Yohana 11 - Bibiliya mu Kirundi coroshe

Urupfu rwa Lazaro

¹ Hariho umuntu yitwa Lazaro yava i Betaniya yari arwaye. Betaniya cari igisagara Mariya na Marita mwene nyina babamwo.

² (Uwo Mariya ni umwe yasuka amavuta atamirana ku birenge vy’Umwami Yesu akabihanaguza imishatsi yiwe. Musazawe, Lazaro, ni we yari arwaye.)

³ Nuko bashiki ba Lazaro batumako Yesu bati: “Mwami, umwe ukunda ararwaye.”

⁴ Yesu avyumvise, aravuga ati: “Ingwara ya Lazaro si iyo kumwica. Ahubwo ni iyo kwerekana icubahiro c’Imana, kugira ngo Umwana w’Imana ahabwe icubahiro biciye muri yo.”

⁵ Yesu yarakunda Marita na mwene nyina Mariya na Lazaro.

⁶ Ariko inyuma yo kwumva ko Lazaro arwaye, yamaze aho yari ari iyindi misi ibiri.

⁷ Hanyuma abwira abigishwa biwe ati: “Ingo dusubire i Yudaya.”

⁸ Abigishwa biwe baramubaza bati: “Mwigisha, haheze imisi mike cane Abayuda bashatse kugutera amabuye, none ushaka gusubirayo?”

⁹ Yesu arabishura ati: “Mbega umurango ntugizwe n’amasaha cumi n’abiri? Uwugenda ku murango ntashobora gutsitara, kuko abonesherezwa n’umuco w’iyi si.

¹⁰ Ariko iyo umuntu agenda mw’ijoro arashobora gutsitara kuko ata muco uba uhari.”

¹¹ Ahejeje kuvuga ivyo, arababwira ati: “Umukunzi wacu Lazaro arasinziriye; ariko ngira nje kumuvyura.”

¹² Abigishwa baramwishura bati: “Mwami nimba asinziriye, azokira.”

¹³ Yesu yashaka kuvuga ko Lazaro yapfuye, ariko bo bibaza ko ari ugusinzira gusanzwe.

¹⁴ Nuko aca arabitomora ati: “Lazaro yapfuye,

¹⁵ kandi ndanezerewe ku bwanyu kubona atari yo nari ndi, kuko muraja kunyizera. Nimuze tuje kumuraba.”

¹⁶ Toma (uwo batazira Ihasa) abwira abigishwa bagenziwe ati: “Reka tugende natwe dupfane na Yesu.”

Yesu ni ukuzuka n’ubugingo

¹⁷ Yesu ashitse i Betaniya, asanga Lazaro amaze imisi ine ari mu mva.

¹⁸ Betaniya hari hafi y’i Yerusalemu, nko ku birometero bitatu.

¹⁹ Abayuda benshi bari baje kwa Marita na Mariya kubaremesha inyuma y’urupfu rwa musaza wabo.

²⁰ Marita yumvise ko Yesu aje, arasohoka aja kumusanganira, ariko Mariya aguma i muhira.

²¹ Maze Marita abwira Yesu ati: “Mwami, iyo uja kuba hano, musazanje ntaba yarapfuye.

²² Ariko n’ubu ndazi ko ico usaba Imana cose ikiguha.”

²³ Yesu aramubwira ati: “Musazawe azozuka.”

²⁴ Marita aramwishura ati: “Ndazi ko azozuka ku musi wa nyuma.”

²⁵ Yesu aramubwira ati: “Ni jewe kuzuka n’ubugingo. Uwunyizera wese, naho yopfa, azobaho.

²⁶ Umuntu wese aba muri jewe kandi akanyizera ntazokwigera apfa. Ivyo uravyizera ga Marita?”

²⁷ Marita aramwishura ati: “Egome Mwami, ndizera ko uri Kristo, Umwana w’Imana, umwe ategerezwa kuza mw’isi.”

²⁸ Ahejeje kuvuga ayo majambo, aca aja guhamagara mwene nyina Mariya aramwihereranya, amubwira ati: “Umwigisha ari hano kandi arashaka kukubona.”

²⁹ Mariya avyumvise aca arahaguruka ubwo nyene aja iyo Yesu ari.

³⁰ Yesu ntiyari bwinjire mu mihana, yari akiri aho bahuriye na Marita.

³¹ Abayuda bari kumwe na Mariya mu nzu bamuremesha babonye ahagurutse yihuta agaca asohoka, baramukurikira, kuko bibaza ko yoba agiye ku mva kuririrayo.

