Impadayag 5 - Lalang Hu Dios

Sa Balasahen

¹ Su tagpinuu duun hu trunu naahà ku diyà ta kawanan ha alima din sa linulun ha balasahen ha sinulatan sa masigdibaluyà din daw amin daan duun pitu ha timaan ha impadeket ta daw harì mapuwaan.

² Amin daan gamhanan ha balinsuguen hu Dios ha minikagi hu madaging, “Sin-u sa angayan hu pag-awà taini ha timaan daw sin-u sa magbekal taini ha balasahen?”

³ Ba hurà gayed bul-ug angayan ha makabekal taena ha balasahen daw magbasa duun bisan diyà ta langit daw dini ta kalibutan daw diyà ta Kamatayan.

⁴ Nakaagalà a gayed ta hurà en bisan sabuwa ha angayan hu pagbekal taena ha balasahen daw magbasa duun.

⁵ Dayun inikagiyan a hu sabuwa duun taena ha mga magulang, “Harì ka tag-agalà ta sa Liyun ha iyan nabantug ha Kaliwat hi David daw Juda iyan nakadaeg ki Satanas. Aman amin din katenged hu pag-awà taena pitu ha timaan daw hu pagbekal taena ha balasahen.”

⁶ Dayun naahà ku sa Nati ha Karniru ha duun tagtiyadeg hu taliwarà taena ha trunu daw linibutan ku haepat ha tinanghagà daw ku mga magulang. Saini ha Karniru amin din mga palì ha bà su hinimatayan su anay. Sa sungay din pitu ha buuk daw pitu daan sa mata din ha iyan sa pitu ha paagi ha makapadayag sa pagkagamhanan hu Balaan ha Ispiritu ha sinugù hu Dios dini ta tibuuk ha kalibutan.

⁷ Sa Nati ha Karniru uminubay duun taena ha trunu daw timua su balasahen duun hu kawanan ha alima taena ha tagpinuu duun.

⁸ Su timuen din haena namanluhud daan su haepat ha tinanghagà su kaluwaan daw haepat ha mga magulang, duun hu atubangan taena ha Nati ha Karniru. Kada sabuwa kandan tagbalabad hu arpa daw yahung ha bulawan ha napunù hu insinsu ha tagsunugen ta iyan haini pag-ampù hu mga etaw hu Dios.

⁹ Migkanta daan sidan hu bag-u ha kalantahen ha tagyanaen, “Iyan ka dà gayed angayan hu pagtimù ku linulun ha balasahen daw pag-awà taena ha impadeket duun ha timaan ta hinimatayan ka daw pinaagi hu langesa nu binawì nu sa mga etaw para hu Dios. Saena ha mga etaw duun napuun hu migkalain-lain ha kaliwatan, mga nasud daw hu alan ha mga inikagiyan.

¹⁰ Nabuhat sidan ha tagharian nu daw mga sinaligan daan ha tag-alagad hu Dios daw ipagharì daan sidan diyà ta kalibutan.”

¹¹ Dayun uminahà a dà daw napaliman ku sa kanta hu mga balinsuguen hu Dios ha ben libu-libuwen en sa kadakelen dan. Saena sidan nakalibut duun taena ha trunu daw duun ku haepat ha tinanghagà daw ku mga magulang,

¹² tagkanta hu madaging gayed ha tagyanaen, “Su Nati ha Karniru ha hinimatayan angayan ha simbahen ta gamhanan gayed. Kandin sa alan bisan sa kaalam daw sa bis-ay aman tahuren daw dayeen taw.”

¹³ Daw napaliman ku daan sa alan ha tinanghagà diyà ta langit daw dini ta kalibutan, diyà ta Kamatayan daw ta dagat ha tagkanta ha tagyanaen, “Saena ha tagpinuu duun hu trunu daw sa Nati ha Karniru dayeen daw tahuren daan hu hinangturan tumenged ta iyan gayed sidan gamhanan.”

¹⁴ Su haepat ha tinanghagà tuminubag, “Matuman gayed haini” dayun saena ha mga magulang, namanluhud hu pagsimba.