Filipos 1 - Lalang Hu Dios

¹ Iyan a si Pablo sa migsulat taini duma ki Timoteo sa mga suluguen hi Cristo Jesus. Sinulatan day inyu sa mga etaw hu Dios pinaagi hu pagpakigsabuwa nuy ki Cristo Jesus diyan ta Filipos daw sa mga agalen nuy daw sa mga diyakunu.

² Sa Dios ha Amay taw daw si Cristo Jesus ha Ginuu mag-ila inyu hu grasya daw kalinaw.

Sa Pag-ampù Hi Pablo

^3-5 Tagpasalamat a duun hu Dios kada mahenà-henà ku inyu daw igkalipay ku gayed sa pag-ampù inyu tumenged hu pagbulig nuy kanak pagsangyaw hu Maayad ha Tultulanen sugud dà su makatuu kaw hangtud en iman.

⁶ Nasiguru ku gayed ha sa Dios ha iyan migsugud hu maayad duun hu mga henà-henà nuy su makatuu kaw dayunen din haena taman ha mapengahan duun hu aldaw ha lumikù si Cristo Jesus.

⁷ Angayan gayed ha palanggaen ku inyu alan ta nakabulig kaw hu impabuhat kanak hu Dios kenà duun dà hu pagkaprisu ba duun daan hu pagpangatarengan ku mahitenged hu Maayad ha Tultulanen ta daw mapamatud-an ha saini laus gayed.

⁸ Natun-an hu Dios ha agkabulung a gayed ta sa pagpalanggà ku inyu agkailing daan hu pagpalanggà inyu hi Cristo Jesus.

⁹ Aman iyan tig-ampù ku ha mag-iseg gayed sa pagpinalanggaay daw sa pagpakatuen hu kamatuuran daw sa kaalam nuy

¹⁰ ta daw matun-an nuy ku inu sa maayad ha agbuhaten dayun mahimpit kaw daw hurà makasaway inyu ku lumikù si Cristo

¹¹ ta mamunga kaw gayed hu matareng ha buhat pinaagi ki Cristo Jesus daw madayè gayed sa Dios.

Sa Pagdayè Ki Cristo Jesus

¹² Mga suled, agkabayaan ku gayed ha matun-an nuy ha sa nahitabù kanak nakabulig daan hu pagsangyaw hu Maayad ha Tultulanen

¹³ ta pinaagi taena sa alan ha mga sundalu ha tagbantay dini daw sa duma pa ha mga etaw natun-an dan ha naprisu a tumenged hu pagsunud ku ki Cristo.

¹⁴ Tumenged daan taena sa kadakelà ha mga suled taw duun hu pagtuu nadasig pagsalig hu Ginuu daw mig-iseg daan sa pagsangyaw dan hu lalang hu Dios ha hurà dan gayed kahaldek.

¹⁵ Sa duma kandan tagpanunultul mahitenged ki Cristo tumenged hu kasina daw hu pagpalabaw-labaw, ba amin daan duma ha tagtudlù pinaagi hu maayad gayed ha katuyuan.

¹⁶ Tagtudlù sidan tumenged hu pagpalanggà kanak ta natun-an dan ha pinilì a hu Dios paglaban hu Maayad ha Tultulanen.

¹⁷ Ba sa katuyuan taena ha tagpalabaw-labaw kenà laus ta agapan sidan hu pag-uswag daw sa henà-henà dan ha saena makaisab hu pag-antus ku dini ta prisuhan.

¹⁸ Ba bisan inu ha paagi, ku madaet sa katuyuan daw ku maayad ba, alan haena ikalipay ku ku matultul gayed sa mahitenged ki Cristo.

¹⁹ Iman agkabayà-bayà a daan ta natun-an ku ha pinaagi hu pag-ampù nuy daw pagbulig hu Balaan ha Ispiritu ha sinugù hi Cristo Jesus makaguwà a dà dini ta prisuhan.

²⁰ Iyan taghinamen ku ha harì a magayhaan ba pinaagi hu paniguru ku madayè gayed si Cristo dini ta kanak ku bubuhay a pa daw bisan daan ku matay ad.

²¹ Ta sa labaw duun hu kinabuhì ku iman iyan si Cristo na ku matay a daan saena makapaayad kanak.

^22-23 Ba ku duun hu pagkabubuhay ku makabuhat a hu mapuslanen harì ku agkatun-an ku inu sa pilien ku duun taini ha daruwa. Agkabayaan ku ngaay ha matay ad ta daw makaamul a diyà ki Cristo ta saini tungkay gayed maayad,

²⁴ ba kinahanglan daan ha harì a pa iman matay tumenged inyu.

²⁵ Saini nasiguru ku gayed ta daw mabuligan ku pa inyu ha mag-iseg sa kalig-en hu pagtuu nuy daw malipayen kaw daan duun

²⁶ daw pinaagi hu pag-amul ku inyu malipay kaw gayed duun hu pagpakigsabuwa nuy ki Cristo Jesus tumenged kanak.

²⁷ Ba kinahanglan ha sa pamatasan nuy angayan gayed hu Maayad ha Tultulanen mahitenged ki Cristo ta daw ku makadiyan a daw ku harì, mapaliman ku ha malig-en gayed sa pagtuu nuy ta nasabuwa kaw ha madasigen duun hu paglaban hu Maayad ha Tultulanen

²⁸ daw harì kaw gayed mahaldek hu agsupak inyu. Iyan haena timaan ha madaeg nuy sidan pinaagi hu Dios.

²⁹ Ta sa agkabayaan hu Dios kenà iyan dà sa pagtuu nuy ki Cristo ba mag-antus kaw daan tumenged kandin.

³⁰ Iman duma kaw duun hu pag-antus ha natun-an nuy ha naagiyan ku daw kamulu ku pa iman tag-antusa.