Mga Buhat 16 - Lalang Hu Dios

Si Pablo, Si Silas Daw Si Timoteo

¹ Nakauma say Pablo diyà ta Derbe daw ta Listra. Amin diyà tuminuu ki Jesus ha tagngaranan ki Timoteo ha sa inay din tumutuu ha Judio ba sa amay din Griego.

² Sa alan ha mga tumutuu diyà ta Listra daw ta Iconio nakadayè ki Timoteo.

³ Tumenged ta agkabayaan haena hi Pablo agdumaha pigpasirkunsidahan din ta natun-an hu mga Judio diyà ha Griego sa amay din.

⁴ Duun hu mga banuwa ha agkangaagiyan dan intultul dan duun hu mga tumutuu sa angayan ha tumanen sumalà hu nauyunan hu mga apustulis daw hu mga agalen hu tumutuu diyà ta Jerusalem.

⁵ Tumenged taena nalig-enan sa mga tumutuu duun hu pagtuu dan daw migdakel sidan ta kada aldaw agkaisaban sidan sa mga tumutuu.

Sa Panan-awen Hi Pablo Diyà Ta Troas

⁶ Tumenged ta binaldeng say Pablo hu Balaan ha Ispiritu hu pagpanunultul hu lalang hu Dios diyà ta prubinsya ta Asia, duun sidan nakaagi hu mga banuwa ha sakup ta Frigia daw Galacia.

⁷ Su makauma sidan hu dulunà ta Misia agdayun en ngaay sidan diyà ta prubinsya ta Bitinia ba hurà sidan tuguti hu Ispiritu hi Jesus.

⁸ Aman diyà sidan mig-agi ta Misia payanaen ta Troas.

⁹ Su daleman en amin panan-awen hi Pablo saena etaw ha taga-Macedonia daw huminangyù diyà ta kandin ha tagyanaen, “Dini kaw ta Macedonia daw buligi kay.”

¹⁰ Su maahà hi Pablo haena nan-ahà kay dayun hu paagi ha makadiyà kay ta Macedonia ta natun-an day ha agsuguen kay hu Dios hu pagsangyaw hu Maayad ha Tultulanen duun hu mga etaw diyà.

Sa Pagpakatuu Hi Lidia Diyà Ta Filipos

¹¹ Diyà ta Troas luminulan kay hu barku payanaen ta Samotracia. Su maisab ha aldaw duminayun kay diyà ta Neapolis.

¹² Diyà bà kay dà huminipanaw payanaen ta Filipos sa sabuwa duun hu mga kinaadagiyan ha banuwa diyà ta Macedonia daw taga-Roma sa kadakelà ha mga etaw diyà. Migtimà kay diyà hu pila ha aldaw.

¹³ Su aldaw hu Sabadu guminuwà kay duun taena ha banuwa daw duminiyà kay ta kilid hu wahig ta nahenà-henà day ha diyà sa alampuanan hu mga Judio. Dayun mininuu kay diyà daw tultuli hu lalang hu Dios sa mga bahi ha tag-amul-amul diyà.

¹⁴ Sa sabuwa kandan iyan si Lidia ha diyà tagtimà ta Tiatira ha tagpamaligyà hu mahalen ha manggad. Saena masinimbahen hu Dios daw hinimu hu Dios ha dumawat hu tag-ikagiyen hi Pablo.

¹⁵ Aman binautismuwan haena duma hu pamilya din dayun huminangyù kanay ha tagyanaen, “Ku isipen nuy ha laus a ha tumutuu hu Ginuu diyà kaw magtimà ta balay ku.” Aman pineges kay gayed kandin.

Sa Pagkaprisu Hi Pablo Daw Hi Silas Diyà Ta Filipos

¹⁶ Amin panahun ha su tagduun kay hu alampuanan hu mga Judio nasal-aw day sa bahi ha ulipen ha tinaguan hu busaw aman tagpanagnà haena daw iyan igpakasalapì hu mga agalen din.

¹⁷ Saena miglupug-lupug kanay daw migkulahiay ha tagyanaen, “Saini ha mga etaw suluguen hu Dios ha Magbabayà hu alan daw tagpanunultul sidan hu paagi ha maluwas kaw.”

