Mariko 15 - Bibiliya mu Kirundi coroshe

Yesu imbere ya Pilato

¹ Kare mu gitondo, abakuru b’abaherezi hamwe n’abatware, n’abigisha b’ivyagezwe, ari bo bari bagize inama nkuru y’idini ry’Abayuda barakorana, bagira inama. Nuko baboha Yesu, bamujana kwa Pilato.

² Pilato aramubaza ati: “Woba uri umwami w’Abayuda?” Yesu aramwishura ati: “Uvuze ukuri, ndi we.”

³ Maze abakuru b’abaherezi bamurega ibirego vyinshi.

⁴ Pilato aramubaza ati: “Mbega nta co wishura? Mbega ntiwumva ivyo bakurega?”

⁵ Ariko Yesu ntiyagira ico yishura, bituma Pilato atangara.

⁶ Igihe cose mu misi mikuru ya Pasika, hari umugenzo wo kurekura imbohe abantu bisabiye.

⁷ Hariho umugabo yitwa Baraba yari mw’ibohero kuko we na bagenziwe bagirizwa ubwicanyi mu migumuko.

⁸ Nuko abantu baraza basaba Pilato kubarekurira imbohe nk’uko yari asanzwe abikora.

⁹ Pilato arababaza ati: “Mushaka ko ndabarekurira Umwami w’Abayuda?”

¹⁰ Yari azi neza ko abakuru b’abaherezi bamuzaniye Yesu kubera ishari.

¹¹ Abakuru b’abaherezi batangura kugumura abantu ngo basabe Pilato abarekurire Baraba mu kibanza ca Yesu.

¹² Pilato arababaza ati: “None uwo mwita umwami w’Abayuda ndamugire nte?”

¹³ Barasemerera bati: “Nabambwe!”

¹⁴ Pilato arababaza ati: “Kubera iki? Ni ikihe caha yakoze?” Ahubwo barushiriza gusemerera bati: “Nabambwe!”

¹⁵ Mu ntumbero yo kunezereza abantu benshi bari aho, Pilato arekura Baraba. Atanga itegeko ko bashishagura Yesu, hanyuma aramutanga kugira ngo bamubambe.

Abasoda bacokora Yesu

¹⁶ Nuko abasoda bajana Yesu mu rugo rw’imbere (ni ukuvuga aho umutware w’Umuroma yakorera), bahamagara abandi basoda bagize umugwi wabo,

¹⁷ bamwambika ikanzu itukura, bajisha urugori rw’amahwa, barumwambika ku mutwe.

¹⁸ Nuko batangura kumucokora bati: “Turagize bwakeye, Mwami w’Abayuda!”

¹⁹ Bamukubita kenshi irenga ku mutwe, bamucirako amate. Bapfukama imbere yiwe bamushinyagurira ngo baramwubashe.

²⁰ Bahejeje kumushinyagurira, bamwambura ya kanzu itukura basubira kumwambika impuzu ziwe, hanyuma bamujana kumubamba.

Babamba Yesu

²¹ Bakiri mu nzira bagenda, bahura n’umugabo yitwa Simoni yari avuye mu mirima, bamutegeka gutwaza umusaraba Yesu. Simoni yava i Kurene kandi yari se wa Alegizandere na Rufu.

²² Nuko bashikana Yesu ahantu hitwa Gologota (bisigura ngo Ahantu h’Agahanga).

²³ Bagerageza kumuha umuvinyu w’inkarisha, ariko Yesu yanka kuyinywa.

²⁴ Nuko baramubamba, bagabura impuzu ziwe bakoresheje ubupfindo kugira ngo barabe iyo umwumwe wese yegukira.

²⁵ Igihe bamubamba hari nk’isaha zitatu z’igitondo.

²⁶ Icandiko c’ibirego vyatumye abambwa cavuga ngo: umwami w’abayuda.

