1 Timoteyo 5 - Bibiliya mu Kirundi coroshe

Ibijanye n’abapfakazi, abageze mu zabukuru n’abaja

¹ Ntugakankamire umutama, ariko umuhanure umwubashe nk’aho yoba ari so. Abakiri bato ubafate nka benewanyu,

² abatamakazi ubafate nk’abavyeyi bawe, abagore bakiri bato ubafate nka bashiki bawe, kandi ubikore mu kwera kwose.

³ Witeho abapfakazi batagira uwubaraba.

⁴ Ariko umupfakazi afise abana n’abuzukuru, bakwiye kubereka ukwubaha Imana kwabo mu kubitwararika, ni ho bazoba bishuye abavyeyi babo ivyo babakoreye, kandi ivyo birahimbara Imana.

⁵ Umupfakazi atagira ic’epfo ca ruguru, asigaye ari wenyene, ashira ivyizigiro vyiwe mu Mana, akama ayisenga ijoro n’umurango kugira ngo imufashe.

⁶ Ariko umupfakazi abayeho yinezereza gusa aba yarapfuye naho yoba ari muzima.

⁷ Ivyo uzokwame uvyibutsa abantu, kugira ngo babeho batagira umugayo.

⁸ Umuntu n’atafasha umuryango wiwe na canecane abo mu nzu yiwe, aba yihakanye ukwizera kw’ukuri, kandi uwo aba ari inyuma y’uwutizera.

⁹ Umupfakazi akwiye kuja ku rutonde rw’abafashwa akwiye kuba arenza imyaka mirongo itandatu, akaba yari umwizigirwa ku mugabo wiwe,

¹⁰ kandi akaba ashingirwa intahe ku bw’ibikorwa vyiwe vyiza nko kurera neza abana, kwakira abandi i muhira, kwoza ibirenge vy’abera, gufasha abari mu ngorane, ndetse akaba yariyeguriye gukora ibikorwa vyiza vy’ubwoko bwose.

¹¹ Na yo abapfakaye bakiri bato, ntuzobashire kuri urwo rutonde. Kuko ukwipfuza kw’umubiri kwabo kwohava kubarengera bakava mu kwiyegurira Kristo bakagomba kurongorwa.

¹² Gutyo boba bikwegeye gutsindwa n’urubanza kuko boba barenze isezerano ryabo rya mbere.

¹³ Ikindi ni uko bashobora kuba ibinebwe, bakama bayerera inzu ku nzu bavuga urusaku, bita mu bitabaraba bongera bavuga ivyo batotegerejwe kuvuga.

¹⁴ Nohanura rero abapfakazi bakiri bato ko bosubira kurongorwa, bakavyara abana, bagatunganya ingo zabo. Ni ho umwansi atazoronka ico abavugako.

¹⁵ Kuko bamwe muri bo baza baramaze guta umurongo bakurikira Satani.

¹⁶ Nimba hari umugore atunze abapfakazi mu nzu iwe, nabe ari we abafasha kugira ngo ntibaremere ishengero, kugira ngo rifashe abatagira ic’epfo ca ruguru bonyene.

¹⁷ Abakuru b’ishengero barongoye ishengero neza bakwiye gufatwa neza na canecane abakora igikorwa co kuvuga ubutumwa no kwigisha.

¹⁸ Kuko Ivyanditswe bivuga ngo: “Ntimukazibire umunwa w’inka iriko irasekura ingano,” kandi ngo: “Umukozi aberwa n’impembo.”

¹⁹ Ntuze wumvirize ibirego bivugwa ku mukuru w’ishengero, kiretse bizanywe n’abantu babiri canke batatu.

²⁰ Ariko nihagira uwuguma mu vyaha, uzomwihanikirize mw’ishengero ry’abantu kugira ngo abandi na bo babone gutinya.

²¹ Ndakwingingiye mu nyonga z’Imana na Kristo Yesu n’imbere y’abamarayika batoranijwe ngo ukurikize ivyo nakubwiye vyose udacishije i ruhande, kandi ntuze wigere ugira aka mwana wa mama.

²² Ntuze wihutire kurambika ibiganza ku bantu, kandi ntuze wifatanye n’abakora ivyaha. Wame wejejwe.

²³ Ntuze wame unywa amazi yonyene, uje uranywa umuvinyu mukeya ku bw’ingorane y’umushihito wawe, kuko wama ugwaragurika.

²⁴ Ivyaha vya bamwebamwe biribonekeza n’imbere y’uko babacira imanza. Ariko hari n’abandi ivyaha vyabo bimenyekana vyaratevye.

²⁵ No ku bikorwa vyiza na vyo ni uko nyene; ibikorwa vyiza vya bamwebamwe biragaragara, ariko n’ibikorerwa mw’ibanga umusi umwe bizoja ahabona.