Tito 3 - Lalang Hu Dios

Mga Salambagan

¹ Ikagiyi dà sa mga tumutuu ha magmatinumanen gayed sidan hu mga agalen daw hu panggubirnuhan daw maandam daan sidan pagbuhat hu maayad.

² Kinahanglan ha harì sidan mandaet hu dengeg daw harì makigsawalà, ba magmahid-uwen sidan daw magmatinahuren gayed hu bisan sin-u.

³ Bisan su anay mga buang-buang ki daan, masinupaken ha nalaag duun hu kamatuuran, nabuhat ha ulipen taena ha kabayà ta hu bisan inu ha madaet daw kalibutanen ha kalipayan. Dayun dà madaet sa henà-henà ta duun hu duma daw amin ta kasina, sigi ta tagkuntrahen sa mga etaw daw kuntra ki daan kandan.

⁴ Bisan pa ku iyan haena mga buhat ta su anay ba sa Dios ha Manluluwas taw impaahà din kanit sa pagmahid-uwen daw sa pagpalanggà din kanit

⁵ ta linuwas ki kandin. Sa ingkaluwas ta kenà tumenged hu matareng ha binuhat ta ba tumenged dà gayed hu kahid-u din kanit. Linuwas ki kandin pinaagi hu paglimpyu kanit ha iyan nakapahimu ha in-isab ki dà imbatà daw pinaagi daan hu Balaan ha Ispiritu ha mig-ila kanit hu bag-u ha kinabuhì.

⁶ Iman hurà tad en kulang ta in-ila en kanit sa Balaan ha Ispiritu pinaagi ki Cristo Jesus ha Manluluwas taw

⁷ ta daw pinaagi hu grasya din nabuhat ki ha matareng, aman tagsalapen ta iman sa katumanan hu kinabuhì ha hurà din en katapusan.

⁸ Saini ha mga lalang kasaligan gayed. Agkabayaan ku ha ipanday nu gayed haini itudlù ta daw sa mga tumutuu hu Dios maniguru pagbuhat hu maayad ta saini hurà duun sayep daw mapuslanen hu bisan sin-u.

⁹ Harì ka makig-amul-amul hu pagsawalà ha binuang, pamatbat hu gin-apuan daw pagsawalà mahitenged hu Kasuguan ta saena hurà din pulus ta bà dà pakadaet.

¹⁰ Ku amin diyan sigi dà pakigsawalà ta daw mabengkag sa mga tumutuu baldenga nu haena. Ku harì magpaliliman baldenga nu hu ikaduwa. Ba ku harì pa gayed tumuu ikaw bay-anan nud en

¹¹ ta siguru gayed ha sa etaw ha iling taena nakasuway en duun hu pagkamatareng daw makasasalà en gayed. Ba sa mga salà din iyan en maghukum kandin hu silut.

¹² Igpadiyan ku ta ikaw si Artemas daw ku iyan ba si Tiquico. Ku makauma haini diyan sal-awen a ikaw diyà ta Nicopolis ta asem ku tilendeng diyà a tagtimà.

¹³ Buligi gayed si Zenas ha abugadu daw si Apollo hu alan ha mga kinahanglanen dan ku dumayun sidan hu paghipanaw.

¹⁴ Tudlui nu sa mga etaw ha maniguru sidan magbuhat hu maayad ta daw mabuligan dan haena sa taglised. Ku buhaten dan haena mapuslanen gayed sidan.

¹⁵ Agpangamusta ikaw sa alan ha mga duma ku dini. Ipangamusta kay daan duun hu tagpalanggà kanay duun hu pagtuu. Panalanginan kaw alan hu Dios.