Mga Buhat 23 - Lalang Hu Dios

¹ Pigtengtengan hi Pablo sa alan ha mga labaw ha agalen daw ikagi, “Mga suled, natun-an hu Dios ha sa henà-henà ku hurà gayed duun pagduwa-duwa mahitenged hu pagtuman ku hu insugù din.”

² Dayun si Ananias ha iyan tungkay labaw ha sinaligan hu paghalad migsugù taena ha taghitindeg diyà ta ubay hi Pablo ha dapien din sa bàbà hi Pablo.

³ Dayun inikagiyan haena hi Pablo, “Dapien ka daan hu Dios sa bà dà tagpasibù-sibù ha matareng. Iyan ka ngaay tagpinuu diyan hu paghukum kanak sumalà hu Kasuguan ba sinupak nu haini ta igpadapì a ikaw.”

⁴ Su mga etaw ha ubay diyà ki Pablo uminikagi, “Imbà nu tagtameyesa sa tungkay labaw ha sinaligan hu paghalad duun hu Dios?”

⁵ Tuminubag si Pablo, “Mga suled, hurà ku hayana kakilala ha iyan man diay tungkay labaw ha sinaligan hu paghalad, ta sa insulat ha lalang hu Dios tagyanaen, ‘Harì nu pagtameyesen sa agalen nu.’”

⁶ Tumenged ta natun-an hi Pablo ha sa duma kandan mga Saduceo daw sa duma mga Parisiyu minikagi haena hu madaging, “Mga suled, Parisiyu a daan daw bisan sa mga gin-apuan ku Parisiyu gayed. Sa hinengdan ha agbistigahen a iman iyan sa pagtuu ku ha sa mga namamatay en mabanhaw dà.”

⁷ Su maikagi din haena migsawalà sa mga Parisiyu daw sa mga Saduceo. Aman nabahin sidan

⁸ ta sa mga Saduceo harì agtuu ha amin ispiritu daw amin mga balinsuguen hu Dios daw mangabanhaw daan sa namamatay en, ba sa mga Parisiyu agtuu sidan taini.

⁹ Migpadasangà sidan hu pagsawalà dayun amin mga manunudlù hu Kasuguan ha mga sakup hu Parisiyu ha namanhitindeg daw paman-ikagi, “Hurà day naahà ha salà taini ha etaw. Madaet ba diay ku amin ispiritu daw ku balinsuguen hu Dios ha nakiglalang kandin?”

¹⁰ Bà dà tungkay mig-iseg sa pagsawalà dan aman sa labaw ha kapitan hu sundalu nahaldek ku paghihigbiten hu mga etaw si Pablo. Sinugù din sa mga sundalu ha agawen dan si Pablo duun taena ha mga etaw daw uwita diyà ta kampu.

¹¹ Su daleman en sa Ginuu migpaahà ki Pablo ha tagyanaen, “Pandayai sa gahinawa nu ta iling ha intultul nu sa mahitenged kanak dini ta Jerusalem itultul nu daan haini diyà ta Roma.”

Sa Lalang-lalang Hu Kahimatayi Ki Pablo

^12-13 Su maselem en amin subra ha kap-atan ha mga Judio ha miglalang-lalang hu kahimatayi ki Pablo daw nanumpà sidan ha harì gayed kumaen daw harì daan uminum ku harì dan mapatay si Pablo.

¹⁴ Aman duminuun sidan taena ha mga labaw ha sinaligan hu paghalad daw duun hu mga magulang ha tagyanaen, “Nanumpà kay en ha harì kay gayed kumaen ku harì day mapatay si Pablo.

¹⁵ Aman iman sinyu daw sa alan ha duma nuy ha mga labaw ha agalen hu mga Judio hangyuen nuy haena sa labaw ha kapitan hu sundalu ha ipauwit din diyan ta inyu si Pablo ta agpandayaan nuy kun haena agbistigahen. Andam kay en paghimatay kandin sa harì pa makauma diyan ta inyu.”

¹⁶ Ba saena ha lalang-lalang napaliman diay taena ha batà hu suled ha bahi hi Pablo aman duminiyà haena ta kampu daw tultuli si Pablo.

