Luka 19 - Bibiliya mu Kirundi coroshe

Zakayo umutozakori yihana

¹ Nuko Yesu yinjira mu gisagara ca Yeriko, ahaca arengana.

² Muri ico gisagara hari umuntu yitwa Zakayo, yari umutozakori mukuru, kandi yari atunze cane.

³ Yashaka kubona Yesu, ariko ntivyakunda kuko hari isinzi ry’abantu, na we akaba yari mugufi.

⁴ Nuko ariruka yurira igiti c’umusukomora cari i ruhande y’inzira, kuko ari ho Yesu yagira ace.

⁵ Yesu ahashitse, ararangamiza, amubwira ati: “Zakayo, ururuka ningoga, kuko uwu musi nyene nkwiye kurara iwawe.”

⁶ Nuko aca arururuka ningoga, amwakira iwe yuzuye umunezero.

⁷ Ababibonye bose batangura kwidodomba bati: “Agiye kurara mu nzu y’umunyavyaha!”

⁸ Ariko Zakayo arahaguruka, abarira Umwami Yesu ati: “Mwami, ngira mfate ica kabiri c’ivyo ntunze ndakigaburire aboro, kandi nimba hari uwo nivye, ndabimuriha incuro zine.”

⁹ Yesu aca avuga ati: “Uwu musi agakiza kinjiye muri iyi nzu, kuko uwu na we ni umwana wa Aburahamu.

¹⁰ Umwana w’Umuntu yazanywe no kurondera hamwe no gukiza abazimiye.”

Umugani w’ababikijwe mina cumi

¹¹ Bakiriko baramwumviriza, Yesu arabandanya abacira umugani, kuko yari yegereje gushika i Yerusalemu, kandi ico gihe abantu bibaza ko Ubwami bw’Imana buca bushika ubwo nyene.

¹² Ababwira ati: “Umuntu ava mu muryango utunze, yagiye mu gihugu ca kure kwimikwa nk’umwami, hanyuma ngo aheze agaruke.

¹³ Imbere yo kugenda akoranya cumi bo mu bakozi biwe, abaha mina cumi, ababwira ati: ‘Nimwakire aya mahera, mugende muyadandarishe gushika aho nzogarukira.’

¹⁴ Ariko abantu bo mu gihugu ciwe baramwanka, bituma barungika intumwa inyuma yiwe zija kuvuga ziti: ‘Uwo muntu ntidushaka ko aba umwami wacu.’

¹⁵ Ariko arimikwa nk’umwami, hanyuma aragaruka. Aca atumako ba bakozi yaha amahera, kugira arabe ingene bungutse.

¹⁶ Uwa mbere araza, avuga ati: ‘Databuja, mina yawe yungutse izindi cumi.’

¹⁷ Aca amubwira ati: ‘Wakoze neza, mukozi wanje mwiza. Ko wabaye umwizigirwa muri bike, ndaguhaye kuganza ibisagara cumi.’

¹⁸ Uwa kabiri araza avuga ati: ‘Databuja, mina yawe yungutse izindi zitanu.’

¹⁹ Shebuja aramwishura ati: ‘Ndaguhaye kurongora ibisagara bitanu.’

²⁰ Ariko uwundi mukozi araza abwira shebuja ati: ‘Databuja, akira mina yawe; nayibitse mu gitambara ndayinyegeza kure.

²¹ Naratinye kuko nzi ko uri umuntu agoye; wanura ivyo utanikiye, ukimbura ivyo utarimye.’

²² Shebuja aramwishura ati: ‘Ngira ndagucire urubanza mfatiye ku vyo wivugiye wewe nyene, wa mukozi mubi we! Nimba wari uzi ko ndi umuntu agoye, nanura ivyo ntanikiye, nkimbura ivyo ntarimye,

²³ ni kuki utajanye amahera yanje ku bayadandarisha kugira ngo ngarutse ndonke amahera yanje n’inyugu yayo?’