¹⁸ Pila gayed ha aldaw sa kabuhata din taena. Hurà makaantus si Pablo aman luminingì taena ha bahi daw ikagiyi su busaw, “Pinaagi hu ngaran hi Cristo Jesus agsuguen ku ikaw ha umawà ka diyan ta kandin.” Sagunà uminawà su busaw.

¹⁹ Ba su matun-an hu mga agalen din ha harì en sidan makasalapì pinaagi kandin dinakep dan si Pablo daw si Silas daw pangguyuda duun hu hukmanan.

²⁰ Su ipaatubang en si Pablo daw si Silas duun hu mga upisyal insumbung dan ha kagi dan, “Saini mga Judio ha mig-uwit hu kagubut dini ta banuwa taw

²¹ ta migtudlù sidan hu mga tulumanen ha supak hu balaud ta Roma aman sikuy sa mga taga-Roma harì taw madawat sa tigtudlù dan.”

²² Nangapauk daan sa kaet-etawan diyà dayun pinanlebasan si Pablo daw si Silas hu mga upisyal daw pabunali.

²³ Su mapengahan en sidan pagbunalai impaprisu dan sidan daw inikagiyan su bantay ha siguruwan din sidan bantayan.

²⁴ Aman intagù din sidan diyà ta taliwarà ta prisuwan daw ligpiti sa mga paa dan hu tinagedan ha kayu.

²⁵ Ba su maliwarà en sa daleman si Pablo daw si Silas mig-ampù daw migkanta hu pagdayè hu Dios, daw migpaliliman kandan sa duma dan ha mga prisu.

²⁶ Tigkan miglinug hu mabis-ay aman nahuyung su prisuwan. Sagunà napuwaan sa alan ha mga pultahan daw nangatangtang daan sa mga pusas hu mga prisu.

²⁷ Su mapukaw su bantay naahà din ha napuwaan en sa prisuwan, aman dinagtù din su ispada din ta agdughangen din en ngaay sa lawa din ta abi din ha nakaawà en sa mga prisu.

²⁸ Ba kinulahì hi Pablo ha tagyanaen, “Harì nu agdughanga sa lawa nu ta dini kay dà alan ta seled.”

²⁹ Su bantay nanayù hu sulù daw agpas diyà ta seled. Luminuhud haena ha taghugdunan duun hu atubangan hi Pablo daw hi Silas.

³⁰ Inuwit din sidan diyà ta guwà daw pan-insai, “Inu man sa buhaten ku ta daw maluwas a?”

³¹ Inikagiyan dan haena, “Tumuu ka ki Jesus ha Ginuu ta daw maluwas ka daw sa pamilya nu.”

³² Dayun tinultulan dan hu lalang hu Dios sa alan ha mga etaw diyà ta balay.

³³ Su liwarà pa sa daleman binulung taena ha bantay sa mga adul hi Pablo daw hi Silas. Pagkaiwas taena binautismuwan su bantay daw sa pamilya din.

³⁴ Dayun impaseled din diyà ta balay din su mga apustulis daw ipakaen sidan. Nalipay su bantay duma hu pamilya din ta nakatuu sidan hu Dios.

³⁵ Su maselem en migsugù sa mga upisyal hu sinaligan dan ha ipaguwà en diyà ta prisuwan si Pablo daw si Silas.

³⁶ Aman inikagiyan say Pablo hu bantay, “Sa mga upisyal migsugù ha ipaguwà kaw aman hipanaw kaw en ha malinawen.”

³⁷ Ba inikagiyan hi Pablo su mga sinaligan, “Sikay sa sakup ta Roma binunalan kay duun hu atubangan hu kaet-etawan daw prisuwa bisan ku hurà kay pa kabistiga ba iman tigkan kay paman igpaguwà. Sayana harì mabaluy ta kinahanglan ha su mga upisyal iyan dumini hu pagpaguwà kanay.”

³⁸ Tinultulan su mga upisyal ku sinaligan dan hu inikagi hi Pablo. Su mapaliman dan en ha si Pablo daw si Silas sakup diay ta Roma nangahaldek gayed sidan.

³⁹ Aman su mga upisyal duminiyà ta prisuhan daw panayù hu pasaylu. Dayun impaguwà sidan diyà ta prisuwan daw hangyua ha umawà en sidan duun taena ha banuwa.

⁴⁰ Duminiyà dayun si Pablo daw si Silas ta balay hi Lidia daw dasiga sa mga tumutuu ha naamul diyà, dayun huminipanaw sidan.