1Korɛntea 10 - BII BILA

Dɛnnda vɔɔnnda Israɛlla a pum a tosa lan

¹ Puapilɛa nia, i yeema mì la pɔɛɛnun te maa fuɲaa naa mamaa kei o tindilen bɛngu, mí nda kpow taŋ mɛmma ihɛllan.

² Má sɔla yinɔɔ o yumbuyumbu kon nin a o mɛmma ihɛllan nin a Moise latulu.

³ Má dia ɲɛdiaa kɔl pilɛ fula Mɛlɛka o ba-o.

⁴ Nda kpow, má kol ɲɛ kɔl pilɔɔ fulaa Mɛlɛka o ba, kani mí nda kpow a kol o pow kpova kɔl fula Mɛlɛka o ba-o, ó va nda liilaa-o pɛɛn. Pow kpova kon yɛ, ndu co Krista ni.

⁵ Kɛ vanaa bɔɔ-bɔɔ nda tɛɛn, Mɛlɛka ndóò hini kɔl a nda le. Le hee, má vu o lɛŋnde veselɛilen nin.

⁶ Sɔɔn mun yɔŋnun tɔɔmaselelan le naa silaa, yɔŋii naa bɛɛ n sɔla yeemɛi o lakɔl le dɛnnda vɔɔnndan tosaa maa nda.

⁷ La siŋnun vanaa soolaa n'piɔmnda maa a pum o nda tɛɛn te, maa mɛɛ sɛbɛ Hala-o dimi yɛ aa: «Vannda cal le dioo a kolɔɔ, o kon kɔɔli má can pisulta bɛɛ tambɛilan.»

⁸ N suundan maa mɛɛ vanaa pum nda tɛɛn tosa yɛ le. Nduyɛ, o paalen ten pilɛ bɛngu, mí vannda vaalan bidiin a layàá a sɔla piɔ́mndo.

⁹ N tɔɔndàn Mɛlɛka mɛɛ a pum a tɔɔndan ndu yɛ le, mí kɛwva lɔwviaa nda, má vu.

¹⁰ N ŋɔɔcian maa mɛɛ a pum nda tɛɛn va ŋɔɔcianndo yɛ le, mí mɛlɛkanɔ nɔ piɔ́mndo o ba-o tɛɛmbuu nda.

¹¹ Dɛnnda lan la yɔŋnun nda haliko mi la va tɔɔmaseloo le naa. La sɛvan le naa vanaa tɔ̀a kanalanndo, kani telen naa n co hoo-o, o lo nin kpɛɛlun mì ceendo cuu.

¹² Lelan, vana-vana yiyan pɛ maa o sim yili, ndu mandan yɔŋii o del.

¹³ Tɔɔndan oo tɔɔndan co niaa komallo, tɔɔndannda ivanacieeya lan daama la co ni. Kɛ vana lo o lediom coo-o Hala co ni, nduyɛ o cɛlnin mì tɔɔndanndo hiow niaa mayoomu le. Kɛ te tɔɔnndanndo komal niaa pɛ, o yɔngunin niaa fɛlɔɔ mì la tiwba ndu biuvɔnndo, o kon mì la fulan lenin.

¹⁴ Lelan, puapilɛa nia hɛnan ya taw-va, la sooluu piɔmnda le.

¹⁵ Maa mɛɛ ya sɔaa o vanaa kɔlkalua lo yɛ ya co niaa diomndan ndan dimullo ni, niaa pila kiolu sɔɔn ya co dimio-on iyama.

¹⁶ La yiyan-ndɔ a taala kólaa duaa naa n mel Hala balikaa mì n kol lenin-ndo. Vɛ̀ɛ̀ o co ndu le co kooma Krista ma naa n kol vellaa-velle-an te? Bulu naa n yimiyimi-o, vɛ̀ɛ̀ o co ndu le co dialun Krista naa n dia vellaa-velle-on te?