³² Nuko Mariya ashika aho Yesu ari aramubona, aca apfukama imbere yiwe, amubwira ati: “Mwami, iyo uja kuba hano, musazanje ntaba yarapfuye.”

³³ Yesu abonye amarira ya Mariya n’ay’Abayuda bari bazananye na we, afatwa n’ibigumbagumba arababara cane.

³⁴ Arababaza ati: “Mwamuhamvye he?” Baramwishura bati: “Mwami ingo wirabire.”

³⁵ Yesu aca ararira.

³⁶ Abayuda bari aho baravuga bati: “Ehe ingene yamukunda!”

³⁷ Ariko bamwe baravuga bati: “None ko yakijije ya mpumyi, ntiyari gushobora gukingira Lazaro urupfu?”

Yesu azura Lazaro

³⁸ Nuko Yesu ashika ku mva akibabaye. Iyo mva yari isenga ryugaje ikibuye kinini.

³⁹ Yesu arababwira ati: “Nimukureho ico kibuye.” Ariko Marita, mushiki w’uwapfuye aramubwira ati: “Mwami, honuka cane kuko amazeyo imisi ine!”

⁴⁰ Yesu aramubwira ati: “Sinakubwiye ko niwizera uja kubona ubwiza bw’Imana?”

⁴¹ Nuko bakuraho ca kibuye. Maze Yesu arangamiza hejuru aravuga ati: “Data, ndagushimiye kuko unyumva iyo nsenga.

⁴² Ndazi ko wama unyumva, ariko ibi ndabivuze ku neza y’aba bantu bahagaze hano, kugira ngo bizere ko ari wewe wantumye.”

⁴³ Ahejeje kuvuga ayo majambo aca arasemerera ati: “Lazaro, sohoka!”

⁴⁴ Wa muntu yari yarapfuye arasohoka, amaboko n’ibirenge vyiwe bikizingiriyeko impuzu bamuhamvyemwo, mu maso hiwe hazingiriyeko igitambara. Yesu arababwira ati: “Nimumubohore, mumureke agendagende.”

Abayuda barondera kwica Yesu

⁴⁵ Ivyo vyatumye Abayuda benshi bari baje kugarukira kuri Mariya bizera Yesu, bamaze kubona ivyo akoze.

⁴⁶ Ariko bamwe muri bo baciye baja ku Bafarisayo bababwira ivyo Yesu yakoze.

⁴⁷ Nuko abakuru b’abaherezi n’Abafarisayo baca bakoranya inama nkuru y’abatwara ubwoko bw’Abayuda. Barabazanya bati: “Dukore iki? Uwu mugabo ariko akora ibitangaza vyinshi.

⁴⁸ Nitwamureka akabandanya uku, abantu bose bazomwizera, maze Abaroma baze bigarurire urusengero rwacu n’igihugu cacu.”

⁴⁹ Nuko umwe muri bo yitwa Kayafa, ari na we yari umuherezi mukuru uwo mwaka, aravuga ati: “Ntimuzi ico muriko muravuga!

⁵⁰ Ntimubona ko ari vyiza ko umuntu umwe apfira abantu hako igihugu cose kigwa mu kaga?”

⁵¹ Ivyo ntiyabivuze avyigeneye; ariko nk’umuherezi mukuru muri uwo mwaka, yaravugishijwe ko Yesu yari agiye gupfira igihugu cose.

⁵² Kandi si igihugu ca Isirayeli gusa, ahubwo yari agiye gupfira n’abana b’Imana bashwiragiriye mu mahanga, kugira ngo abegeranirize hamwe, abagire umwe.

⁵³ Kuva uwo musi baca batangura gutegura ingene bokwica Yesu.

⁵⁴ Ivyo vyatumye Yesu adasubira kugendagenda ku mugaragaro mu Bayuda. Ahubwo yaciye aja mu karere ko hafi y’ubugaragwa, mu gisagara citwa Efurayimu, agumanayo n’abigishwa biwe.

⁵⁵ Imisi mikuru ya Pasika Abayuda bahimbaza yari yegereje, kandi abantu benshi bava mu mihingo yose y’igihugu bakaja i Yerusalemu kugira ngo bagire umugenzo wo kwihumanura imbere y’uko Pasika ishika.

⁵⁶ Abantu baguma barondera Yesu mu rusengero, babazanya bati: “Mwibaza ko azoza mu misi mikuru?”

⁵⁷ Abakuru b’abaherezi n’Abafarisayo bari batanze itegeko ko umuntu wese yobona aho Yesu ari yoca aja kubibabwira kugira ngo bamufate.