¹⁷ Dayun inumaw hi Pablo su sabuwa ha kapitan hu sundalu daw ikagiyi, “Dumaha haini sa malmalaki duun hu labaw ha agalen nuy ta amin din ag-ikagiyen.”

¹⁸ Aman inuwit haena duun ku labaw ha kap-itan hu sundalu. Inikagiyan din haena sa agalen din, “Si Pablo sa pinirisu huminangyù kanak ha dumahan ku haini sa malmalaki diyan ta ikaw ta amin din kun ag-ikagiyen.”

¹⁹ Inibitan ku labaw ha kapitan hu sundalu sa alima taena ha malmalaki daw migpadiyù sidan duun hu mga etaw daw insai, “Inu man sa ag-ikagiyen nu?”

²⁰ Uminikagi haena, “Sa mga labaw ha agalen hu mga Judio mig-uyun ha aghangyuen ka kandan ha ipauwit nu si Pablo diyà ta kandan ta agpandayaan dan kun agbistigahen.

²¹ Ba harì ka agtuu kandan ta amin subra ha kap-atan ha mga etaw ha tag-ayan kandin. Nanumpà sidan ha harì gayed kumaen daw harì daan uminum ku harì dan mapatay si Pablo. Iman tag-angat en sidan hu pag-uyun nu.”

²² Inikagiyan ku labaw ha kapitan hu sundalu su malmalaki, “Harì nu itultul duun hu bisan sin-u ha migsumbung ka dini ta kanak” dayun impaulì din haena.

Sa Kahat-una Ki Pablo Duun Hu Gubirnadur

²³ Impaumaw ku labaw ha kapitan hu sundalu sa daruwa ha sinaligan din ha mga kapitan daan hu sundalu daw ikagiyi sidan, “Andama nuy sa daruwa ha gatus ha mga sundalu ha igpahipanaw payanaen ta Cesarea ku harì pa kan maliwarà sa daleman. Daw dumaha daan sa kapituwan ha taglulan hu kabayu daw daruwa ha gatus ha tag-uwit hu bangkaw.

²⁴ Taganahi daan si Pablo hu kabayu ha aglulanan din daw ihat-un nuy haena diyà ki Felix ha gubirnadur. Bantayan nuy gayed ha hurà mahitabù kandin.”

²⁵ Dayun migsulat haena ha tagyanaen,

²⁶ “Iyan a si Claudio Lisias sa migsulat taini diyan ta ikaw sa Halangdun ha Gubirnadur Felix. Kamusta kad en.

²⁷ Taini sa etaw ha igpauwit ku dini ta ikaw ta dinakep hu mga Judio daw aghimatayan dan en ngaay. Ba su matun-an ku ha sakup diay haini ta Roma piglibri day hu mga sundalu ku.

²⁸ Agkabayà a ha matun-an ku ku inu sa hinengdan ha insumbung dan haini aman impabistiga ku hu mga labaw ha agalen dan.

²⁹ Dayun natun-an ku ha hurà din salà ha angayan ha prisuhen daw himatayan ta sa hinengdan ha insumbung dan iyan sa mahitenged hu Kasuguan dan.

³⁰ Su mapaliman ku ha miglalang-lalang sa mga Judio ha ag-ayanan dan haini ta aghimatayan dan sagunà ku impauwit dini ta ikaw daw inikagiyan ku daan sa migsumbung kandin ha umatubang sidan diyan ta ikaw.”

³¹ Duun taena ha daleman tinuman hu mga sundalu sa insugù kandan aman inuwit dan si Pablo diyà ta Antipatris.

³² Su maselem en sa mga sundalu ha namanhipanaw luminikù diyà ta kampu, ba su taglulan ku mga kabayu duminayun hu pagduma ki Pablo.

³³ Su makauma en sidan diyà ta Cesarea indawag dan su sulat duun ku gubirnadur daw intugyan dan daan si Pablo kandin.

³⁴ Su mabasa en ku gubirnadur su sulat nanginginsà ku hindu ha prubinsya nasakup si Pablo. Su umikagi si Pablo ha sakup ta Cilicia

³⁵ inikagiyan din haena, “Daw ku asem ikaw agbistigaha ku makauma en sa migsusumbung ikaw.” Dayun pinabantayan din si Pablo duun hu balay su anay hi Herodes.