1Dɛnnda lemasalan 4 - BII BILA

Diola poaa fula o polale Yuda len nin-nda

¹ Poaa Yuda-a a yɔŋnun Perɛs, Hɛsrɔn, Karmi, Hur a Sobal ni.

² Mí Reaya po Sobal-lo vialu Yahat, mí Yahat vialu Ahumai a Lahad, nda yɔŋnun sindɛ bolii lapangɛi le yungula Soreatiia ni.

³ Vanaa kelu kobio Etam-nda yɔŋnun haa ni: Yisreɛl, Yisma a Yidba. Yema nda laandoo yɔŋnun Hasɛlɛlponi ni.

⁴ O kan kɔɔli, mó vialu vɛlɛ Penuɛl, o kelu kobio Kedɔr-o a Esɛr kelu kobio Husa-o. Kan yɔŋnun poaa Hur-a ni, po tase Efrata-o. Hur kon kelu Bɛtlɛhɛm ni.

⁵ Laandua nda ŋiɔn Asur, fuɲaa Tekoa ndóò nɔ ni: Helea nda Naara.

⁶ Mí Naara vilul Asur poaa nda hiɔɔlu: Ahusam, Hefɛr, Temɛni a Ahastari.

⁷ Mí Helea ndu vilul ndu poaa nda yáá: Serɛt, Sohar a Ɛtnan.

⁸ Kɔs yɔŋnun fuɲaa Anub a Hasobeba ni. Kɔs kon va vɛlɛ fuɲa-mama yungula Aharehɛl po Harum-ndo lan ni.

⁹ Yaebɛs vannda ndáà hiow bɛɛlen ke a puapilɛa ndɔa. Kala ndɔ ke ndu diolan ni aa Yaebɛs, kani mó dimi aa: «O sangaa nin ya velu ni».

¹⁰ Mí Yaebɛs piɛi Hala Israɛlla, mó dimi aa: «Taa dɔw ya pɛ duaa lekɛ́ndɛi, mɛɛ cɔɔlu ya lɛŋnde kuilul, mà kanda ya a ba nɔm kpaayaa, mà faŋa dɛnɛ palaa a sangaa ya ikɛi polon.» Mí Hala cɛl piɛile ndɔlen.

¹¹ Mí Kelub, puapilɛ Suha-o vialu Mehir, Mehir kon yɔŋnun fuɲaa Ɛstɔn ni.

¹² Mí Ɛstɔn vialu Bɛt-Rafa, Pasea a Tehinna. Tehinna kon kelu kobio Nahas ni. O kobio Reka nin ndáà fula ni.

¹³ Poaa Kenas-a a yɔŋnun Otniɛl nda Seraya ni. Mí Otniɛl vialu Hatat,

¹⁴ mí Meonɔtai vialu Ofra. Mí Seraya vialu Yoab, Yoab kon yɔŋnun fuɲa-mamaa vanaa va icali o ból nda veelu aa Ból vanaa baala labaa-o nin-ndo ni, kani vanaa baalaa labaa nda va ni.

¹⁵ Poaa nda yáá Kalɛb po Yefune-o ndóò velu ni: Iru, Ela a Naam. Ela yɔŋnun fuɲaa Kenas ni.

¹⁶ Poaa Yehaleleɛl-la yɔŋnun Sif, Sifa, Tirya a Asareɛl ni.

¹⁷ Poaa Ɛsdras-a yɔŋnun Yetɛr, Merɛd, Efɛr a Yalon ni. (Mí lanɔɔ Merɛd) vialu Miriam, Samai a Yisba. Yisba kon kelu kobio Ɛstemoa ni.

¹⁸ Merɛd ndóò nɔ vɛlɛ lanɔ Yudanɔɔ pum o ba, mí kon vialu Yerɛd kelu kobio Kedɔr-o, Hebɛr kelu kobio Soko-o, a Yekusiɛl, o kelu kobio Sanoa-o. Kan yɔŋnun poaa Bitia-a ni, cua Faraɔnnɔ Merɛd ndóò cua o nɔ̀u nin-ndo pɛɛn.

¹⁹ Yemaa Naham va Hodia o ba o nɔ̀u nin. Poaa o vilul ndu-a yɔŋnun haa ni: Keila Karmiinɔ a Ɛstemoa Maakatiinɔ.

²⁰ Poaa Simɔn-nda yɔŋnun Amnɔn, Rinna, Bɛn-Hanan a Tilon ni. Sohɛt nda Bɛn-Sohɛt yɔŋnun cuavaa-imamaa Yisei-ya ni.

