Tito 2 - Lalang Hu Dios

Sa Pamatasan Hu Tumutuu

¹ Sikaw Tito, kinahanglan ha sa pagtudlù nu harì gayed makasuway duun hu kamatuuran.

² Tudlui sa mga laas ha maama ha magtigel sidan pag-inum daw iyan dan buhaten sa ikatahuri kandan hu mga etaw, magpugung daan sidan hu kaugalingen daw sa pagtuu dan matul-id gayed, amin dan laus ha pagpalanggà hu mga duma dan daw magmainantusen gayed sidan.

³ Tudlui daan sa mga laas ha bahi ha kinahanglan sa pamatasan dan matareng gayed. Harì sidan mandaet hu dengeg daw kenà palainum hu binu. Sa itudlù dan iyan sa maayad

⁴ ta daw sa mga batan-en pa ha bahi makatuen pagpalanggà hu igmaama dan daw hu mga batà dan.

⁵ Tudluan daan hu mga magulang sa mga batan-en ha magpugung hu kaugalingen dan daw magmahimpit, alimahan daan sa pamilya dan, magmaluluy-en daw matinumanen duun hu igmaama dan ta daw harì masaway hu bisan sin-u sa lalang hu Dios.

⁶ Tudlui daan sa mga batan-en pa ha maama ha magpugung sidan hu kaugalingen dan.

⁷ Kinahanglan iyan ka sampitan diyà ta kandan pinaagi hu pagbuhat nu hu maayad. Ku tagtudlù ka kinahanglan matul-id sa tigtudlù nu ha amin duun kaligdeng,

⁸ daw gamita nu sa mga lalang ha harì masaway ta daw saena ha mga agsupak ikaw bà dà kagayhai ta hurà dan gayed ikasaway kanit.

⁹ Tudlui sa mga suluguen ha magmatinumanen hu agalen dan duun hu bisan inu. Harì magsukul-sukul ba iyan gayed buhaten dan sa igkabayà-bayà hu agalen dan.

¹⁰ Harì daan sidan magsaup hu butang taena ha agalen dan, ba ipaahà dan ha kasaligan gayed sidan ta sa buhat ha iling taena iyan dayan-dayan hu katudluanan mahitenged hu Dios ha Manluluwas taw.

¹¹ Impahà hu Dios kanuy sa grasya din ta daw mahimu ha maluwas sa alan ha kaet-etawan.

¹² Pinaagi hu grasya tagtudluan kuy kandin ha endaan taw sa pakasupak hu Dios, sa kalibutanen ha kabayà, daw kinahanglan ha magpugung kuy hu kaugalingen taw daw magmatareng kuy ta iyan haena pamatasan ha agkabayà-bayaan hu Dios.

¹³ Buhaten taw haena iman ha tag-angat kuy pa hu pagdini hu gamhanan ha Dios ha si Cristo Jesus sa Manluluwas taw

¹⁴ ha migpakamatay para kanuy ta daw malibri kuy duun hu pagkaulipen taw hu salà, daw aghimpiten kuy kandin ta daw mabuhat kuy ha mga etaw din ha madasigen pagbuhat hu maayad.

¹⁵ Itudlù haini sa insulat ku diyan ta ikaw. Gamita sa katenged ha in-ila ikaw hu Dios hu pagdasig kandan daw sawaya sa buhat taena ha harì tagtuman. Kinahanglan harì ka maminusan hu bisan sin-u.