Impadayag 11 - Lalang Hu Dios

Sa Daruwa Ha Manunultul

¹ Inilahan a hu sukud ha agkailing hu sugkud daw inikagiyan, “Sukuda nu sa Timplu hu Dios daw sa halaran duun daw iyapa nu daan sa mga etaw ha tagsimba duun.

² Ba harì nu agsukuda sa lama taena ha Timplu ta intagana haena hu mga etaw ha kenà Judio. Agtakunaan dan sa balaan ha banuwa ta Jerusalem duun hu kap-atan daw daruwa ha bulan.

³ Agsuguen ku sa daruwa ha manunultul ha magpinaksuy hu saku daw magsaysay sidan hu igpaikagi kandan hu Dios duun hu 1,260 ha aldaw.”

⁴ Su daruwa ha manunultul agkailing hu daruwa ha kayu ha ulibu daw hu daruwa ha sulù ha nakaugsak duun taena ha atubangan hu Dios ha iyan Magbabayà ta kalibutan.

⁵ Ku amin agpasipala ngaay kandan aghiwal sa hapuy diyà ta bàbà dan ha iyan makapatay taena ha kuntra dan.

⁶ Iila daan kandan sa kagahem hu pagbaldeng hu udan ku panahun ha tagsaysay sidan hu igpaikagi kandan hu Dios. Amin dan kagahem ha sa wahig mahimu ha langesa daw pagsugù hu mga dumadagmalà hu bisan inu ha panahun ha mabayaan dan.

⁷ Ku makapenga sidan manunultul taena ha igpaikagi kandan hu Dios amin pinakahaluhaldek ha mananap ha humiwal duun ku bitu ha tungkay gayed madalem sabaen din daw himatayan haena sa daruwa ha nanunultul.

⁸ Sa mga lawa dan diyà dà mangakatayhad ta dalan taena ha nabantug ha banuwa ha duun daan inlansang hu krus sa Ginuu dan. Saena ha banuwa sampitan ta Sodoma daw ta Ehipto.

⁹ Sa mga etaw duun hu bisan hindu ha nasud daw mga kaliwatan daw hu migkalain-lain ha inikagiyan umahà taena ha nangakatayhad ha lawa duun hu tatulu ha aldaw daw tengà ba harì dan haena ilebeng.

¹⁰ Tungkay gayed malipay sa kaet-etawan duun taena ha panahun hu pagpatay ku daruwa ha migsaysay taena ha impaikagi kandan hu Dios aman agsaulugen dan haena daw tagpaila-ilahà sidan hu gasa ta su daruwa iyan nakaila kandan hu mga malegen ha alantusen.

¹¹ Ba su maiwas sa tatulu ha aldaw daw tengà binanhaw dà hu Dios su daruwa ha nanunultul. Su makahitindeg en sidan tungkay gayed nangahaldek sa alan ha nakaahà kandan.

¹² Dayun napaliman ku daruwa sa madaging ha lageng diyà ta langit ha tagyanaen, “Latun kaw en dini.” Su tag-ahà pa kandan sa mga kuntra dan nabatun sidan diyà ta langit ha nabungkusan hu gabun.

¹³ Sagunà miglinug hu mabis-ay tungkay daw nangadaet sa ikasampulù ha bahin hu mga balay duun taena ha banuwa. Pitu ha libu sa namamatay. Sa hurà patay duun taena tungkay gayed nahaldek aman dinayè dan sa pagkagamhanan hu Dios diyà ta langit.

¹⁴ Napengahan en sa ikaduwa duun hu pinakahaluhaldek ha hitabù ba laus en sa ikatulu.

Sa Ikapitu Ha Trumpita

¹⁵ Su ikapitu ha balinsuguen hu Dios mighiyup hu kandin ha trumpita. Napaliman ku sa mga madaging ha lageng diyà ta langit ha tagyanaen, “Sa kagahem hu pagharì duun hu kaet-etawan kandin dà hu Dios ha Magbabayà day daw kandin daan hu Misiyas ha pinilì din ha magharì hu hinangturan.”

¹⁶ Dayun su kaluwaan daw haepat ha mga magulang ha tagpinuu duun hu mga trunu dan duun taena ha atubangan hu Dios luminuhud hu pagsimba kandin

¹⁷ ha tagyanaen, “Sikaw sa Dios ha gamhanan daw Magbabayà hu alan ha duduun en su hurà pa tanghagaa sa bisan inu daw duduun pa iman, tagpasalamatan day ikaw hu pagpaahà nu hu gahem nu ta tagsugud kad en hu pagharì nu.

¹⁸ Sa kenà ikaw ha mga etaw tungkay gayed napauk ta nakauma diyà ta kandan sa pagsilut nu. Nakauma en sa panahun ha hukuman nu sa mga buhat hu mga minatay en daw balesan nu su mga suluguen nu ha mga prupita daw sa alan ha mga etaw nu ha tagtahud ikaw sa matangkaw daw sa minus sa kahimtang dan. Iyan en daan haini panahun ha silutan nu sa mga etaw ha migdaet ta kalibutan.”

¹⁹ Dayun napuwaan haena sa Timplu hu Dios diyà ta langit daw naahà diyà ta seled sa kahun ha tinaguan hu mga timaan taena ha daan ha kasabutan hu Dios daw hu mga etaw. Nasalasab sa kilat, migdaheneg sa lugung daw mga dagsang, miglinug hu mabis-ay daw uminudan hu mga giyaw.