Luka 20 - Bibiliya mu Kirundi coroshe

Aho ububasha bwa Yesu buva

¹ Umusi umwe Yesu yariko arigisha abantu mu rusengero, ababwira Ubutumwa Bwiza. Maze abakuru b’abaherezi, abigisha b’ivyagezwe n’abakuru b’Abayuda baza aho ari.

² Baramubaza bati: “Ni ubuhe bubasha butuma ukora ivyo? Ni nde yabuguhaye?”

³ Arabishura ati: “Reka nanje ndababaze. Nimumbarire:

⁴ Mbega umubatizo wa Yohana wavuye ku Mana yo mw’ijuru canke ku bantu?”

⁵ Baravugana hagati yabo bati: “Nitwavuga tuti: ‘Wavuye ku Mana yo mw’ijuru,’ ahava atubaza ati: ‘None ni kuki mutizeye ivyo Yohana yavuze?’

⁶ Nitwavuga tuti: ‘Wavuye ku bantu,’ abantu bose baradutera amabuye kuko baremera ata gukekeranya ko Yohana yari uwuvugishwa n’Imana.”

⁷ Nuko baramwishura bati: “Ntituzi uwabumuhaye.”

⁸ Yesu na we arabwira ati: “Nanje sindababwira aho ububasha butuma nkora ibi buva.”

Umugani w’uruzabibu n’abarukoramwo

⁹ Hanyuma Yesu acira umugani abari aho, avuga ati: “Habaye umuntu yarimye uruzabibu, hanyuma aruzeza abarimyi, afata urugendo rwa kure, amarayo igihe kinini.

¹⁰ Iyimbura rigeze, atuma umukozi wiwe kuri ba barimyi kugira ngo bamuhe igice c’umwimbu w’inzabibu kimwegukira. Ariko ba barimyi bafata uwo mukozi baramukubita, bamurungika iminwe misa.

¹¹ Hanyuma arungika uwundi mukozi, na we nyene baramutuka, baramukubita, bamurungika iminwe misa.

¹² Arungika n’uwa gatatu; we baramukomeretsa, bamuterera inyuma y’uruzabibu.

¹³ Nyene uruzabibu aribaza ati: ‘Mbega yemwe ngire gute? Reka ndungike umuhungu wanje nkunda cane, kumbure wewe bazomusonera.’

¹⁴ Ariko ba barimyi bakimubona baca batangura kuvugana bati: ‘Uwu ni we azoba samuragwa. Reka tumwice kugira ngo twegukire ivyo yorazwe.’

¹⁵ Nuko bamukwegera inyuma y’umurima w’uruzabibu bamwicirayo. None mwibaza ko nyene uruzabibu niyaza azobagira gute?

¹⁶ Azoza yice abo barimyi, maze urwo ruzabibu aruzeze abandi.” Abantu bavyumvise, baca bavuga bati: “Ivyo ntibikabe.”

¹⁷ Yesu aca arabitegereza, arababaza ati: “None aya majambo yo mu Vyanditswe akurikira asobanura iki: ‘Ibuye abubatsi bagaye ni ryo ryahindutse irigumya imfuruka.’

¹⁸ Umuntu wese azogwa kuri iryo buye azovunagurika, uwo rizogwako rizomusya.”

¹⁹ Abigisha b’ivyagezwe n’abakuru b’abaherezi barondera ingene bomufata ubwo nyene, kuko bari batahuye ko ari bo ariko aravuga muri uwo mugani, ariko batinya abantu.

Gutanga ikori rya Kayisari

²⁰ Nuko batangura kumugenza, bahera abantu bigize intungane ngo bamutegere mu majambo avuga, kugira ngo barabe ko boronka ivyo bamurega ku bategetsi b’Abaroma.

²¹ Ba bantu babaza Yesu bati: “Mwigisha, turazi ko uvuga kandi wigisha ivy’ukuri. Nta ho uhengamira, kandi wigisha inzira y’Imana mu kuri kwose.

