1 Timoteo 3 - Lalang Hu Dios

Sa Agalen Hu Mga Tumutuu

¹ Saini ha mga lalang kasaligan gayed. Ku amin etaw ha agkabayà mabuhat ha agalen hu mga tumutuu saena ha agkabayaan din maayad gayed.

² Ba kinahanglan ha hurà ikasaway kandin daw sabuwa dà sa igbahi din, tagpugung gayed hu kaugalingen daw matinahuren, maalima hu mga langyaw daw matatau gayed hu pagtudlù,

³ kenà palainum hu binu, kenà mapasipalahen, kenà palasabà daw kenà din babayaen sa salapì. Ba kinahanglan ha maluluy-en

⁴ daw maayad daan mag-uwit hu pamilya din na sa mga batà din daan matinumanen daw matinahuren kandin,

⁵ ta ku harì din agkauwit sa pamilya din iyan pa kan mauwit din sa tagkaamul-amul ha mga tumutuu.

⁶ Kinahanglan saena kenà bag-u pa ha tumutuu ta kan ku bà dà ipasigalbu sa katengdanan din aman silutan haena hu Dios iling hu kasiluti ki Satanas.

⁷ Kinahanglan saena matahuran daan hu kenà pa mga tumutuu ta daw harì makabuhat hu mga salawayen na mahulug paman duun hu lit-ag hi Satanas.

Sa Magbubulig Hu Mga Tumutuu

⁸ Iling daan sa mga diyakunu ha iyan magbubulig hu mga tumutuu kinahanglan angayan sidan tahuran daw matinud-anen, kenà palainum hu binu daw harì tag-agpas ha magsapian.

⁹ Kinahanglan mangeseg gayed sidan duun hu kamatuuran ha impadayag dini ta kanuy daw hurà daan salà duun hu henà-henà dan.

¹⁰ Kinahanglan daan sulayen enà sa kinaiya dan daw ku masusi ha hurà gayed makasaway kandan human sidan pilia ha diyakunu.

¹¹ Iling daan sa mga igbahi hu mga diyakunu kinahanglan ha angayan sidan tahuran daw harì tagpandaet hu dengeg, ba magpugung sidan hu kaugalingen dan daw agkasaligan gayed hu bisan inu.

¹² Sa diyakunu kinahanglan gayed ha sabuwa dà sa igbahi din daw maayad daan mag-uwit hu pamilya.

¹³ Sa diyakunu ha maayad magbuhat hu katengdanan din matahuran gayed daw harì mahaldek hu pagpanunultul mahitenged hu pagtuu din ki Cristo Jesus.

Sa Kamatuuran Mahitenged Ki Cristo Jesus

¹⁴ Ima ku ha laus a dà makadiyan, ba insulat kud haini sa mga panugun ta daw

¹⁵ ku mayawat a hu pagdiyan matun-an nud en ku inu sa maayad ku mag-amul-amul kaw pagsimba hu Dios. Ta sikuy sa mga tumutuu pamilya hu Dios ha bubuhay daw mga tukud kuy daan ha duun sa kamatuuran.

¹⁶ Laus gayed ha labaw pa hu alan sa kamatuuran ha impadayag dini ta kanuy daw iyan tagtuuwan taw. Si Cristo Jesus migpakaetaw daw saini pigtistigusan hu Balaan ha Ispiritu ha matareng. Nakilala daan hu mga balinsuguen hu Dios daw luminigtu diyà ta langit hu pagharì. Intultul daan duun hu alan ha kaet-etawan daw tinuuwan dini ta tibuuk kalibutan.