Mga Buhat 6 - Lalang Hu Dios

Sa Pagpilì Hu Pitu Ha Tag-alima Hu Mga Tumutuu

¹ Su panahun ha migdakel en sa mga tumutuu sa mga Judio ha Griego sa kandan ha inikagiyan migtamudmud taena ha mga Judio ha Hebreo sa kandan ha inikagiyan tumenged ta sa sakup dan ha bahi ha balu harì agkailahan hu pagpan-ila kada aldaw.

² Aman inamul ku sampulù daw daruwa ha apustulis sa alan ha mga tumutuu daw ikagiyi, “Harì mabaluy ha endaan day sa pagtudlù hu lalang hu Dios daw iyan day buhaten sa pagpan-ila iman hu mga kinahanglanen nuy.

³ Aman mga suled, magpilì kaw hu pitu ha etaw diyan ta inyu ha nakilala ha maalam daw inulinan gayed hu Balaan ha Ispiritu. Iyan taw sidan agsaligan taini ha pagpan-ila

⁴ ta daw sikay sa mga apustulis iyan dà mapaniguruwan day pagbuhat sa pag-ampù daw sa pagtudlù hu lalang hu Dios.”

⁵ Su mapaliman haena hu mga tumutuu tungkay gayed sidan nangabayà-bayà. Aman pinilì dan si Esteban sa mabis-ay gayed sa pagtuu din daw inulinan daan hu Balaan ha Ispiritu, daw pinilì dan daan si Felipe daw si Procoro, si Nicanor daw si Timon, si Parmenas daw si Nicolas sa taga-Antiokia ha nakabig duun hu tinuuwan hu mga Judio.

⁶ Impaatubang su nangapilì duun hu mga apustulis daw pinagaheman sidan pinaagi hu pagdampà hu ulu dan taena ha mga apustulis dayun inampuan dan sidan.

⁷ Aman nakalekep sa lalang hu Dios daw migdakel gayed sa mga tumutuu diyà ta Jerusalem daw madakel daan sa mga sinaligan hu paghalad ha tuminuu ki Jesus.

Sa Kadakepa Ki Esteban

⁸ Si Esteban pigpanalanginan hu Dios daw ginaheman gayed hu Balaan ha Ispiritu aman madakel ha mga belenganen daw timaan sa impaahà din duun hu kaet-etawan.

⁹ Ba amin daan nakigsawalà ki Esteban ha mga sakup taena ha simbahan hu mga Judio ha pigngaranan hu Simbahan hu Nalibri ha Ulipen. Saini sidan diyà nangapuun ta Cirene daw ta Alejandria daw sa duma daan duun hu mga prubinsya ta Cilicia daw ta Asia.

¹⁰ Ba hurà dan kadaeg si Esteban ta sa Balaan ha Ispiritu iyan migtudlù kandin hu ag-ikagiyen din.

¹¹ Aman hinulhugan dan sa duma ha mga etaw. Kagi dan, “Napaliman day hayana ha pigpasipalahan din si Moises daw sa Dios.”

¹² Tumenged taini nagubut sa kaet-etawan daw sa mga magulang daw sa mga manunudlù hu Kasuguan aman dinakep si Esteban daw ipaatubang duun hu alan ha mga labaw ha agalen hu mga Judio.

¹³ Impaatubang dan daan haena sa mga biduen ha tistigus ha tagyanaen, “Saini ha etaw sigi dà gayed tagpasipala taini ha Timplu daw hu Kasuguan

¹⁴ ta napaliman day haini ha migyanaen ha agkagasen kun hi Jesus ha taga-Nazareth haini sa Timplu daw agbalhinen din sa mga tulumanen ha imbilin kanuy hi Moises.”

¹⁵ Sa alan ha mga labaw ha agalen ha naamul-amul diyà migtengteng ki Esteban na naahà dan sa weleng din ha agkailing hu balinsuguen hu Dios.