1Dɛnnda lemasalan 10 - BII BILA

SƆƐI DAVID MASAA ISRAƐL-LE (10—29) Piɔ́m Saul-lo

¹ Paale pum, mí Filistia del Israɛlla coo a cɔwvo o pembei Kilboa coo. Mí vanaa bɔɔ-bɔɔ vu o Israɛlla tɛɛn. Mí Israɛlla ɲaanun Filistia.

² Mí Filistia tiila Saul nda poaa ndɔa, má dii Yonatan, Abinadab a Malki-Sua, poaa masaa pɛɛn.

³ Mí cɔwvo kiandu Saul coo, vanaa vuaa n'kɔɔa saalɔnndo ndu, mí siòònde bii Saul, mó ɲiiya nda o hɔl kpà-kpà.

⁴ O kon, mó dimul vana va ɲɛm cɔvun ndɔn cuaa-o aa: «Soli mɔɛi nɔmii cɔwve, mà cuku ya, mì vi, yɔŋii Filistia dii haa tooma le-a hun tuisi ya siɛmbulan.» Kɛ mí siòònde bii vana ndɔ ndóò cua kon ɲɛm cɔvun ndɔn-ndo taw. Mí Saul pila cua mɔɛi ndɔɛi cɔwve, mó del lecoo.

⁵ Tuma vana cuaa ɲɛm cɔwvo ce Saul o vílɛ́iyo-o, mí ndu bɛɛ del o mɔɛi ndɔɛi cɔwve coo, mó vu.

⁶ Nuaa Saul nda poaa ndɔa yaa, a vanaa ndɔa cɔwva sɔla piɔ́mndo o lepilɔɔ ni.

⁷ Telen Israɛlaa va o dɛɛlaa nin-nda tuei maa Saul nda poaa ndɔa vi, mí vanaa ndaa cɔwva ɲaanun-ndo, mí nda bɛɛ mal kobila ndalan, má ɲaanun. Mí Filistia kɔ cal lon.

⁸ Diimandɔɔ, telen Filistia kɔɛ le vanaa vi-a faaŋiaa-o, má komal Saul nda poaa ndɔa ihini a vílɛ́iya o pembei Kilboa coo,

⁹ má yunga Saul, má cua bolle ndɔlen a ɲɛm ndɔn cɔwvon, má kɔannun. Má kɔ balu sɔɛi ken yondaa o lɛŋnde ndalen nin a o sooluula nda Filistia nin kpow, haliko mi vanaa ndaa ndáà tuei Yoongu kɛndɛ kon.

¹⁰ O kon kɔɔli, má kɛsi ɲɛm cɔvun Saul-lon o máán piɔmaa ndaa nin, má kɔ baŋ kpokpo ndɔɔ o máán piɔmndo Dakɔn nin.

¹¹ Telen vanaa va Yabɛs o tàndá Kalaad-o nin-nda tuei dɛnnda Filistia tosal Saul-tan kpow-vo,

¹² mí kuubaa cɔvaa va o kobi kon nin-nda can, má kɔ cua paala Saul-tan a paala poaa ndɔa, má muungu a lan Yabɛs ciee. Má kɔ kumbu lan o terebɛnteo bɛngu. O kon kɔɔli, má bii sumndo palɛi ndii ŋɔmmɛw.

¹³ Le tùú Saul kɛɛ lou o lediom coo a Mɛlɛka-o, le tùú o kɛɛ le tɔŋnda ndɔlan biyɔɔ, mó kɛɛ le Mɛlɛka ɲunaa, mó kɔ ɲuna vanaa soaa a vanvílɛ́iya-a-o,

¹⁴ lelan Mɛlɛka tosa ni mó sɔla piɔ́mndo, mí ndu Mɛlɛka ke David po Yisai-yo masalen.