Mga Buhat 5 - Lalang Hu Dios

Sa Pagbidù Hi Ananias Daw Hi Safira

¹ Amin daan etaw ha tagngaranan ki Ananias daw sa igbahi din iyan si Safira ha migbaligyà hu bugtà dan.

² Sa halin taena inalatan hi Ananias daw mig-uyun daan sa igbahi din dayun sa samà inuwit din duun hu mga apustulis.

³ Ba minikagi si Pedro, “Ananias, tinaguan kad gayed hi Satanas aman pigbiduan nu sa Balaan ha Ispiritu. Imbà nu man alati su salapì ha halin hu bugtà?

⁴ Saena ha bugtà ikaw gayed su hurà nu pa ibaligyà daw bisan su ibaligyà nud en iyan ka gihapun tagbayà ku inu sa buhaten nu hu halin din. Imbà nu man kahenhenai sa pagbuhat hu madaet? Ta sa pigbiduan nu kenà etaw ba iyan sa Dios.”

⁵ Su mapaliman haena hi Ananias sagunà nabantang dayun minatay. Sa alan ha nakapaliman taena ha naul-ulahan nahaldek gayed.

⁶ Dayun su minatay inelegan hu mga batan-en ha mga maama daw bungkusi hu manggad daw ilebeng.

⁷ Su mga tatulu en ha uras sumineled daan si igbahi din ba hurà din katun-i sa nahitabù.

⁸ Aman ininsaan hi Pedro, “Iyan dà ba haini halin ku bugtà ha imbaligyà nuy?” Tuminubag haena, “Iyan dà hayana.”

⁹ Inikagiyan haena hi Pedro, “Imbà kaw man mag-uyun ha sulayen nuy sa Balaan ha Ispiritu ha sinugù hu Dios? Ahaa nu, ta taglikù en sa miglebeng ku igmaama nu na iyan kad en paman kandan iman iglebeng.”

¹⁰ Sagunà daan nabantang si Safira duun hu atubangan din dayun minatay. Su pagseled ku mga batan-en ha mga maama naahà dan haena ha minatay en daan aman inlebeng dan abay ku igmaama din.

¹¹ Tumenged taena sa alan ha mga tumutuu daw sa nakapaliman hu naul-ulahan nangahaldek gayed.

Sa Mga Belenganen Ha Binuhat Hu Mga Apustulis

¹² Madakel gayed ha mga belenganen daw mga timaan sa impaahà hu mga apustulis duun hu atubangan hu mga etaw. Sa mga tumutuu sigi tag-amul-amul duun taena ha Sihungà hi Solomon diyà ta Timplu.

¹³ Ba bisan ku tinahud sidan hu mga etaw hurà bisan sabuwa ha uminamul kandan ta agkangahaldek sidan.

¹⁴ Duun taena madakel gayed ha mga maama daw mga bahi sa nakaisab kandan ha tuminuu hu Ginuu.

¹⁵ Tumenged hu binuhat ku mga apustulis pinan-uwit duun hu mga dalan sa mga agkangadaluwan ha impamahidegà duun hu duyanan daw mga banig, ta sa henà-henà dan ha ku makaagi si Pedro diyà ta kandan bisan ku alung din dà sa makalambung kandan maulian en sidan.

¹⁶ Pinan-uwit daan hu mga etaw ha tagtimà duun hu mga banuwa ha ubayà ta Jerusalem sa mga agkangadaluwan daw sa pigpasipalahan hu mga busaw, saena alan nangaulian.

Sa Kapasipalahi Hu Mga Apustulis

¹⁷ Duun taena ha panahun sa tungkay labaw ha sinaligan hu paghalad daw sa sakup hu mga Saduceo ha mga duma din agkangasina gayed

¹⁸ aman dinakep dan sa mga apustulis daw prisuwa.

¹⁹ Ba su daleman nakauma duun ku mga apustulis sa balinsuguen hu Dios. Dayun pinuwaan din sa prisuwan daw ipaguwà sidan ha migyanaen,

²⁰ “Diyà kaw ta Timplu daw tudlui sa mga etaw mahitenged hu bag-u ha kinabuhì.”

²¹ Su maselem en duminiyà sidan ta Timplu daw panudlù. Duun daan taena ha aldawa inamul ku tungkay labaw ha sinaligan hu paghalad daw ku mga duma din sa alan ha mga labaw ha agalen hu mga Judio. Dayun impatimù dan hu mga bantay su mga apustulis diyà ta prisuwan.

