Yohana 9 - Bibiliya mu Kirundi coroshe

Yesu akiza umuntu yavutse ari impumyi

¹ Yesu ariko ararengana, abona umuntu yavutse ari impumyi.

² Abigishwa biwe baramubaza bati: “Mwigisha, ni nde yacumuye bigatuma uwu muntu avuka ari impumyi: mbega ni we canke ni abavyeyi biwe?”

³ Yesu arabishura ati: “Ntivyavuye ku vyaha vyiwe canke ku vy’abavyeyi biwe, ariko ibi vyabaye kugira ngo ubushobozi bw’Imana bwiyerekanire muri we.

⁴ Dutegerezwa gukora ibikorwa vy’uwantumye hakibona. Ijoro riraje, aho ata wushobora gukora.

⁵ Nkiri mw’isi, ndi umuco w’isi.”

⁶ Ahejeje kuvuga ayo majambo, acira amate hasi, avuruga utwondo akoresheje ayo mate; adusiga ku maso ya wa muntu.

⁷ Aramubwira ati: “Genda wiyuhagire ku kidengeri c’i Silowamu” (Silowamu bisigura “Uwatumwe”). Wa muntu aragenda ariyuhagira, agaruka abona.

⁸ Ababanyi biwe n’abari bamuzi ari impumyi isegerereza barabaza bati: “Mbega uwu si wa muntu yahora yicara asegerereza?”

⁹ Bamwe baravuga bati: “Ni we.” Ariko abandi baravuga bati: “Oya, ni uwo basa.” Ariko wa muntu arababwira ati: “Ni jewe!”

¹⁰ Baramubaza bati: “None vyagenze gute ngo amaso yawe ahumuke?”

¹¹ Arabishura ati: “Umuntu bita Yesu ni we yavuruze utwondo atunsiga ku maso, hanyuma ambwira ati: ‘Genda wiyuhagire ku kidengeri c’i Silowamu.’ Naciye njayo ndiyuhagira, none ndabona.”

¹² Baramubaza bati: “None uwo muntu ari he?” Arababwira ati: “Sindahazi.”

Abafarisayo batohoza ivy’ukwo gukira

¹³ Nuko bajana wa muntu yahoze ari impunyi imbere y’Abafarisayo,

¹⁴ kuko Yesu yari yavuruze utwondo, agakiza iyo mpumyi ku musi w’Isabato.

¹⁵ Abafarisayo na bo babaza wa muntu ingene yahumutse, na we abishura ati: “Yansize utwondo ku maso, nca ndiyuhagira, none ndabona.”

¹⁶ Bamwe mu Bafarisayo baravuga bati: “Uwu muntu yakoze ibi ntava ku Mana, kuko ntiyubahiriza umusi w’Isabato.” Ariko abandi barabaza bati: “None umunyavyaha yoshobora gukora ibitangaza nk’ibi?” Maze ivyo bituma bacanamwo.

¹⁷ Nuko basubira kubaza umwe yahoze ari impumyi bati: “None wewe wibaza iki kuri uwo muntu yagukijije ubuhumyi?” Wa muntu arabishura ati: “Ni uwuvugishwa n’Imana.”

¹⁸ Abakuru b’Abayuda baranse kwemera ko yahora ari impumyi none akaba yakize, kugeza batumyeko abavyeyi biwe.

¹⁹ Bashitse, barababaza bati: “Uwu yoba ari umuhungu wanyu? Yoba yavutse ari impumyi? None habaye iki ko abona?”

²⁰ Abavyeyi biwe barabishura bati: “Ico tuzi, ni umwana wacu kandi yavutse ari impunyi.

²¹ Ariko ntituzi uko vyagenze ngo ahumuke kandi ntituzi uwamukijije. Nimumwibarize arakuze, arashobora kwivugira.”

²² Abavyeyi biwe bishuye uko kuko batinya abakuru b’Abayuda. Abo bakuru bari bafashe ingingo ko umuntu wese azovuga ko Yesu ari Kristo azokwirukanwa mu rusengero.

²³ Ni co gituma bavuze bati: “Nimumwibarize, arakuze.”

²⁴ Basubira gutumako wa muntu yahora ari impumyi ubugira kabiri, baramubwira bati: “Ubaha Imana, utubwire ukuri, kuko turazi ko urya muntu yagukijije ari umunyavyaha.”

²⁵ Arabishura ati: “Aba umunyavyaha, ataba we, ivyo nta co ndabiziko. Ico nzi ni uko nahora ndi impumyi ariko ubu nkaba mbona.”

²⁶ Baramubaza bati: “None yakoze iki? Yaguhumuye gute?”

²⁷ Arabishura ati: “Ivyo namaze kubibabwira ariko ntimwashatse kuvyumva. Ni kuki mushaka kuvyumva kandi? Mwoba mushaka kuba abigishwa biwe namwe?”

²⁸ Baca baramutuka, bamubwira bati: “Ni wewe uri umwigishwa wiwe, twebwe turi abigishwa ba Mose!

²⁹ Turazi ko Imana yavuganye na Mose, ariko ntituzi iyo uwo muntu yaje ava.”

³⁰ Wa muntu yahoze ari impumyi arabishura ati: “Ivyo biratangaje cane! Ntimuzi iyo yaje ava, kandi yampumuye?

³¹ Turazi ko Imana itumva ugusenga kw’abanyavyaha, ariko ko yumva ugusenga kw’umuntu ayubaha agakora ivyo ishaka.

³² Nta muntu n’umwe yari bwumve aho umuntu yakijije uwavutse ari impumyi.

³³ Iyo uwo muntu ataba yaje ava ku Mana, nta co yari gushobora gukora.”

³⁴ Baramwishura bati: “Wewe wavukiye mu vyaha wongera ubikuriramwo, none uriko uratwigisha!” Nuko baca baramwirukana mu rusengero.

Ubuhumyi bwo mu buryo bw’impwemu

³⁵ Yesu yumvise ko bamwirukanye mu rusengero, aja kumurondera, aramubwira ati: “Mbega urizera Umwana w’Umuntu?”

³⁶ Wa muntu aramubaza ati: “Yoba ari nde ga nyakwubahwa, kugira ngo ndamwizere?”

³⁷ Yesu aramubwira ati: “Wamaze kumubona kuko ni we muriko muravugana.”

³⁸ Wa muntu aravuga ati: “Mwami, ndizeye.” Nuko aca aramwunamira.

³⁹ Yesu aca aravuga ati: “Naje muri iyi si guca urubanza, kugira ngo impumyi zihumuke, maze abibaza ko babona na bo ndabereke ko ari impumyi.”

⁴⁰ Bamwe mu Bafarisayo bari kumwe na we, bumvise ayo majambo, baramubaza bati: “Ushaka kuvuga ko natwe turi impumyi?”

⁴¹ Yesu arabishura ati: “Iyo muba impumyi, ntimwokwagiriwe n’icaha, ariko ko mwemeza ko mubona, icaha canyu kigumaho.”