²² None rero tubwire: biremewe gutanga ikori rya Kayisari, canke ntivyemewe?”

²³ Yesu abonye ubugunge buri muri bo, aca ababwira ati:

²⁴ “Nimunyereke igiceri c’idenariyo. Iyi shusho n’ibi vyandiko biriko ni ivya nde?” Barishura bati: “Ni ivya Kayisari.”

²⁵ Aca ababwira ati: “Nuko rero, ivya Kayisari mubihe Kayisari, ivy’Imana na vyo mubihe Imana.”

²⁶ Ntibabaye bagishobora kumufatira ku vyo avuga ku mugaragaro, ahubwo batangajwe n’inyishu yiwe, baca barahora.

Ivy’abagabo n’abagore inyuma y’izuka

²⁷ Maze bamwe mu Basadukayo, ari bo batemera ivy’izuka ry’abapfuye, baza aho Yesu ari baramubaza bati:

²⁸ “Mwigisha, Mose yanditse avuga ko umuntu apfuye agasiga umugore atagira abana, uwo bavukana ategerezwa gucura uwo mupfakazi kugira ngo aronkere uruvyaro uwo muhisi.

²⁹ Rero, harigeze kuba abavukana indwi. Mukuru muri bo ararongora, ariko apfa atavyaye.

³⁰ Uwa kabiri arongora wa mupfakazi,

³¹ n’uwa gatatu bigenda uko, gushika no ku w’indwi bose biba nk’uko, bapfa ata wusize umwana.

³² Maze haheze igihe na wa mugore arapfa.

³³ None ku musi w’izuka ry’abapfuye uwo mugore azoba uwa nde, ko yabaye umugore w’abo indwi bose?”

³⁴ Yesu arabishura ati: “Abantu bo muri kino gihe bararongora kandi bararongorwa.

³⁵ Ariko abazoba babereye gushika muri ya si izoza no mw’izuka ry’abapfuye ntibazorongora canke ngo barongorwe.

³⁶ Vyongeye ntibazoba bagipfa, kuko bazoba bameze nk’abamarayika. Ni abana b’Imana, kuko ari abana b’ukuzuka.

³⁷ Ku bijanye n’izuka ry’abapfuye, na Mose yaravyerekanye, aho yandika ivy’igisaka caka kidatemuka, avuga ko Uhoraho ari ‘Imana ya Aburahamu, ya Isaka n’iya Yakobo.’

³⁸ Si Imana y’abapfuye, ni Imana y’abazima, kuko kuri yo bose bariho.”

³⁹ Bamwe mu bigisha b’ivyagezwe barishura bati: “Uvuze neza, Mwigisha.”

⁴⁰ Ntibabaye bacubahuka kumubaza ikibazo na kimwe.

Yesu ni mwene nde?

⁴¹ Yesu aca ababwira ati: “Ni kubera iki muvuga ngo Kristo ni mwene Dawidi?

⁴² Dawidi ubwiwe ni we yivugiye mu gitabu ca Zaburi ati: ‘Uhoraho yabariye Umwami wanje ati: “Icara i buryo bwanje

⁴³ kugeza abansi bawe bose ndabashize musi y’ibirenge vyawe.” ’

⁴⁴ None nimba Dawidi amwita ‘Umwami,’ yoba umwana wiwe gute?”

Mwirinde abigisha b’ivyagezwe

⁴⁵ Yesu abwira abigishwa biwe, abari aho bose bumva, ati:

⁴⁶ “Mwirinde abigisha b’ivyagezwe. Bakunda kugendagenda bambaye amakanzu maremare y’icubahiro, no kuramutswa mu cubahiro mu makoraniro y’abantu. Bakunda kandi guhabwa ivyicaro vy’icubahiro mu masinagogi no mu misi mikuru.

⁴⁷ Banyaga imiryango y’abapfakazi bakabatwara ivyabo, kandi bakabandanya biyerekana nk’abantu beza mu gusenga amasengesho maremare. Ni co gituma bazohanwa kurusha abandi.”