Mga Buhat 27 - Lalang Hu Dios

Sa Pagdiyà Hi Pablo Ta Roma

¹ Su mauma en sa panahun ha aglulan kay en payanaen diyà ta Roma ha sakup ta Italia intugyan si Pablo daw sa duma ha mga prisu diyà ki Julio sa kapitan taena ha mga sundalu ha tagngaranan hu Punduk hu Harì ta Roma.

² Luminulan kay hu barku ha napuun ta Adramito payanaen hu mga banuwa ha sakup ta Asia. Duminuma daan kanay si Aristarco sa taga-Tesalonica ha sakup ta Macedonia.

³ Su maisab ha aldaw nakadunggù kay diyà ta Sidon. Agkahid-uwan hi Julio si Pablo aman tinugutan din ha mamisita duun hu mga amigu din ta daw mailahan hu kinahanglanen din.

⁴ Su dumayun kay en nasal-aw day sa maseleg ha kalamag aman diyà kay uminagi ta dibaluy hu pulù ta Cipro ta hurà duun bagyu.

⁵ Su malayun day en sa dagat ha atbang hu mga prubinsya ta Cilicia daw Pamfilia nakadunggù kay diyà ta Mira ha sakup ta Licia.

⁶ Diyà nakaahà su kapitan hu sundalu hu barku ha napuun ta Alejandria ha tagdiyà ta Italia aman namanlulan kay duun.

⁷ Nalugay kay nakauma diyà ta Nido daw miglised kay gayed tumenged hu maseleg ha kalamag. Namagyu gayed aman duun kay uminagi hu dibaluy hu pulù ta Creta ta hurà duun bagyu daw duminayun kay diyà ta atbang ta Salmon.

⁸ Migpakilid kay ba nalegenan kay gihapun hangtud en ha nakauma kay duun hu lugar ha tagngaranan hu Maayad ha Dungguanan ha ubay en hu banuwa ta Lasea.

⁹ Nayawat kay gayed hu malugayad ha panahun daw malegen en gayed sa pagdayun day tumenged ta tingbagyu haena. Aman migsambag si Pablo

¹⁰ hu kagi din, “Mga amigu, natun-an ku ha ku dumayun kuy malegen gayed sa maul-ulahan taw ta sa mga karga taw mangalaag daw bisan haini sa barku malened daw amin pa gayed kanuy namamatay.”

¹¹ Ba su kapitan hu sundalu hurà magpaliliman ki Pablo ba iyan din tinuuwan sa kapitan taena ha barku daw sa tag-iya duun.

¹² Sa dungguanan duun taena ha lugar kenà maayad ha tagtimaan ku madaet sa panahun. Aman sa kadakelà kandan agkabayà ngaay ha dumayun sidan diyà ta Fenice ha sakup ta Creta ta saena maayad ha dungguanan daw harì daan agkauma hu bagyu.

Sa Bagyu Diyà Ta Dagat

¹³ Su mahinay en sa kalamag nahenhenaan dan ha dumayun kay en diyà ta Fenice aman binutwà dan su angkla daw duminayun kay ba migpakilid kay duun taena ha pulù ta Creta.

¹⁴ Hurà kalugay naumahan kay hu mabis-ay gayed ha bagyu ha napuun ta gaun.

¹⁵ Su barku harì en gayed pakasèsè hu bagyu aman impatayà day en ku hindu duun uwita hu kalamag.

¹⁶ Dayun nakaubay kay ku atiyuay ha pulù ta Cauda daw mighinay daan sa kalamag, aman ingkarga dan haena sa bangkà ha tagguyuden taena ha barku ba nalegen-legenan gayed sidan.

¹⁷ Su makakarga en haena binanggetan dan su barku hu adagi ha pisì ta daw harì mabengkag. Impababà dan su layag taena ha barku ta daw mauwit haena hu kalamag ta agkahaldek sidan ku makasagyad sa barku diyà ta baybay ta nasud ta Libya.

¹⁸ Su maisab ha aldaw namis-ay dà paman sa bagyu aman impanlambeg dan sa mga karga diyà ta dagat.

¹⁹ Su ikatulu en ha aldaw iyan dan en paman impanlambeg sa mga galamiten taena ha barku.

²⁰ Tumenged hu pila en ha aldaw sa harì day en agkaahà sa siga hu aldaw daw sa mga bituen daw mabis-ay pa gayed sa bagyu ha duminasmag kanay hurà kay en maghinam ha malibri kay pa.

