1 Timoteo 2 - Lalang Hu Dios

Sa Pagsimba Hu Mga Tumutuu

¹ Iman una hu alan aghangyuen ku inyu ha mag-ampù ha buligan kaw hu Dios daw magpasalamat daan kandin mahitenged hu alan ha mga etaw daw i-ampu nuy ha buligan din daan sidan.

² I-ampu taw daan sa mga harì daw sa panggubirnuhan ta daw maangken taw sa kalinaw duun hu pagtimà daw harì maelangan sa pagsimba taw hu Dios daw sa pagbuhat hu matareng.

³ Saena maayad gayed daw iyan pakapalipay hu Dios ha Manluluwas taw

⁴ ta iyan gayed agkabayaan din ha sa alan ha mga etaw makatuen hu kamatuuran daw maluwas daan.

⁵ Sabuwa dà sa Dios daw sabuwa dà daan sa taghusay hu etaw duun hu Dios, saena iyan si Cristo Jesus sa migpakaetaw

⁶ daw migpakamatay ta daw mabawì kuy kandin. Pinaagi taena su mauma sa natugun ha panahun nakapadayag din ha sa tuyù hu Dios iyan sa pagluwas hu kaet-etawan.

⁷ Iyan haini hinengdan ha pinilì a kandin ha apustul duun hu kenà mga Judio ta daw makatuu sidan pinaagi hu pagsangyaw daw pagpanudlù ku hu kamatuuran. Laus gayed haini sa inikagi ku.

⁸ Sa agkabayaan ku iyan sa bisan hindu tag-amul-amul sa mga tumutuu iyan gayed sa mga maama mag-ampù, ba kinahanglan ha mahimpit gayed sidan, hurà kapauk daw pagduwa-duwa duun hu henà-henà dan.

⁹ Agkabayaan ku daan ha sa mga bahi tumtumanan dà sa pagpinaksuy dan daw kenà malaw-ay harì ipaglabay sa dayan-dayan ta buhuk daw ta lawa dan pinaagi hu mga bulawan daw mga pirlas daw mahalen tungkay ha pinaksuy,

¹⁰ ta sa maayad ha dayan-dayan iyan gayed sa maayad ha mga buhat. Iyan haini hustu ha buhat hu bahi ha tag-ikagi ha tagsimba hu Dios.

¹¹ Kinahanglan daan sa mga bahi magpaliliman gayed daw magmatinumanen hu agalen dan.

¹² Harì ku igtugut sa bahi ha magtudlù daw mangagalen hu maama ta kinahanglan sa mga bahi bà dà magpaliliman duun hu tagkaamul-amul ha mga tumutuu.

¹³ Ta su tanghagaen hu Dios sa etaw iyan din inuna binuhat si Adan sa maama daw human sa bahi ha iyan si Eva.

¹⁴ Sa bahi iyan una linimbungan hi Satanas daw iyan daan una ha nabuhat ha makasasalà.

¹⁵ Aman sa insilut hu bahi iyan sa masakit-sakitan gayed ku magbatà. Ba luwasen gihapun sidan hu Dios ku harì sidan umendà hu pagtuu, palanggaen sa mga duma dan daw himpit sa panghenà-henà dan pinaagi hu pagpugung hu kaugalingen dan.