Yohana 17 - Bibiliya mu Kirundi coroshe

Yesu yisengera

¹ Yesu ahejeje kuvuga ayo amajambo, arangamiza mw’ijuru asenga ati: “Data, igihe kirashitse. Nuheshe Umwana wawe icubahiro, kugira ngo na we aguheshe icubahiro.

² Wamuhaye ububasha ku bantu bose kugira ngo ahe ubugingo budashira abo wamuhaye bose.

³ Ubu ni bwo bugingo budashira: ko bakumenya wewe, Imana y’ukuri yonyene, na Yesu Kristo, uwo watumye.

⁴ Naguhesheje icubahiro hano kw’isi mu kurangiza igikorwa wampaye.

⁵ None Data numpe ca cubahiro nari mfise ndi kumwe nawe imbere y’uko isi ibaho.

Yesu asengera abigishwa biwe

⁶ Narakumenyekanishije ku bo wampaye ubakuye mw’isi. Bari abawe urabampa, kandi bumviye ijambo ryawe.

⁷ Ubu barazi ko ivyo mfise vyose vyavuye iwawe,

⁸ kuko nabahaye amajambo wampaye kandi barayakira. Bamenye badakekeranya ko naje mva iwawe kandi bizeye ko ari wewe wantumye.

⁹ Ndabasengeye; sinsengeye isi, ariko nsengeye abo wampaye, kuko ari abawe.

¹⁰ Abanje bose ni abawe, kandi abawe bose ni abanje. Kandi icubahiro canje kigaragarira muri bo.

¹¹ Jewe ngiye kuva mw’isi, nze aho uri, ariko bo baracari mw’isi. Data Wera, bazigamire mu bushobozi bw’izina ryawe, rimwe wampa, kugira ngo babe umwe nk’uko wewe nanje turi umwe.

¹² Nkiri kumwe na bo, nabazigamiye mu bushobozi bw’izina ryawe, rimwe wampa. Narabarinze kandi nta n’umwe muri bo yazimiye kiretse umwe yategerezwa kuranduka kugira ngo Ivyanditswe bishike.

¹³ Data, ubu ndaje aho uri, ariko mvuze aya majambo nkiri mw’isi kugira ngo bagire umunezero wanje kandi bawugire wuzuye.

¹⁴ Nabahaye ijambo ryawe, kandi isi yarabanse kuko batakiri abayo, nk’uko nanje ntari uwayo.

¹⁵ Sindagusavye ngo ubakure mw’isi, ariko ndagusavye ngo ubarinde wa mubi.

¹⁶ Si ab’isi, nk’uko nanje ntari uwayo.

¹⁷ Bezeshe ukuri; ijambo ryawe ni ryo kuri.

¹⁸ Nk’uko wantumye mw’isi, nanje ndabatumye mw’isi.

¹⁹ Ku bwabo ndiyeza, kugira ngo na bo bezwe mu kuri.

Yesu asengera abizera bose

²⁰ Sinsengeye aba gusa. Ariko ndasengeye n’abandi bose bazokwizera biciye ku butumwa bw’aba.

²¹ Ndabasengeye ngo bose babe umwe; nk’uko wewe Data uri muri jewe nanje nkaba muri wewe, nibabe umwe muri twebwe, kugira ngo isi yizere ko wantumye.

²² Icubahiro wampaye narakibahaye, kugira ngo babe umwe nk’uko twe nawe turi umwe:

²³ jewe mbe muri bo, nawe ube muri jewe, aho ni ho bazoba umwe vy’ukuri, kugira ngo isi imenye ko wantumye kandi ko ubakunda nk’uko unkunda.

²⁴ Data, ndashaka ko abo wampaye babana nanje aho ndi, kugira ngo babone ubwiza bwanje, bumwe wampa, kuko wankunze isi itararemwa.

²⁵ Data ugororotse, naho isi itakuzi, jewe ndakuzi, kandi aba barazi ko ari wewe wantumye.

²⁶ Narakumenyekanishije muri bo, kandi nzobandanya ndakumenyekanisha kugira ngo urukundo unkunda rube muri bo kandi nanje mbe muri bo.”