Hebreo 8 - Lalang Hu Dios

Sa Bag-u Ha Kasabutan

¹ Sa kahulugan hu tag-ikagiyen day inyu iyan sa amin taw en iman tungkay labaw ha sinaligan hu paghalad ha duun tagpinuu hu kawanan hu Dios ha gamhanan diyà ta langit.

² Duun tag-alagad hu laus ha Tabirnakulu ha kenà binuhat hu etaw dà ba kandin gayed hu Dios.

³ Sa alan ha tungkay labaw ha sinaligan iyan tagsuguen hu paghalad aman iling daan ki Cristo Jesus ha kinahanglan amin din gayed ihalad.

⁴ Ku dini pa ngaay si Jesus ta kalibutan harì mabuhat ha sinaligan hu paghalad ta amin en mga sinaligan hu paghalad sumalà hu Kasuguan.

⁵ Ba sa tagbuhaten dan alung dà hu laus ha pagsimba diyà ta langit. Iyan haini hinengdan ha su magbuhat si Moises su anay hu Tabirnakulu inikagiyan haena hu Dios ha tagyanaen, “Ilingi nu gayed sa kabuhata taena ha impaahà ku ikaw diyà ta bubungan.”

⁶ Ba labaw pa gayed iman sa pagkasinaligan hi Cristo dì hu duma ha sinaligan hu paghalad ta sa bag-u ha kasabutan hu Dios daw hu kaet-etawan malig-en gayed ha mga saad dì ku daan.

⁷ Ku kenà pa ngaay kulang su daan na harì en ngaay ilisan pa hu bag-u.

⁸ Tumenged ta naahà hu Dios ha harì haena mabaluy hu etaw minikagi haena, “Makauma sa panahun ha buhaten ku sa bag-u ha kasabutan duun hu alan ha kaliwatan hi Juda sa batà hi Israel.

⁹ Saena ha bag-u ha kasabutan kenà iling hu daan ha binuhat ku duun hu mga gin-apuan dan su ipaawà ku sidan diyà ta Ehipto, ta saena sinupak dan aman binay-anan ku sidan.

¹⁰ Iyan haini bag-u ha kasabutan ha agbuhaten ku duun hu mga kaliwatan hi Israel. Iugsak ku sa mga sugù ku duun hu henà-henà dan daw tumanen dan haena dayun mabuhat a kandan ha Dios daw mga sakup ku daan sidan.

¹¹ Harì en magpatudluay pa mahitenged kanak ta alan en sidan makakilala kanak bisan sa tungkay minus sa kahimtang dan payanaen en duun hu kinatangkawan.

¹² Agpasayluwen ku sa mga madaet ha buhat dan daw aglipatan ku sa mga salà dan.”

¹³ Tumenged ta inikagi hu Dios ha amin bag-u ha kasabutan tagpasabut ha sa daan hurà din en pulus, daw natun-an taw ha sa hurà din en pulus agkahanaw dà.