¹⁷ Le mɛɛ buloo co ndu pilɛ yɛ, n va bɛɛ sɛ́lɛ́, dialii pilɛi kpé naa n co ni, kani bulu pilɔɔ kpé naa n co dioo ni.

¹⁸ La yiyan ndɔ a Israɛlla o kɔɔ, mɛɛ nda tosa yɛ. Vɛ̀ɛ̀ o co vanaa pilɛa le vanaa de visin lasálàn-nda yɔŋnun a fonda-loamaa-lasálàá le?

¹⁹ Kɛ nduyɛ, te i va pɛ hee dimio, baa dimio co kon ni maa visin vannda co Mɛlɛka sálàlan solullo-on co ɲɛ? Te kon te maa ɲɛ pum piɔmndo co ni?

²⁰ Kɛì-kɛì bɛɛ! Kɛ le ɲinaa vɔɔnda ɲɛm vanaa sínà Hala le-a soli sálàlan-ndon n co ni, o co le Hala le. Nduyɛ, i yeema mì la va niaa ɲinaa vɔɔnda latulu le.

²¹ La nɔla mì la va kolɔɔ o taala kólaa Maalii-o nin a o taala kólaa ɲinaa vɔɔnda nin te. La nɔ́là vɛlɛ mì la va ɲɛdiaa Maalii-o dioo mì la va vɛlɛ ɲɛdiaa ɲinaa vɔɔnda dioo le.

²² Vɛ̀ɛ̀ n yeema mì n kpeeŋiaa paŋala Mɛlɛka-o? Vɛ̀ɛ̀ naa hiow ndu kpaayaa ni?

N tosan dɛnndan kpow mì Hala sɔla biiloo

²³ La co dimio aa: «Dɛnndan kpow la bɛnda le tosaa.» I co toɲa, kɛ o co dɛnndan kpow le la naŋ te. «Dɛnndan kpow la bɛnda le tosaa», kɛ o co dɛnndan kpow le la hivi vana laci o laalanndo nin te.

²⁴ Vana-vana nuwviaa dɛnɛ kɛndɔɔ le ndu pila daama le, kɛ o nuwviaa dɛnɛ kɛndɛ caanda.

²⁵ La dio ɲɛm nda co pisio o lɔ́ɔ́ nin-ndon kpow, kɔlta niaalan la sanga a ɲunaa le,

²⁶ kani lɛŋnden a ɲɛm co lenin-ndon kpede, Hala nɔ ni.

²⁷ Te vana co vana laalan too veelu pɛ niaa le dioo, mì la yeema le kɔlan, mɛɛ la dio ɲɛdiaa kɛ́-kɛ̀ o co niaa cɔm, la saangiaa kɔlta niaalan a ɲunaa le.

²⁸ Kɛ te vanndo dimul niaa pɛ maa ɲɛm sálàn co mun ni, la dia lɛ ɲɛm mun te, le vana dimul niaa kon-ndo, yɔŋii kon pala vɛlɛ kɔlta niaalan.

²⁹ I co niaa hee dimul, o co le kɔlta niaalan te, kɛ le kɔl vana co niaa sɔɛi ken dimul-lo. Vɛ̀ɛ̀ mì kɔl vana celen kelu ɲɛ ya nɔ le tosaa-o iyama?

³⁰ Te i mel pɛ Hala balika le ɲɛ pum dioo, le yɛɛ mì vannda congu ya o ɲɛ kon dioo?

³¹ Lelan, o va dio, o va kolɔɔ, te kon te ɲɛ-ɲɛ niaa va pɛ tosaa, la tosa ndu mì Hala sɔla biiloo.

³² La tosa ɲɛ-ɲɛ mì la luei vanaa co N'Yuifi le-a, te kon te Yuifia, te kon te vɛlɛ vanaa laalan Hala-a o pɔwlan nin te.

³³ La tosà maa mɛɛ ya co dɛnndan tosaa le vannda kpow hɛnanndo yɛ, i co dɛnɛ kɛndɛ toofia le ya pila le, kɛ le vanaa bɔɔ-bɔɔ, haliko ma sɔla cindaa.