²¹ Cuavaa-imamaa Sela, po Yuda-o-a yɔŋnun haa ni: Ɛr kelu kobio Leka-o a Laeda kelu kobio Maresa-o. Sela kon yɔŋnun vɛlɛ fuɲa-mama yungula vanaa lɔa kolala keesela fɛtufɛtulan-nda ni.

²² Sela kon kani yɔŋnun vɛlɛ fuɲa-mama Yokim-ndo a fuɲaa-mama vanaa va o kobilan Koseba, Yoas a Saraf nin-nda ni. Kan kɔ cua laandua Moabua ni telen pá má muungu má kɔ cal Lehɛm. Dɛnndan ndan la yɔŋnun o co nihau lɔ́ɔ́ levil.

²³ Vanaa cɔavaa n'kpɛɛnɛa poaa ndaa imamaa va ni, o nakɔlan nin a o vɔ̀lɛ́lan nin calta ndalan la va ni. Lon nda va baalaa tosaa le masaa ni.

Poaa imamaa Simeɔn-nda

²⁴ Poaa Simeɔn-nda yɔŋnun Nemuɛl, Yamin, Yarib, Sera a Saul ni.

²⁵ Poaa Saul ndu velu kpeekpei-ya yɔŋnun Salum, Mibsam a Misma ni.

²⁶ Mí Misma vialu Hammuɛl, Sakur a Simei.

²⁷ Mí Simei ndu vialu poaa tɔ́ a à ŋɔmpum a cuavaa laandua nda ŋɔmpum. Kɛ puapilɛa ndɔa sɔla cuavaa bɔɔ le, lelan nda kɛɛ kui maa polale Yuda len ni.

²⁸ Kobila nda va icali nin-ndan la va lan ni: Bɛɛr-Seba, Molada, Hasar-Sual,

²⁹ Bilha, Esɛm, Tolad,

³⁰ Betuɛl, Hɔrma, Siklak,

³¹ Bɛt-Markabɔt, Hasar-Susim, Bɛt-Birei a Saaraim.

³² A va vɛlɛ icali o kobila ŋuɛɛnulan ndan nin: Etam, Ayin, Rimɔn, Token a Asan,

³³ handɔɔ niko o cieon mún balu kobila lan-ndon kpow coo, kɔlan tiiyaa háá Baal. Calta ndalan la yɔŋnun ndan ni. Diola yungula ndalan la co lasɛvaa o sɛbɛla polama ndan nin.

³⁴ Diola vanaa va simlacia o yungula polale Simeɔn-nden nin-nda lan la co lan ni: Mesoba, Yamlɛk, Yosa po Amasia-o,

³⁵ Yɔɛl, Yehu po Yosibia-o, Seraya óò velu Yosiba kon ni, Asiɛl óò velu Seraya kon ni,

³⁶ Elioenai, Yaakoba, Yesohaya, Asaya, Adiɛl, Yesimiɛl, Benaya,

³⁷ a Siisa po Sifei-yo. Semaya velu Simri ni, mí Simri vialu Yedaya, mí Yedaya vialu Alɔn, mí Alɔn ndu vialu Sifei fuɲaa Sisa kon.

³⁸ Kan kpow va simlacia yɛ́-yɛ́a o yungula ndalan nin ni. Mí yungula ndala lan la kui kuiyo pila.

³⁹ Kedɔr ciee-lekɔɔ, o bóllo a ba paalen le del-lo dí ndáà kɔa billo nuwviaa le cɔlua ndaa ni.

⁴⁰ Lon ndáà komal bil puiyaa kɛndɛ-kɛndɔɔ ni. Lɛŋnde len le va lebɔɔ, vóólun-vóólun ve lon te, kɔlɲuloo koni vannun ndon ni. Kani poaa imamaa Ham-nda va icali lon paandu ni.

⁴¹ Nduyɛ, telen Esekia va masaa Yuda-o, mí simlacia kan kɔ del lɛŋnde yungu Ham-ndo len coo, má tɛɛmbuu cɛila-kolala-toandaalan a nɛɛ viannaŋaa va lon-nda kpow, má diw vanaa va lon-nda. O kon kɔɔli, má kɔ cal o fonda nda kon, kani lon ndáà sɔla bil kɛndɔɔ le cɔlua ndaa ni.

⁴² Mí langbaa pum, fulaa o polale Simeɔn-nden nin, a can n'van kɛmɛ leŋuɛɛnu, má kɔa o pembon Seir coo, poaa Yisei-ya nda hiɔɔlu sim nda laci ni: Pelatia, Nɛaria, Refaya a Usiɛl,

⁴³ má kɔ diw Amalɛkea tɔ̀a lo yoomu-a, má calnun niko lon. Cuavaa ndaa imamaa co vɔ icali lon háá paalen nden.