Tito 1 - Lalang Hu Dios

¹ Iyan a si Pablo ha suluguen hu Dios daw apustul daan hi Cristo Jesus sa migsulat taini. Sinugù a hu Dios duun hu mga etaw ha pinilì din ta daw malig-enan sa pagtuu daw makaiseg sa natun-an dan mahitenged hu kamatuuran ha iyan tinuuwan taw

^2-3 daw mahinam dan daan sa kinabuhì ha hurà din katapusan ha insaad kanuy hu Dios su hurà pa tanghagaa sa kalibutan. Sa Dios ha Manluluwas taw harì gayed tagbidù, aman duun hu natugun ha panahun impadayag din haena pinaagi hu pagpanunultul ku hu lalang ha insalig din kanak.

⁴ Sinulatan ku ikaw, Tito sa batà ku duun hu pagtuu. Sa Dios ha Amay taw daw si Cristo Jesus ha Manluluwas taw mag-ila ikaw hu grasya daw kalinaw.

Sa Buluhaten Hi Tito Diyà Ta Creta

⁵ Sa hinengdan ha intabun ku ikaw diyan ta Creta ta daw mabuhat nu sa hurà pa kapengahi ha buluhaten daw makapilì ka hu mga agalen hu mga tumutuu duun hu alan ha mga banuwa. Harì nu aglipati haena sa intudlù ku ikaw su anay ha

⁶ sa pilien nu ha agalen kinahanglan ha hurà ikasaway kandin. Sabuwa dà sa igbahi batà din tumutuu ha harì maikagi hu mga etaw ha tagpateyeng sidan hu kalibutanen ha kalipayan daw kenà daan sidan masinupaken.

⁷ Tumenged ta saini sinaligan duun hu buluhaten hu Dios kinahanglan hurà ikasaway kandin. Harì tagpalabaw-labaw daw kenà madalì mapauk, kenà daan palainum hu binu, kenà mapasipalahen daw harì tag-agpas ha magsapian.

⁸ Ba kinahanglan ha matanul gayed hu langyaw, babayaen din sa pagbuhat hu maayad, maligdeng, matareng, mahimpit daw tagpugung daan hu kaugalingen din.

⁹ Kinahanglan pangesegan din sa kamatuuran ha intudlù en ha kasaligan ta daw madasig din sa duma ha mga etaw pinaagi hu laus ha tinuuwan, daw saena ha agsupak hu kamatuuran agsaysayan din ta daw matun-an dan ha nasayep sidan.

¹⁰ Madakel iman ha mga etaw sa masinupaken gayed daw aglimbungan dan sa duma pinaagi hu mga lalang dan ha hurà din pulus. Saen ha tagbuhat taini kadakelà kandan iyan sa mga Judio ha nakatuu en ba tagtudlù gihapun ha kinahanglan gayed sa pagsirkunsida.

¹¹ Saini ha mga etawa kinahanglan ha ipahagteng gayed ta iyan sidan pakabengkag hu mga pamilya tumenged taena ha pagtudlù dan hu hurà dan ngaay duun katenged, ta tagbuhaten dan haena ta daw magsapian sidan.

¹² Bisan su sabuwa ha manalagnà dan tagyanaen, “Sa mga taga-Creta mga biduen gayed mga mapasipalahen daw pugulen daan ha agapan pa.”

¹³ Laus gayed sa inikagi din. Aman paniguruwi sa pagsaway nu taini ha mga etawa ta daw matul-idan sa pagtuu dan

¹⁴ daw harì en sidan magpaliliman hu bidù ha mga tultulanen hu gin-apuan dan ha Judio daw isalikway sa kasuguan hu mga etaw ha hurà dawat hu kamatuuran.

¹⁵ Sa mahimpit ha mga etaw tagpadayun gayed ha mahimpit, ba sa mga etaw ha madaet daw harì agtuu hurà gayed mahimpit diyà ta kandan ta sa henà-henà dan migdaet en gayed daw harì dan igkasamuk sa pagpakasalà dan.

¹⁶ Tag-ikagi sidan ha nakilala dan sa Dios ba tagpaahà ha kenà sidan tumutuu pinaagi hu mga buhat dan, ta sa tagbuhaten dan iyan sa agtambagan hu mga etaw daw masinupaken daan sidan daw harì gayed sidan pakahimu tagbuhat hu maayad.