²⁷ Ba basoda bongera babamba ibisuma bibiri i ruhande ya Yesu, kimwe i buryo, ikindi i bubamfu bwiwe. [

²⁸ Uko ni ko Ivyanditswe vyashitse kuko vyavuga ngo: “Yaharuwe mu gitigiri c’inkozi z’ikibi.”]

²⁹ Abarengana bagenda baramutuka bamuzunguriza imitwe, bakamubwira bati: “Wewe wavuze ngo wosambura urusengero ukarwubaka mu misi itatu!

³⁰ Ikize rero, wikure kuri uwo musaraba!”

³¹ N’abakuru b’abaherezi n’abigisha b’ivyagezwe na bo bakamucokora, bavuga bati: “Yakijije abandi, ariko we ntashobora kwikiza!

³² Kristo, Umwami w’Abisirayeli niyikure ku musaraba kugira ngo tubibone hanyuma tumwizere.” Na vya bisuma vyari bibambanywe na we na vyo biramutuka.

Urupfu rwa Yesu

³³ Kuva isaha zitandatu z’umurango, igihugu cose gitwikirwa n’umwijima gushika isaha y’icenda.

³⁴ Isaha y’icenda ishitse, Yesu arasemerera n’ijwi rirenga ati: “Eloyi, Eloyi, lema sabakitani?” (bisobanurwa ngo: “Mana yanje, Mana yanje, ni kuki wampevye?”)

³⁵ Bamwe mu bari bahagaze aho baravuga bati: “Mwumvise? Ariko ahamagara Eliya!”

³⁶ Umwe ariruka afata ipampa arijobeka mu nkarisha, arishira kw’irenga, aca arariduza ku munwa wa Yesu kugira ngo amunyweshe, aravuga ati: “Reka turabe ko Eliya aza kumwururutsa amukure ku musaraba.”

³⁷ Nuko Yesu araboroga, aca aracikana.

³⁸ Igitambara co mu rusengero gica gitabukamwo kubiri kuva hejuru gushika hasi.

³⁹ Umusoda mukuru w’Umuroma yari ahagaze imbere ya Yesu, abonye ingene apfuye, aravuga ati: “Ni ivy’ukuri uwu yari Umwana w’Imana!”

⁴⁰ Ico gihe hariho abagore bariko barabikurikirana bari kure. Muri bo harimwo Mariya Magadalena, Mariya nyina wa Yakobo mutoya na Yose, hamwe na Salome.

⁴¹ Abo bagore bagendana na Yesu igihe yari i Galilaya bakamushigikira. Kandi benshi mu bagore bari bazananye na we i Yerusalemu bari aho.

Bahamba Yesu

⁴² Uwo musi wari uwo kwitegurira Isabato, ni ukuvuga buca haba Isabato. Nuko hageze ku mugoroba,

⁴³ Yosefu w’i Arimataya ararinda, aja kwa Pilato amusaba ikiziga ca Yesu. Uwo Yosefu yari umwubahwa mu bagize inama nkuru y’ubwoko bw’Abayuda kandi yari yiteze ukuza kw’Ubwami bw’Imana.

⁴⁴ Pilato aca aratangara yumvise ko Yesu yamaze gucikana. Nuko ahamagara wa musoda mukuru w’Umuroma amubaza ko Yesu yamaze gucikana.

⁴⁵ Na we amubwira ko ari vyo. Pilato aca aha uruhusha Yosefu rwo gutora ikiziga ca Yesu.

⁴⁶ Maze Yosefu aca agura igitambara cera, akura ikiziga ca Yesu ku musaraba, akizingira muri ico gitambara cera, aca agishira mu mva yimbwe mu gitandara; aca atembagariza ikibuye kinini ku bwinjiriro bwa ya mva arayugara.

⁴⁷ Kandi ico gihe Mariya Magadalena na Mariya nyina wa Yose bariko bararaba aho bashize ikiziga ca Yesu.