²⁴ Nuko abwira abari bahagaze aho ati: ‘Nimumwake mina yiwe muyihe uwufise cumi.’

²⁵ Baca bavuga bati ‘Databuja, erega asanzwe afise cumi!’

²⁶ Na we arabishura ati: ‘Ndababwire ukuri, uwufise vyinshi azokwongererezwa, uwufise bike na we azokwakwa na bike afise.

²⁷ Abo bansi banje na bo badashaka ko ndababera umwami, nimubazane hano mubicire imbere yanje.’ ”

Yesu yinjira i Yerusalemu nk’umwami

²⁸ Yesu ahejeje kuvuga ivyo, aca arabandanya aduga i Yerusalemu.

²⁹ Yegereje i Betifage n’i Betaniya ku Musozi wa Elayono, atuma babiri mu bigishwa biwe, ababwira ati:

³⁰ “Nimugende muri iriya mihana iri imbere yanyu; nimwahashika murahasanga inyana y’indogoba iziritse ata muntu n’umwe arayigenderako. Muce muyizitura, muyizane hano.

³¹ Nihagira uwubabaza ati: ‘Ni kubera iki muyizituye?’ Mumwishure muti: ‘Umwami arayikeneye.’ ”

³² Nuko abatumwe baragenda, basanga ibintu bimeze nk’uko yari yabibabwiye.

³³ Bakiriko barayizitura, nyeneyo arababaza ati: “Ni kuki muzitura iyo ndogoba?”

³⁴ Baca bishura bati: “Umwami arayikeneye.”

³⁵ Baca bayizanira Yesu, bayisasako impuzu zabo, bayimwicarikako.

³⁶ Kandi aho yaca hose, abantu baca basasa impuzu zabo mu nzira.

³⁷ Yegereye ahari inzira imanuka iva ku Musozi wa Elayono, isinzi ry’abigishwa biwe batangura guhimbaza Imana n’akanyamuneza kenshi n’amajwi arenga, kubera ibitangaza vyinshi bari bamaze kubona, bavuga bati:

³⁸ “Hahezagirwe umwami aje mw’izina ry’Uhoraho!” “Amahoro abe mw’ijuru, n’icubahiro hejuru mw’ijuru!”

³⁹ Bamwe mu Bafarisayo bari muri iryo sinzi babwira Yesu bati: “Mwigisha, hoza abo bigishwa bawe!”

⁴⁰ Arabishura ati: “Ndababwire ukuri, naho bohora, amabuye yosemerera.”

⁴¹ Yegereye Yerusalemu, yitegereza igisagara, arakiririra,

⁴² avuga ati: “Ese na we iyo umenya icotuma uronka amahoro uwu musi! Ariko noneho ivyo bihishijwe amaso yawe.

⁴³ Kuko igihe kizogushikako, aho abansi bawe bazokwubaka ibirindiro impande zawe zose, bagukikuze, bagusugereze impande zose.

⁴⁴ Bazogusambura, bagutikizanye n’ababa muri wewe. Ntibazosigaza ibuye na rimwe rigeretse ku rindi, kuko utigeze umenya igihe Imana yakugendereye.”

Yesu ahumanura urusengero

⁴⁵ Yinjiye mu rusengero, aca atangura kwirukana abariko bararudandarizamwo.

⁴⁶ Ababwira ati: “Handitswe ngo: ‘Inzu yanje izoba iyo gusengeramwo,’ ariko mweho mwayihinduye ‘ubwihisho bw’ibisuma.’”

⁴⁷ Imisi yose Yesu yama yigishiriza mu rusengero. Ariko abakuru b’abaherezi, abigisha b’ivyagezwe n’abatware b’Abayuda baho bose bagumye barondera ukuntu bomwica.

⁴⁸ Ariko ntibaronka aho bamuca kuko abantu bose bakunda cane kwumviriza inyigisho ziwe.