Abanyefeso 5 - Bibiliya mu Kirundi coroshe

¹ Nuko rero mwigane Imana, kuko muri abana bayo ikunda cane,

² kandi mugendere mu nzira y’urukundo, nk’uko Kristo yadukunze akitanga ku bwacu ngo abe ubumote bwiza n’ikimazi bihabwa Imana.

³ Ariko muri mwebwe ntihabemwo ubusambanyi, canke ukwipfuza ukwo ari kwo kwose, canke ubukunzi bw’inda, kuko bidakwiye ku bera b’Imana.

⁴ Ntihakagire ibiterasoni, amajambo y’ubupfu canke ibitwenza bibi bigira ikibanza muri mwebwe, ahubwo habe amashimwe.

⁵ Kuko mukwiye kumenya neza ko: ata munyangeso mbi, uwanduye canke uwukunda inda; umuntu nk’uwo asenga ibigirwamana, azogira ico aragwa mu bwami bwa Kristo n’Imana.

⁶ Ntihagire uwubahendesha amajambo atagira ikimazi, kuko ibintu nk’ivyo bizana uburake bw’Imana ku batayumvira.

⁷ Nuko rero ntimukifatanye na bo mu vyo bakora.

⁸ Kuko kera mwari mwuzuye umwijima, ariko noneho ubu mufise umuco uva ku Mwami wacu. Nimubeho rero nk’abana b’umuco

⁹ (kuko icamwa c’umuco ni ineza y’uburyo bwose, ukugororoka n’ukuri),

¹⁰ kandi mumenye ibihimbara Umwami ivyo ari vyo.

¹¹ Ntimwifatanye n’ibikorwa vy’impfagusa bikorerwa mu mwijima, ahubwo mubishire ahabona.

¹² Biteye n’isoni kuvuga ivyo abatumvira Imana bakorera mu mpisho.

¹³ Ariko igishizwe ahabona n’umuco cose gica kiboneka; kandi ikirasiwe n’umuco kiba mu muco.

¹⁴ Ni co gituma bivugwa ngo: “Ikangure, wewe usinziriye, vyuka uve mu bapfuye, maze Kristo arakumurikira.”

¹⁵ Nuko mwirinde cane uko mubaho, ntimwigenze nk’imburabwenge, ahubwo mwigenze nk’abanyabwenge.

¹⁶ Akaryo kose muronse mugakoreshe neza, kuko imisi ari mibi.

¹⁷ Ntimube ibipfu, ariko mutahure ivyo Umwami abashakako ivyo ari vyo.

¹⁸ Ntimukaborerwe umuvinyu, kuko bijana abantu mu buhumbu. Ahubwo, mwuzure Mpwemu Yera,

¹⁹ mubwirane amazaburi n’indirimbo, zo guhimbaza ziva kuri Mpwemu. Muririmbe kandi mucurarangire Umwami bivuye mu mitima yanyu,

²⁰ mushimira vyose Imana Data imisi yose, mw’izina ry’Umwami wacu Yesu Kristo.

Inyigisho ku ngo z’Abakristo

²¹ Umwe wese agamburukire mugenziwe abitewe no kwubaha Kristo.

²² Bagore, mwumvire abagabo banyu nk’uko mwumvira Umwami Yesu.

²³ Kuko umugabo ari we mutwe w’umugore nk’uko Kristo na we ari we mutwe w’ishengero ari ryo mubiri wiwe, na we akaba umukiza waryo.

²⁴ Nuko rero nk’uko ishengero ryubaha Kristo, ni ko n’abagore bakwiye kwubaha abagabo babo muri vyose.

²⁵ Bagabo, mukunde abagore banyu, nk’uko Kristo yakunze ishengero akaryigura

²⁶ ngo arigire iryejejwe ritunganye, aryogesheje umwuhagiro w’amazi ari ryo Jambo ry’Imana.

²⁷ Ivyo yabikoze kugira ngo aryiyegereze ari ishengero rikayangana, ritagira agatosi canke umunkanyari canke akandi gasembwa kose, ariko ryejejwe ritagira umugayo.

²⁸ Muri iyo nzira nyene, abagabo bakwiye gukunda abagore babo nk’imibiri yabo bwite. Uwukunda umugore wiwe abayikunda.

²⁹ Kandi murazi ko ata muntu yoshobora kwanka umubiri wiwe, ariko arawugaburira akawitwararika, nk’uko Kristo abikora kw’ishengero,

³⁰ kuko turi ingingo z’umubiri wiwe.

³¹ “Ku bw’ivyo, nk’uko Ivyanditswe bivuga, umugabo azosiga se na nyina abane n’umugore wiwe ubutakivana, maze bompi babe nk’umubiri umwe.”

³² Iri ni ibanga rihambaye; ariko ni ishusho nziza yerekana ivya Kristo n’ishengero.

³³ Rero, umwe wese muri mwebwe akunde umugore wiwe nk’uko yikunda, kandi umugore na we yubahe umugabo wiwe.