2 Korinto 10 - Bibiliya mu Kirundi coroshe

Pawulo yerekana ko ari Intumwa y’Imana

¹ Jewe Pawulo, ndabinginze n’umutima wiyoroheje no mu bugwaneza buva kuri Kristo, naho mwibaza ko ntari imvuzi imbere yanyu ariko nkabakarira iyo tutari kumwe.

² Mbaye ndabinginga hakiri kare kugira ngo ninaza sinzorinde kubakarira nk’uko nzokarira abibaza ko dukurikira inyungu z’abantu.

³ Naho tuba muri iyi si, ntitugwana nk’ab’iyi si.

⁴ Ibigwanisho tugwanisha ntibimeze nk’ibigwanisho vy’iyi si. Ahubwo dufise ibigwanisho bifise ubushobozi buva ku Mana, bushobora gusambura ivyigize ibinani, no gusambura ivyiyumviro bibi.

⁵ Dusambura ivyiyumviro bibi vyose vyishize hejuru mu kubuza abantu kumenya Imana, tugafata mpiri ivyiyumviro vy’abagarariji vyose tukabashikana ku kwubaha Kristo.

⁶ Kandi nimwashika ku kwubaha kwose, tuzohana abo bose bazoba bakiri mu bikorwa vy’ubugarariji.

⁷ Nimurabire ku biboneka. Abavuga ko ari aba Kristo bategerezwa kumenya ko natwe turi aba Kristo co kimwe na bo.

⁸ Kuko naho nishimira ububasha Umwami wacu yaduhaye bwo kubakomeza atari ubwo kubasambura, ntibinteye isoni gukoresha ubwo bubasha.

⁹ Sinshaka kuboneka nk’aho ndiko ngerageza kubatera ubwoba mu makete ndabandikira,

¹⁰ kuko bamwe muri mwebwe bavuga bati: “Amakete ya Pawulo aragumye kandi arimwo uburake. Ariko iyo ari kumwe natwe aboneka nk’umunyantege nke adakwiye no kwumvirizwa.”

¹¹ Abavuga uko bakwiye kumenya ko uko turi muri ayo makete tutari kumwe na we ari ko tuzoba tumeze mu bikorwa vyacu nitwaba kumwe namwe.

¹² Ntitwubahuka kwiha ibibanza canke ngo twigereranye twebwe ubwacu nk’uko bamwe babigira. Abo bigereranya kuri bo ubwabo ni imburabwenge! Ntidushobora kuvuga ko turi ibitangaza nk’abo bababwira ko bahambaye cane. Bigereranya na bo nyene kandi bakigera kuri bo nyene. Ni imburabwenge.

¹³ Ariko ntitwishima mu birengeye aho tugeza ububasha. Twishimira ivyabereye mu bikorwa Imana yaduhaye, harimwo ivyo dukorera muri mwebwe.

¹⁴ Ntidushobora kwishimira ibirenze aho, nk’aho twoba tutigeze kubagendera, kuko n’iwanyu twahashitse tuzanye Ubutumwa Bwiza bwa Kristo.

¹⁵ Kandi ntidushobora no kwirata ngo turondere kwemerwa ku bw’ibikorwa vyakozwe n’abandi. Ivyizigiro vyacu ni uko ukwizera kwanyu kuzobandanya gukura, igikorwa cacu muri mwebwe kikaguka,

¹⁶ kugira ngo dushobore kuvuga Ubutumwa Bwiza mu yandi mahanga. Ni ho tutazokwirata ibikorwa vyakozwe n’abandi mu ntara zabo.

¹⁷ Nk’uko Ivyanditswe bivuga, “Uwirata wese yirate ko yamenye Umwami Yesu,”

¹⁸ kuko uwirata atari we yemerwa, ariko hemerwa uwushimwe n’Umwami.