2 Timoteo 4 - Lalang Hu Dios

¹ Duun hu atubangan hu Dios daw hi Cristo Jesus ha iyan maghukum hu mga minatay en daw mga bubuhay pa daw tumenged ta aglikù si Jesus hu pagharì, ikagiyen ku ikaw

² isangyaw sa lalang hu Dios daw andam ka gayed pagbuhat taena bisan inu ha panahun. Sambagi haena sa agkasayep daw baldenga daan sa tagbuhat hu madaet. Dasiga sidan pinaagi hu pagpailub nu daw hu hustu ha pagtudlù.

³ Ta makauma sa panahun ha sa mga etaw tumambag magpaliliman hu kamatuuran ba magpatudlù sidan hu lain ha manunudlù sumalà hu agkabayaan dan agpalilimani.

⁴ Harì en gayed sidan magpaliliman hu kamatuuran ta iyan dan gayed sunuren sa bidù ha mga tultulanen.

⁵ Ba sikaw magpugung ka gayed hu kaugalingen nu daw dawata sa mga alantusen, dayuna daan sa pagsangyaw hu Maayad ha Tultulanen daw tumana sa katengdanan nu ha in-ila ikaw hu Dios.

⁶ Siak iman iling a hu ighalad ha inluntud en duun hu halaran ta sa kamatayen ku na ubay en.

⁷ Dinawat ku sa alan ha mga alantusen isip buutan ha sundalu hi Cristo Jesus, nauma kud sa daeganan daw tagpadayun a iman hu pagtuu.

⁸ Aman intagana en sa bales ha ig-ila kanak hu Ginuu sa matareng ha Maghuhukum duun asem taena ha aldaw tumenged hu mga matareng ha binuhat ku. Daw kenà a iyan dà makadawat taena ta lagkes en daan sa alan ha tagsalap hu paglikù din.

Sa Sugù Ki Timoteo

⁹ Timoteo, agpas ka dini ta kanak.

¹⁰ Ta inawaan a hi Demas tumenged ta babayaen taena sa kalibutanen ha mga butang aman duminiyà en ta Tesalonica. Si Crescente duminiyà ta prubinsya ta Galacia daw si Tito duminiyà daan ta Dalmacia.

¹¹ Iyan dà iman dini ta kanak si Lucas. Aman dumaha nu dini si Marcos ta mapuslanen haena hu pagbulig kanak.

¹² Impadiyan ku si Tiquico ta Efeso.

¹³ Asem ku dumini ka uwita nu su makepal ha pinaksuy ha nakabilin ku diyà ta balay hi Carpo ta Troas, daw uwita daan dini su mga libru labi en sa mga sinulat ku.

¹⁴ Si Alejandro sa mananalsal pinasipalahan a gayed kandin ba iyan en sa Dios magbales taena ha binuhat din.

¹⁵ Bantayi nu haena ta sinupak din gayed sa mga intudlù ta.

¹⁶ Su anay ha mangatubang a duun hu hukmanan hurà gayed luminaban ta alan en sidan uminawà dini ta kanak. Ba in-ampù ku duun hu Dios ha pasayluwen din sidan.

¹⁷ Bisan pa ku inawaan a kandan ba sa Dios iyan migbulig daw mig-ila kanak hu bis-ay hu pagsangyaw hu Maayad ha Tultulanen ta daw makapaliman sa kenà mga Judio. Duun taena aghimatayan ad gayed ngaay kandan ba binuligan a gihapun hu Dios.

¹⁸ Aman bisan inu sa maul-ulahan ku ba sa Dios iyan taglibri kanak hangtud ha uwiten a kandin duun hu tagharian din diyà ta langit. Dayeen gayed sa Dios hu hinangturan.

¹⁹ Ipangamusta a ikaw ki Priscila, Aquila daw duun hu pamilya hi Onesiforo.

²⁰ Si Erasto diyà dà ta Corinto. Si Trofimo agkadaluwan aman intabun ku diyà ta Mileto.

²¹ Agpas ka gayed dini ha harì pa lumendeng. Agpangamusta ikaw si Eubulo, Pudente, si Lino, Claudia daw sa alan ha mga suled ta ha tumutuu dini.

²² Panalanginan ka gayed hu Ginuu.