²² Ba su makauma sidan diyà hurà dan en kaahà su mga apustulis. Aman luminikù sidan daw panunultul,

²³ “Su makauma kay diyà ta prisuwan sinirahan haena daw sa mga bantay na diyà ta pultahan. Ba su puwaan day hurà en etaw diyà ta seled.”

²⁴ Su mapaliman haena hu kapitan hu mga bantay taena ha Timplu daw hu mga labaw ha sinaligan hu paghalad nabeleng sidan ku hindu en duun sa mga apustulis.

²⁵ Ba amin nakauma ha nanunultul diyà ta kandan. Kagi din, “Saena ha mga etaw ha pinirisu nuy diyà en ta Timplu ha tagpanudlù hu kaet-etawan.”

²⁶ Aman su kapitan hu mga bantay daw sa mga sakup din inelegan dan su mga apustulis daw uwita duun hu mga agalen. Ba hurà dan pegesa ta agkahaldek sidan ku batuwen sidan hu mga etaw.

²⁷ Impaatubang su mga apustulis duun ku mga labaw ha agalen. Dayun ininsaan sidan ku tungkay labaw ha sinaligan hu paghalad. Kagi din,

²⁸ “Hurà day ba inyu balaudi ha harì nuy en itudlù sa pagtuu nuy taena ha etaw? Ba iman inlekep nuy en dini ta Jerusalem daw igbasul nuy kanay sa pagpatay taena.”

²⁹ Ba si Pedro daw sa duma din ha mga apustulis tuminubag, “Kinahanglan ha iyan day gayed tumanen sa sugù hu Dios dì hu etaw.

³⁰ Sa Dios ha tagsimbahen hu mga gin-apuan taw iyan migbanhaw ki Jesus sa hinimatayan nuy pinaagi hu kalansanga kandin duun hu krus.

³¹ Iman impatangkaw haena hu Dios daw duun impapinuu hu kawanan din isip ha Harì daw Manluluwas taw ta daw ku maghinulsul kuy sikuy sa mga kaliwat hi Israel pasayluwen kuy kandin.

³² Makapanistigus kay gayed mahitenged hu pagkabanhaw hi Jesus ta naahà day haini, daw sa Balaan ha Ispiritu ha impaulin hu Dios duun hu mga matinumanen kandin makapanistigus gayed daan.”

³³ Su mapaliman haena ku mga labaw ha agalen nangapauk gayed sidan, aman agkabayaan dan en aghimatayi su mga apustulis.

³⁴ Ba amin dan duma ha Parisiyu ha tagngaranan ki Gamaliel ha manunudlù daan hu Kasuguan daw tinahud hu mga etaw. Saena huminitindeg daw ikagi ha ipaguwà enà su mga apustulis hu nangkaatiyù.

³⁵ Dayun inikagiyan din su mga duma din, “Sinyu sa mga duma ku ha kaliwat hi Israel, hinay-hinayen nuy sa agkabayaan nuy agbuhata duun taini ha mga etaw.

³⁶ Su anay amin etaw ha tagngaranan ki Teudas ha nakadini sa migpaad-adagi aman migpasakup kandin sa haepat ha gatus ha mga etaw. Ba hinimatayan haena daw sa mga sakup din nakagsusuwayà aman nangahanaw sa buluhaten dan.

³⁷ Daw amin pa daan taga-Galilea ha iyan si Judas ha nakadini su panahun hu pag-iyap hu mga etaw na amin daan migpasakup kandin. Ba saena hinimatayan daan daw nakagsusuwayà sa mga sakup din.

³⁸ Aman ikagiyen ku inyu ha harì taw pasipalahan haini sa mga etaw ba ipatayà taw en. Ta ku sa tagbuhaten dan kandin dà hu etaw mahanaw dà daan haini,

³⁹ ba ku kandin hu Dios harì taw gayed haini mabaldeng ta kan ku bà taw dà paman kasabà sa Dios.”

⁴⁰ Aman tuminuu sidan ki Gamaliel. Su ipaisab dan ipaatubang diyà ta kandan su mga apustulis daw palagkuti binalaudan dan ha harì en sidan manunultul mahitenged ki Jesus dayun impaguwà sidan.

⁴¹ Inawaan su mga labaw ha agalen ku mga apustulis ha malipayen ta naisip sidan ha angayan ha pagagayhaan tumenged ki Jesus.

⁴² Aldaw-aldaw diyà ta Timplu daw duun hu mga balay migpadayun sidan hu pagsangyaw daw hu pagpanudlù ha si Jesus iyan su Misiyas.