Yohana 6 - Bibiliya mu Kirundi coroshe

Yesu agaburira abantu ibihumbi bitanu

¹ Hanyuma y’ivyo, Yesu arajabuka aja ku ruhande rwo hakurya y’ikiyaga c’i Galilaya (ari co kiyaga c’i Tiberiya).

² Abantu isinzi baramukurikira kuko bari babonye ibitangaza yari yakoze mu gukiza abarwaye.

³ Nuko Yesu aduga ku musozi yicarana n’abigishwa biwe.

⁴ Ico gihe Umusi mukuru wa Pasika w’Abayuda wari wegereje.

⁵ Yesu abonye abantu isinzi baje bamugana, abarira Filipo ati: “Ni hehe twogurira ivyokurya vyo kugaburira aba bantu bose?”

⁶ Yabajije ico kibazo nk’uwumugeza, kuko we yari azi ico agiye gukora.

⁷ Filipo aramwishura ati: “Naho tworonka idenariyo amajana abiri, ntitwokuramwo ivyokurya bikwiye n’umutamiro w’umwe umwe.”

⁸ Umwe mu bigishwa biwe yitwa Andereya, yavukana na Simoni Petero, abwira Yesu ati:

⁹ “Hano hariho umuhungu afise imikate y’ingano itanu n’ifi zibiri. Ariko vyomara iki ku bantu bangana uku?”

¹⁰ Yesu aravuga ati: “Nimubicarike.” Aho hantu hari ubwatsi bwinshi. Nuko ba bantu baricara (abagabo bonyene bashika ibihumbi bitanu).

¹¹ Yesu afata ya mikate, ayishimira Imana, ayiha abari bicaye aho. Na za fi azigenza uko. Abantu bararya barikura.

¹² Bamaze guhaga bose, Yesu abwira abigishwa biwe ati: “Nimwegeranye utumanyu twasigaye, ntihagire ibipfa ubusa.”

¹³ Nuko begeranya utumanyu twa ya mikate itanu y’ingano abantu bariye, buzuza ibiseke cumi na bibiri.

¹⁴ Abantu babonye igitangaza Yesu akoze baravuga bati: “Ni ivy’ukuri uwu ni wa muvugishwa twari twiteze kw’isi.”

¹⁵ Yesu amenye ko bagira baze ngo bamwimike ku nguvu nk’umwami, aca asubira ku musozi ari wenyene.

Yesu agendera ku mazi

¹⁶ Bugorovye, abigishwa ba Yesu bamanuka ku kiyaga.

¹⁷ Kubera bwari bwije kandi Yesu atari bwagaruke aho bari bari, burira ubwato kugira ngo bajabuke ikiyaga baje i Kaperinawumu.

¹⁸ Ico gihe, umuyaga wariko urahuhuta cane bituma haba imipfunda myinshi mu kiyaga.

¹⁹ Bamaze gusoza nk’ibirometero bitanu, babona Yesu agendagenda ku mazi yegera ubwato barimwo, maze bagira ubwoba.

²⁰ Yesu arababwira ati: “Ni jewe; ntimugire ubwoba.”

²¹ Nuko bashaka kumwuriza mu bwato, ariko buba burashitse ku nkengera aho bari bagiye.

²² Ku musi ukurikira, ba bantu isinzi bari basigaye hakurya y’ikiyaga bibuka ko hari ubwato bumwe gusa, kandi ko Yesu atinjiranye n’abigishwa biwe muri bwo, ahubwo ko bijanye bonyene.

²³ N’ubundi bwato bwinshi buvuye i Tiberiya, buraza bushika hamwe Umwami Yesu yahezagirira imikate abantu bakayifungura.

²⁴ Abantu bamaze kubona ko Yesu n’abigishwa biwe atari ho bari, baca binjira muri ubwo bwato baja i Kaperinawumu kumuronderayo.

Yesu ni umukate w’ubugingo

²⁵ Bamusanze aho yari ari hakurya y’ikiyaga, baramubaza bati: “Mwigisha, washitse hano ryari?”

²⁶ Yesu arabishura ati: “Ndababwire ukuri, ntimuriko mundondera kubera mwatahuye ibitangaza mwabonye nkora, ahubwo mundondera kuko nabagaburiye imikate mugahaga.

²⁷ Ntimugakorere ivyokurya bibora, ahubwo nimukorere ivyokurya bihoraho kandi bitanga ubugingo budashira, ivyo Umwana w’Umuntu azobaha, kuko Imana Data ari we yahaye ububasha bwo gukora ivyo.”

²⁸ Baramubaza bati: “Natwe turashaka gukora ibikorwa vy’Imana. None tubigenze gute?”

²⁹ Yesu arabishura ati: “Iki ni co gikorwa Imana ishaka ko mukora: nimwizere uwo yatumye.”

³⁰ Baramubwira bati: “Mbega nta gitangaza wokora kugira ngo tukibone hanyuma twizere? Ni ikihe wokora?

³¹ Ba sogokuruza bacu baririye manu mu bugaragwa. Ivyanditswe bivuga biti: ‘Mose yabahaye imikate ivuye mw’ijuru ngo bayirye.’”

³² Yesu arababwira ati: “Ndababwire ukuri, Mose si we yabahaye imikate ivuye mw’ijuru, ariko Data ni we yayibahaye, kandi ni we abaha umukate w’ukuri uvuye mw’ijuru.

³³ Kuko umukate w’Imana ni uwumanuka uvuye mw’ijuru ugaha isi ubugingo.”

³⁴ Baramubwira bati: “Nyakwubahwa, turagusavye wame uduha uwo mukate imisi yose.”

