Efeso 6 - Lalang Hu Dios

Sa Salambagan Duun Hu Mga Laas Daw Hu Mga Batà

¹ Sinyu sa mga batà, magmatinumanen kaw hu mga laas nuy ta iyan haini hustu ha tagbuhaten hu mga tumutuu duun hu Ginuu.

² Sa nauna ha sugù hu Dios ha amin duun saad tagyanaen, “Tahura sa amay daw inay nu

³ ta daw mapanalanginan ku ikaw daw lumugayad sa kinabuhì nu dini ta kalibutan.”

⁴ Sinyu sa mga laas, harì nuy daan ag-ulit-ulita sa mga batà nuy ba kinahanglan tudluan daw baldenga sidan sumalà hu intudlù hu Dios.

Sa Salambagan Duun Hu Mga Agalen Daw Hu Mga Suluguen

⁵ Sinyu sa mga suluguen, magmatinumanen kaw hu mga agalen nuy pinaagi hu adagi ha pagtahud daw pagkamatinud-anen isip ha si Cristo iyan tagtumanen nuy.

^6-7 Saini kenà bà dà pagtuman ta daw maahà hu agalen nuy daw mabayà-bayà sidan, ba malipayen kaw hu pagbuhat hu agkabayaan hu Dios isip suluguen hi Cristo

⁸ ta natun-an nuy en ha sa alan ha maayad ha tagbuhaten hu etaw sa suluguen daw ku bisan sin-u agbalesan gayed hu Ginuu.

⁹ Sinyu sa mga agalen, iling daan taena pandayai gayed sa mga suluguen nuy. Harì sidan aghulgaa ta natun-an nuy ha sinyu daw sa mga suluguen amin nuy daan Agalen diyà ta langit ha hurà din igpalabi.

Sa Hinagiban Hu Tumutuu

¹⁰ Iman paniguruwan nuy gayed sa pagsalig hu Ginuu daw duun hu adagi ha gahem din.

¹¹ Gamita sa alan ha hinagiban ha insalig inyu hu Dios ta daw harì kaw madaeg hu limbung hi Satanas.

¹² Ta sa pakigsabà taw kenà etaw dà ba iyan gayed si Satanas daw sa mga ginsakupan din ha amin din kagahem diyà ta kawanangan daw dini ta kalibutan daw iyan daan agalen hu mga etaw ha duun hu kasukileman.

¹³ Aman tumenged taena gamita nuy gayed sa hinagiban ha insalig inyu hu Dios ta daw makasukul kaw ku makauma sa malegen ha panahun daw magmadaegen kaw gayed.

¹⁴ Iling hu mga sundalu kinahanglan ha mangandam kaw gayed. Ibakes nuy sa kamatuuran daw isul-ub nuy sa limbutung ha iyan sa pagkamatareng.

¹⁵ Isuup duun hu mga paa nuy sa pagpangandam hu pagsangyaw hu Maayad ha Tultulanen ha iyan tag-uwit hu kalinaw.

¹⁶ Ibiti nuy daan sa kalasag ha iyan sa pagsalig nuy ki Cristo ta pinaagi taena harì kaw masugat hu tagkalegdeg ha panà hi Satanas.

¹⁷ Saligi nuy daan sa in-ila inyu hu Dios ha kaluwasan ta iling haena hu kalù ha puthaw, daw gamita nuy gayed sa lalang hu Dios ha iyan ispada nuy ha in-ila hu Balaan ha Ispiritu.

¹⁸ Duun hu bisan inu ha panahun mag-ampù kaw pinaagi hu Balaan ha Ispiritu daw hangyua nuy sa bulig hu Dios. Magpangandam kaw gayed daw harì kaw umendà hu pag-ampù mahitenged hu alan ha tumutuu.

¹⁹ Ampui a daan inyu ha buligan a hu Dios ta daw harì a mahaldek pagsangyaw hu Maayad ha Tultulanen ha inlilung su anay.

²⁰ Tumenged ta sinaligan a hu Dios pagsangyaw taena naprisu a iman. Aman ampui a inyu ha amin gayed gahem hu pagpanunultul ku.

Sa Pagpangamusta

²¹ Si Tiquico sa palangga taw ha suled daw matinumanen ha suluguen hu Ginuu iyan en manunultul inyu mahitenged hu agkaula-ula ku dini ta daw matun-an nuy ku agkainu-inu ad iman.

²² Sinugù ku haini diyan ta inyu ta daw matun-an nuy sa agkaula-ula day iman daw madasig kaw daan kandin.

²³ Sa Dios ha Amay taw daw si Cristo Jesus ha Ginuu mag-ila inyu hu kalinaw daw mag-iseg sa pagpinalanggaay daw sa pagtuu nuy.

²⁴ Sinyu sa mga suled ha hurà gayed kabalhin sa pagpalanggà nuy ki Cristo Jesus ha Ginuu taw, panalanginan kaw alan hu Dios.