²¹ Duun taena nalugay en daan ha hurà sidan makakaen aman huminitindeg si Pablo daw ikagi, “Mga amigu, maayad pa ngaay ku migpaliliman kaw kanak ha harì kuy enà umawà diyà ta Creta ta harì kuy pa ngaay mayanaen.

²² Ba iman paniguru kaw daw harì kaw agkahaldek ta malened haini sa barku ba hurà matay kanuy.

²³ Ta ganina ha daleman sa Dios ha Magbabayà ku daw iyan tag-alagaran ku minikagi kanak pinaagi hu balinsuguen din

²⁴ ha tagyanaen, ‘Pablo, harì ka agkahaldek ta kinahanglan ha makapangatubang ka gayed ki Cesar, aman tumenged ikaw saini ha mga duma nu malibri daan.’

²⁵ Aman mga amigu, harì kaw agkasamuk ta agtuuwan ku gayed ha matuman sa inikagi kanak hu Dios.

²⁶ Mauwit kuy hu kalamag ba makasagyad kuy duun hu sabuwa ha pulù.”

²⁷ Ikaduwa en ha simana sa kauwit-uwita kanay hu kalamag diyà ta Dagat ta Mediteraneo. Su maliwarà en sa daleman taena pigtagnà-tagnà hu mga suluguen duun hu barku ha ubay kay en duun hu pulù.

²⁸ Aman sinukud dan sa kadalem taena ha wahig na kaluwaan pa ha depa. Duminayun sidan hu atiyuay daw sinukud dan en paman na sampulù dà daw lalima ha depa.

²⁹ Nahaldek sidan ku makasagyad haena sa barku duun hu batu aman linened dan sa haepat ha angkla diyà ta kahudiyanan ta ima dan ngaay ha agkaaldaw en.

³⁰ Agkabayà ngaay ag-awà su mga suluguen duun ku barku aman intuntun dan sa bangkà diyà ta unahan daw sibù kun daan ha agleneden dan su angkla diyà.

³¹ Ba inikagiyan hi Pablo sa mga sundalu daw su kapitan dan, “Ku awaan kuy iman taini ha mga suluguen hurà gayed malibri kanuy.”

³² Aman tinamped taena ha mga sundalu su hiket ku bangkà daw nangaanud haena.

^33-34 Su madani en agkaaldaw inikagiyan sidan hi Pablo, “Sampulù en daw haepat ha aldaw sa kasalang nuy hu pagkaen, aman kaen kaw en ta daw makabis-ay kaw ta hurà gayed mainu inyu.”

³⁵ Su maikagi en haena hi Pablo tuminimù hu supas daw ampui haena duun hu atubangan dan. Dayun pinangebing din haena daw kaen.

³⁶ Su maahà dan haena hiningan-an sidan dayun alan sidan namangaen.

³⁷ Sa kadakelen day duun taena ha barku 276.

³⁸ Su makakaen en sidan impanlambeg dan diyà ta dagat sa mga karga ha trigu ta daw humagkap sa barku.

Sa Pagkadaet Hu Barku

³⁹ Su maselem en harì dan agkakilala su pulù ha naubayan day. Ba naahà dan ha amin duun luuk ha malugayad sa pantad duun aman sa henà-henà dan ha mabaluy ha makadunggù sa barku duun.

⁴⁰ Pinanamped dan su pisì ha inhiket ku angkla daw inawaan dan haena. Hinukad dan daan su pisì ha imbangget taena ha bansalan ta daw magamit su bansalan hu pagwaling taena ha barku. Dayun intaud dan su layag diyà ta unahan ta daw mauwit haena hu kalamag diyà ta baybay.

⁴¹ Ba nakasagyad gayed su barku duun hu mababaw. Nakalebeng sa unahan din daw nagebà sa hudiyanan taena tumenged hu mabis-ay ha mga baled.

⁴² Nahenhenaan ku mga sundalu ha panhimatayan dan en sa mga prisu ta daw harì sidan makaawà.

⁴³ Ba agkabayaan ku kapitan ha malibri si Pablo aman hurà din itugut ha panhimatayan sidan. Migsugù haena ha sa pakatuen ag-anunung iyan umuna umagbul daw dumuun taena ha pulù,

⁴⁴ sa duma lumupug daan ba gumabay hu tabla daw hu bisan inu duun taena ha nagebà ha barku. Aman pinaagi taena alan kay nakauma duun hu baybay ha hurà nahitabù kanay.