³⁵ Yesu arabishura ati: “Ni jewe mukate w’ubugingo. Uwuza aho ndi ntazosubira gusonza, kandi uwunyizera ntazosubira kunyoterwa.

³⁶ Ariko nk’uko nabibabwiye, muramaze kumbona yamara ntimurizera.

³⁷ Ariko abo Data yampaye bose, bazoza aho ndi kandi sinzokwigera ndabirukana.

³⁸ Kuko sinamanutse mva mw’ijuru nje gukora ivyo nshaka, ariko nazanywe no gukora ivyo uwantumye ashaka.

³⁹ Kandi ivyo uwantumye ashaka ni ibi: ko ntatakaza n’umwe mu bo yampaye, ariko ashaka ko nzobazura ku musi wa nyuma.

⁴⁰ Kuko ico Data ashaka ni uko uwubonye Umwana akamwizera agira ubugingo budashira, kandi nanje nzomuzura ku musi wa nyuma.”

⁴¹ Maze Abayuda batangura kumwidogera kuko avuze ati: “Ni jewe mukate wamanutse uva mw’ijuru.”

⁴² Baravuga bati: “Mbega uwu si Yesu mwene Yosefu? Se na nyina ntitubazi? None ni gute avuga ngo: ‘Namanutse mva mw’ijuru’?”

⁴³ Yesu arabishura ati: “Nimureke kwidoga hagati muri mwebwe.

⁴⁴ Nta muntu n’umwe ashobora kuza aho ndi Data yantumye atamuzanye, kandi nzomuzura ku musi wa nyuma.

⁴⁵ Abavugishwa n’Imana banditse bati: ‘Bose bazokwigishwa n’Imana.’ Ni co gituma umuntu wese yumvirije Data akakira inyigisho ziwe, aza aho ndi.

⁴⁶ Ivyo ntibisigura ko hari umuntu amaze kubona Data; uwatumwe avuye ku Mana wenyene ni we amaze kubona Data.

⁴⁷ Ndababwire ukuri, uwizera afise ubugingo budashira.

⁴⁸ Ni jewe mukate w’ubugingo.

⁴⁹ Ba sogokuruza banyu baririye manu mu bugaragwa, yamara barapfuye.

⁵⁰ Ariko hano hari umukate uva mw’ijuru, kandi uwuwurya ntazopfa.

⁵¹ Ni jewe mukate w’ubugingo wamanutse uva mw’ijuru. Umuntu wese arya uwo mukate azobaho ibihe bidashira. Uwo mukate ni umubiri wanje nzotanga kugira ngo isi igire ubugingo.”

⁵² Maze Abayuda batangura guharira hagati yabo bashavuye bati: “Ni gute uwu mugabo yoduha umubiri wiwe ngo tuwurye?”

⁵³ Yesu arababwira ati: “Ndababwire ukuri, ni mutarya umubiri w’Umwana w’Umuntu mukanywa n’amaraso yiwe, nta bugingo muzogira muri mwebwe.

⁵⁴ Ariko umuntu wese arya umubiri wanje akanywa n’amaraso yanje afise ubugingo budashira, kandi nzomuzura ku musi wa nyuma.

⁵⁵ Kuko umubiri wanje ni ico kurya c’ukuri n’amaraso yanje ni ico kunywa c’ukuri.

⁵⁶ Umuntu wese arya umubiri wanje akanywa n’amaraso yanje aguma muri jewe nanje nkaguma muri we.

⁵⁷ Data yantumye ni muzima kandi ndiho ku bwiwe; ni ko n’uwundya na we azobaho ku bwanje.

⁵⁸ Uwu ni wo mukate wamanutse uva mw’ijuru; ntusa na ya manu ba sogokuruza banyu baririye mu bugaragwa ariko bagapfa. Uwurya uwu mukate azobaho ibihe bidashira.”

⁵⁹ Yesu yavuze ivyo ariko arigishiriza mw’isinagogi i Kaperinawumu.

Abigishwa benshi baheba Yesu

⁶⁰ Benshi bo mu bigishwa biwe bavyumvise baravuga bati: “Izi nyigisho ziragumye. Ni nde yozemera?”

⁶¹ Yesu amenye ko abigishwa biwe bariko baridoga, arababaza ati: “Mbega ivyo ndababwiye birabatsitaje?

⁶² None hamwe mwobona Umwana w’Umuntu aduga asubira iyo yaje ava, mwovuga iki?

⁶³ Mpwemu w’Imana ni we atanga ubugingo, umuntu nta co yokwishoboza. Amajambo nababwiye arimwo impwemu kandi ni ubugingo.

⁶⁴ Ariko bamwe muri mwebwe ntibizera.” Kuko kuva mu ntago, Yesu yari azi abatizera n’uwuzomugurisha.

⁶⁵ Yongerako ati: “Ni co gituma nababwiye ko ata muntu ashobora kuza aho ndi atabishobojwe na Data.”

⁶⁶ Kuva ico gihe benshi mu bigishwa biwe baca baragenda ntibasubira kumukurikira.

⁶⁷ Yesu ahindukirira bamwe cumi na babiri arababaza ati: “Mbega namwe murashaka kwigira?”

⁶⁸ Simoni Petero aramwishura ati: “Mwami, twokuvako tugakurikira nde? Erega wewe ufise amajambo atanga ubugingo budashira!

⁶⁹ Twebwe twarakwizeye turatahura ko uri Uwera w’Imana.”

⁷⁰ Yesu aca arababwira ati: “Sinabatoranije muri cumi na babiri? Ariko umwe muri mwebwe ni uwa Satani.”

⁷¹ (Aho yariko avuga Yuda, mwene Simoni Isikariyote. Kuko naho yari umwe muri bamwe cumi na babiri, ni we yari agiye kumugurisha.)