Impadayag 21 - Lalang Hu Dios

Sa Bag-u Ha Jerusalem

¹ Naahà ku sa bag-u ha langit daw sa bag-u ha kalibutan ta sa nauna ha langit daw sa nauna ha kalibutan nahanaw en, daw hurà en daan dagat.

² Naahà ku daan sa balaan ha banuwa ha iyan sa Bag-u ha Jerusalem ha tagpakabulus ha napuun duun hu Dios daw tungkay gayed madagway iling hu ag-asawahen ha nabistiyan.

³ Daw napaliman ku sa madaging ha lageng ha napuun duun hu trunu ha tagyanaen, “Iman sa Dios umamul hu kaet-etawan. Mabuhat en sidan ha mga etaw din daw iyan en daan Dios dan.

⁴ Awaen hu Dios sa alan ha pakapaguul ta hurà en duun kamatayen, kalugul, pag-agalà daw kasakitan ta saena nangahanaw en.”

⁵ Dayun minikagi haena sa tagpinuu duun ku trunu, “Iman bag-uwen kud en sa alan.” Daw inikagiyan a daan kandin, “Isulat nu haini sa agkapaliman nu ta saini kamatuuran daw kasaligan gayed.

⁶ “Natuman en iman sa alan. Iyan a puunaan daw iyan a daan katapusan hu alan. Bisan sin-u sa agkalauwan igpainum ku duun ku tuburan ha tag-ila hu kinabuhì ha hurà din bayad.

⁷ Bisan sin-u sa makapildi hu madaet makaangken taena ha kinabuhì daw iyan a kandin Dios daw iyan en daan batà ku.

⁸ Ba saena ha agkahaldek hu pagsunud kanak daw sa kenà matinuuwen, sa mga pinakagalugayhà sa mga buhat dan daw sa mga talamunù, sa mga tagbuhat hu malaw-ay daw sa mga barangan, sa tagsimba duun hu mga diyus-diyus daw sa alan ha mga biduen, alan sidan iglambeg duun ku linaw ha tagkalegdeg ha asupri ha iyan en daan ikaduwa ha kamatayen.”

⁹ Dayun sa sabuwa duun ku pitu ha balinsuguen hu Dios ha tagbalabad hu yahung ha tinaguan hu mga alantusen inikagiyan a kandin, “Dini ka ta igpaahà ku ikaw sa tag-asawahen taena ha Nati ha Karniru.”

¹⁰ Pinaagi hu Balaan ha Ispiritu inuwit a ku balinsuguen duun ku matangkaw tungkay ha bubungan dayun impaahà din kanak sa Bag-u ha Jerusalem su balaan ha banuwa ha tagpakabulus ha napuun duun hu Dios.

¹¹ Tagpanggila-gila haena ta agkaanlagan hu Dios ha sa kasiga din iling hu mahalen ha batu ha haspi daw mating-aw iling hu salamin.

¹² Saena ha banuwa nalibut hu kutà ha tungkay matangkaw daw amin din sampulù daw daruwa ha pultahan ha duun daan tagbantay sa sampulù daw daruwa ha mga balinsuguen hu Dios. Duun taena ha mga pultahan nakasulat sa ngaran ku sampulù daw daruwa ha kaliwatan hi Israel.

¹³ Saena ha banuwa tigtatulu sa pultahan duun hu masigkakilid

¹⁴ daw saena ha kutà duun nakaluntud hu sampulù daw daruwa ha batu. Saena ha mga batu sinulatan daan hu mga ngaran ku sampulù daw daruwa ha apustulis taena ha Nati ha Karniru.

¹⁵ Su balinsuguen hu Dios ha tag-ikagi dini ta kanak tagbalabad daan hu sukud ha bulawan ta agsukuden din haena sa banuwa daw sa kutà din daw sa mga pultahan taena.

¹⁶ Sa kaluag daw sa kalugayad daw sa katangkaw taena 2,400 ha kilumitru.

¹⁷ Sinukud din daan sa kutà taena ha banuwa, sa katangkaw taena kaeneman ha mitrus sumalà hu kandin ha tigsukud.

¹⁸ Saena ha kutà binuhat hu batu ha haspi daw saena ha banuwa pulus daan bulawan ha mating-aw iling hu salamin.

¹⁹ Su mga batu ha linuntudan taena ha kutà tinukud daan hu mga batu ha hurà mag-iling sa kasiga din ha indayan-dayan duun. Sa una ha batu iyan sa haspi, sa ikaduwa sapiru, sa ikatulu kalsidoni, sa ikaepat ismiralda,

²⁰ sa ikalima sardonika, sa ikaenem kornalina, sa ikapitu krisolito, sa ikawalu birilo, sa ikasiyam topasyo, sa ikasampulù sopraso, sa ikasampulù daw sabuwa hasinto, daw sa ikasampulù daw daruwa amatista.

²¹ Su sampulù daw daruwa ha pultahan binuhat hu mga pirlas, sa kada sabuwa ha pultahan sabuwa daan ha pirlas. Sa dalan duun taena ha banuwa pulus dà gayed bulawan ha mating-aw iling hu salamin.

²² Hurà ku naahà duun ha Timplu ta sa Dios ha gamhanan daw Magbabayà hu alan daw sa Nati ha Karniru iyan en tagsimbahen duun.

²³ Hurà en daan kinahanglana sa aldaw daw sa bulan ta sa anlag hu Dios daw su Nati ha Karniru iyan en sulù ha pakailaw duun taena.

²⁴ Sa alan ha kaet-etawan mailawan hu anlag taena ha banuwa daw uwiten hu mga Harì hu alan ha nasud sa mga katigayunan dan duun taena.

²⁵ Saena ha mga pultahan din harì en tagsirahan ta hurà en diyà daleman.

²⁶ Sa mga mahalen ha mga butang daw sa katigayunan hu alan ha mga nasud maamul en duun.

²⁷ Ba hurà en gayed duun igpaseled ha mahugaw daw sa taghimu hu pinakagalugayhà daw sa limbungan ta iyan dà makaseled duun sa mga etaw ha nakasulat sa ngaran dan duun hu libru hu kinabuhì ha kandin ku Nati ha Karniru.