Efeso 5 - Lalang Hu Dios

Sa Kapawà Daw Sa Kasukileman

¹ Tumenged ta mga batà kaw hu Dios ha pinalanggà din ilingan nuy

² daw magpinalanggaay kaw gayed iling ha si Cristo pinalanggà kuy kandin daw migpakamatay para kanuy na sa kamatayen din iling hu mahumut ha inhalad duun hu Dios.

³ Tumenged ta mga etaw kaw hu Dios kinahanglan ha harì kaw gayed magbuhat hu malaw-ay daw bisan inu en ha mahugaw daw pagkaagapan.

⁴ Harì kaw daan mag-ikagi hu mga malaw-ay daw mga binuang ha lalang ta kenà haini angayan ha tagbuhaten hu mga tumutuu, ba sa buhaten nuy iyan gayed sa pagpasalamat duun hu Dios.

⁵ Siguru gayed ha sa tagbuhat hu mga malaw-ay daw mahugaw daw sa agapan hu mga butang dini ta kalibutan ha bà su agkabuhat en ha diyus dan, saena ha etaw hurà din gayed mapanunud duun hu gingharian hi Cristo daw hu Dios.

⁶ Harì kaw gayed magpalimbung hu bisan sin-u pinaagi hu mga lalang dan ha hurà din pulus ta tumenged taena ha mga madaet ha buhat agsilutan hu Dios sa etaw ha agpakasupak kandin.

⁷ Aman harì kaw maglabet-labet kandan.

⁸ Su anay duun kaw pa hu kasukileman ba iman duun kaw en hu kapawaan pinaagi hu pagpakigsabuwa nuy hu Ginuu. Tumenged taena kinahanglan ha sa pamatasan nuy angayan gayed duun hu kapawaan

⁹ ta sa tagbuhaten hu etaw ha duun taghipanaw hu mapawà maayad daw matareng gayed sumalà hu kamatuuran.

¹⁰ Paniguruwi ku inu sa igkabayà-bayà hu Ginuu.

¹¹ Harì kaw maglabet-labet duun hu hurà din pulus ha mga buhat hu mga etaw ha duun pa hu kasukileman ba ipaahà nuy sa maayad ha buhat ta daw maahà ha madaet sa kandan ha buhat,

¹² ta pinakagalugayhà gayed ha tagsubayen haena sa tagbuhaten dan duun hu kasukileman.

^13-14 Ba sa kapawà iyan makailaw hu alan. Ta amin lalang hu Dios ha tagyanaen, “Pukaw kaw en sa tagtiduga daw bangun kaw en sa minatay ta daw mailawan kaw hi Cristo.”

¹⁵ Mag-andam kaw hu pamatasan nuy daw magmasinabuten kaw kenà iling hu mga buang-buang.

¹⁶ Ku amin higayun ha makabuhat kaw hu maayad buhata nuy ta iman ha panahun tag-iseg en sa mga madaet.

¹⁷ Harì kaw magbuhat hu hurà din pulus ba sabuten nuy ku inu sa agkabayaan hu Dios ha buhaten nuy.

¹⁸ Harì kaw tagpasibeleng ta sa mapayanan-an taena makadaet inyu. Ba kinahanglan ha maulinan kaw hu Balaan ha Ispiritu.

¹⁹ Magdinasigay kaw pinaagi hu mga Salmo daw hu duma ha mga kanta ha pakadayè hu Dios. Magmalipayen kaw gayed hu pagbuhat taini isip ha iyan sa Ginuu tagkantahan nuy.

²⁰ Sigi kaw magpasalamat duun hu Dios ha Amay taw mahitenged hu alan ha mga agkaul-ulahan nuy tumenged ta mga sumusunud kaw ki Cristo Jesus ha Ginuu taw.

²¹ Magmatinumanen kaw duun hu kada sabuwa inyu tumenged hu pagtahud nuy ki Cristo.

Sa Salambagan Duun Hu Mig-asawa

²² Sinyu sa mga igbahi, magmatinumanen kaw duun hu mga igmaama nuy isip ha iyan sa Ginuu tagtumanen nuy.

²³ Ta sa igmaama iyan gayed tagbayà hu igbahi din iling ha si Cristo iyan ulu daw sa alan ha mga tumutuu lawa din, daw si Cristo iyan daan Manluluwas dan.

²⁴ Iling daan ha sa mga tumutuu matinumanen ki Cristo Jesus kinahanglan ha sa mga igbahi magmatinumanen duun hu igmaama dan.

²⁵ Sinyu sa mga igmaama, palanggaen nuy gayed sa mga igbahi nuy iling ha sikuy sa mga tumutuu pinalanggà kuy daan hi Cristo daw migpakamatay para kanuy

²⁶ ta daw mabuhat kuy kandin ha mga etaw hu Dios ta nalimpyuwan kuy kandin pinaagi hu wahig daw hu lalang din.

²⁷ Binuhat din haena ta daw mabayà-bayaan kuy kandin tumenged ta hurà en ikasaway kanuy daw hurà en mahugaw dini ta kanuy.

²⁸ Iling daan taena kinahanglan ha sa igmaama palanggaen din gayed sa igbahi din iling hu pagpalanggà din hu kaugalingen din. Sa igmaama ha tagpalanggà hu igbahi din palanggà din daan sa kandin ha kaugalingen.

²⁹ Ta hurà gayed etaw ha harì din tagtanulen sa kaugalingen din ba ag-alimahan din gayed haena daw igpakaen din daan. Iling taena si Cristo ha alimahan din daan sa alan ha mga tumutuu

³⁰ ta iyan kuy mga bahin hu lawa din.

³¹ Sa lalang hu Dios tagyanaen, “Iyan haini hinengdan ha ag-awaan hu maama sa mga laas din daw duun en ag-amul hu igbahi din ta nasabuwa en sidan sa daruwa ha etaw.”

³² Iyan haini kamatuuran ha impadayag kanuy. Sa kanak ha tagsubayen iyan sa pagkasabuwa hi Cristo daw hu mga tumutuu.

³³ Ba tagpasabut daan haini mahitenged hu mig-asawa, aman kinahanglan gayed ha sa igmaama palanggaen din sa igbahi din iling hu pagpalanggà hu kaugalingen din, daw sa igbahi kinahanglan tumahud gayed hu igmaama din.