nin-ndo.

⁶ Kani te vanalanɔɔ kumbu bollen te, mɛɛ o kilin yiinde. Kɛ nduyɛ, te o co pɛ dɛnɛ lasiɛmboo le vanalanɔɔ yiinde kilio te kon te sendio, mɛɛ o kumbu bollen.

⁷ O bɛnda mì vanapɔnɔɔ kumbu bollen te, kani ndu co velan biilu Hala-o ni. Vanalanɔɔ yɛ, ndu co biilu vanapɔnɔɔ ni.

⁸ Kani o co vanapɔnɔɔ le fula vanalanɔɔ o n'dial te, vanalanɔɔ fula vanapɔnɔɔ o n'dial ni.

⁹ Vanapɔnɔɔ cownun le vanalanɔɔ le, vanalanɔɔ cɔwnun le vanapɔnɔɔ ni.

¹⁰ Lelan, vanalanɔɔ yiyan le mɛlɛkaa mò nɔ tɔɔmaseloo o lebol, kon cɔm ni maa o co o kpaayaa pum bɛngu.

¹¹ Kɛ nduyɛ o Maalii nin, vanalanɔ co le te o co mì vanapɔnɔɔ va le. Lende vɛlɛ koni ni, vanapɔnɔ co le te o co mì vanalanɔɔ va le.

¹² Kani mɛɛ vanalanɔɔ fula vanapɔnɔɔ o n'dial-lɛ, lende vanapɔnɔɔ velun vanalanɔɔ o n'dial ni. Nda kpow, Hala o ba nda fula ni.

¹³ Niaa pila kiolu sɔɛi he iyama. Vɛ̀ɛ̀ o bɛnda pá mì vanalanɔɔ piɛi Hala, te o kumbu bollen te?

¹⁴ Ceendo pila bɛɛ pɛɛku naa maa o co dɛnɛ lasiɛmbu mì vanapɔnɔɔ bɛndi yiinde.

¹⁵ Kɛ o co dɛnɛ lebɛɛ mì vanalanɔɔ ndu bɛndi yiinde. Kani yiiŋii vilɛiye i yɔngun ndu le bollen kumbɔɔ.

¹⁶ Te vana pum yeema yɛ pɛ mò sɛɛngiaa, mɛɛ mò sínà maa naamu vaa lende co naa tɛɛn te, vanaa laalan Hala kpow-va bɛɛ nɔ naamu vaa lende le.

Le dioo o tabali Maalii-o

¹⁷ Sɔɔn ya co mun niaa dimullo-on, o co le niaa candɔɔ le. Kani bɔɔŋiannda niaalan, dɛnɛ vɔɔndo la hiaw niaa cuu a dɛnɛ kɛndɔɔ.

¹⁸ Sɔɛi tasei co hee ni, i tuei maa la bɔɔŋian pɛ, la piɔvian kundalan yɛ́-yɛ́. Nduyɛ, i laalan kon ɲɛ-pɔmbɔ.

¹⁹ Kɛ nduyɛ, mɛɛ mì piɔvanndan la va niaa tɛɛn, haliko mi vana sínà vanaa lo o lediom coo lekɛ́ndɛi-ya.

²⁰ Te la cuungian pɛ, vɛ̀ɛ̀ o co ɲɛdiaa Maalii-o le niaa dia dio kon te?

²¹ Kani telen diaa tiiya pɛ, vana-vana de ɲɛdiaa ndɔɔ a kiltan. O kon, a pum lò a yiaan, mì mɔiyan ma bii a pilla.

²² Vɛ̀ɛ̀ vana-vana nɔ cɛi ndɔ le dioo a kolɔɔ lon te? Te kon te vɛ̀ɛ̀ vanaa laalan Hala-a niaa yeema bɛ̀ɛ̀lan tɛɛmbuuo mì la tuisi vanaa nɔ ɲɛ-ɲɛ le-a siɛmbulan ni? Yɛɛ ya dimul-lɛ niaa vɛlɛ? Vɛ̀ɛ̀ i candu niaa lelan? Kɛì-kɛì bɛɛ! I cendù niaa le.

²³ Kani naamu ya tɛɛngul niaa-o, Maalii o ba ya sɔla ndu ni. Icɔl nda mal Maalii Yeesu vannda o ba-o, mó cua buloo,

²⁴ mɛɛ o cii balikaa malɔɔ, mó yimiyimi ndu, mó dimi aa: «Dialun nun co mun ni, n yɔngun le niaa-on. La va hoo tosaa le loonɔnndo a ya o kɔɔ.»

²⁵ Ɲɛdiaa icɔllo cuvɔɔ dioo, mó tosa vɛlɛ lende a taala kólaa, mó dimul nda aa: «Taala kólaa ho co kpema sɛnɛi yiinun a kooma nian-ndo ni. La va hoo tosaa le yiyanndo a ya kɔɔ tuma-tuma niaa va pɛ koovan man kolɔɔ.»

²⁶ Kani telen oo telen niaa va pɛ buloo ho dio mì la va kolɔɔ o taala kólaa ho nin, mɛɛ piɔ́m Maalii-o niaa co cɔm kon ni háá mo hin.

²⁷ Nduyɛ, vana-vana de pɛ buloo ho, te kon te mò kol o taala kólaa Mɛlɛka-o ho nin mɛɛ o bɛnda le yɛ, mɛɛ o del kasi a dialun Maalii-on a á kooma ndɔan.

²⁸ Lelan, vana-vana yaasiaa fɔlɔn kɔl ndɔɔ, malan o dia buloo ho, mò kol o taala kólaa ho nin,

²⁹ kani vana-vana de pɛ, mò kol, mò sínà diallon mun pɛɛngu le, mɛɛ ndu co dioo a kolɔɔ le ndu pila yaalanndo.

³⁰ Le hee vanaa bɔɔ-bɔɔ co a nààlan niaa tɛɛn ni, a pum a co namtaa, a pum a vi.

³¹ Kɛ te naa pila n yaasiaa pɛ kɔlta naalan, a kilunin naa iyama le.

³² Kɛ Mɛlɛka kialunin naa iyama, mò mingi naa o nɛi, o kon n sɔlanin yaalaa a ceendo latulu le.

³³ Lelan puapilɛa nia, la bɔɔŋian pɛ le dioo, la cuman vellaa-velle.

³⁴ Te yiyan ma va pɛ vanndo pum nɛiyo, mɛɛ o dio o ndu lo, yɔŋii niaa pila sɔla yaalaa telen niaa va a cuungiannda-o. Le sɔɔn tɔ̀un yɛ, lɔ́ɔ́ ya kɔanin-ndo, i siownin mun toosiaa.