Kolosayi 3 - Bibiliya mu Kirundi coroshe

Uburyo umuntu yobaho ubuzima bwejejwe

¹ None rero ko mwazuranywe na Kristo, mushire imitima yanyu ku biri mw’ijuru, aho Kristo yicaye mu kibanza c’iteka i buryo bw’Imana.

² Ubwenge bwanyu mubushire ku biri mw’ijuru, ntimubushire ku biri mw’isi.

³ Kuko mwapfuye, ubugingo bwanyu bukaba buhishijwe hamwe na Kristo mu Mana.

⁴ Aho Kristo, we bugingo bwanyu azoserukira, namwe muzoserukana na we muri mu bwiza.

⁵ Nuko rero, mwice ibintu vyose vya kamere k’isi: ubusambanyi, ibihumanya, ivyipfuzo vy’umubiri, ivyipfuzo bibi n’ugukunda amahera, ari kwo gusenga ibigirwamana.

⁶ Kuko ivyo bizotuma uburake bw’Imana buza.

⁷ Kera namwe mwabigenderamwo, mukiri mu buzima bwanyu bwo mw’isi.

⁸ Ariko ubu mukwiye kwiyambura ibintu vyose bisa n’ibi: uburake, kujingitwa, ububi bwose, kuvuga abandi nabi, kandi ntihagire amajambo ateye isoni asohoka ava mu kanwa kanyu.

⁹ Ntimukabeshane kuko mwiyambuye wa muntu wa kera n’ibikorwa vyiwe,

¹⁰ mukambara umuntu mushasha. Uwo na we yama ahinduka mu gutahura, akama arondera gusa n’Umuremyi wiwe.

¹¹ Aha ntihaba hakiri Umugiriki canke Umuyuda, uwakebwe canke uwutakebwe, uwateye imbere canke uwutaratera imbere, umugurano canke uwidegemvya, ariko ni Kristo ari vyose kandi ari muri bose.

¹² Nuko rero nk’abatoranijwe n’Imana, bera kandi bakundwa cane, mwambare umutima w’ikigongwe, ubugwaneza, guca bugufi, ubwitonzi no kwihangana.

¹³ Mushigikirane kandi mubabarirane iyo umuntu agize ico apfa na mugenziwe. Mubabarirane nk’uko Umwami Yesu yabababariye namwe.

¹⁴ Kandi ikirengeye vyose mwambare urukundo, ni wo mugozi udufatanya twese mu bumwe bushitse.

¹⁵ Amahoro ya Kristo aganze mu mitima yanyu. Kuko nk’uko mugize ingingo z’umubiri umwe, mwahamagariwe kubana mu mahoro. Kandi mube abama bashima.

¹⁶ Ijambo rya Kristo ribe muri mwebwe rigwiriye, mwigishanye kandi muhanurane mu bwenge bwose, muririmba amazaburi n’indirimbo n’amatazirano y’impwemu mushima Imana mu mitima yanyu.

¹⁷ Kandi ivyo mukora vyose, mu mvugo no mu ngiro, mubikore mw’izina ry’Umwami wacu Yesu, mushima Imana Data wa twese ku bwiwe.

Uko Umukristo akwiye kubana n’abandi

¹⁸ Bagore, mwumvire abagabo banyu, nk’uko bibereye ab’Umwami wacu.

¹⁹ Bagabo, mukunde abagore banyu ntimubababaze ku mitima.

²⁰ Bana, mwubahe abavyeyi banyu muri vyose, kuko ari vyo bihimbara Umwami wacu.

²¹ Ba se, ntimukabere abana banyu umururazi, vyotuma bacika intege.

²² Bagurano, mwumvire ba shobuja bo muri iyi si muri vyose; kandi mubigire atari iyo babahagarikiye gusa murondera ko bobashima, ariko mubikore n’umutima ubikunze mubitewe no kwubaha Umwami wacu.

²³ Ivyo mukora vyose muhore mubikorana umutima wanyu wose, nk’aho mwoba muriko mubikorera Umwami wacu, atari abantu,

²⁴ kuko muzi ko muzohabwa umugabane nk’impera yanyu n’Umwami wacu. Uwo Mwami mukorera ni Kristo.

²⁵ Uwukora ikibi azohembwa ikibi, kuko Imana idaca urwa nkunzi.