1 Timoteyo 2 - Bibiliya mu Kirundi coroshe

Uko bikwiye kugenda mu gihe co guhimbaza Imana

¹ Ndakwinginze rero, imbere ya vyose, kugira ngo wingingire abantu bose, ubasengere, ubasabire wongere ubashimire Imana.

² Usengere abami n’abatware kugira ngo tubeho mu mahoro, dutekaniwe, mu kwubaha Imana kwose, no mu kutagira umugayo muri vyose.

³ Ibi ni vyo vyiza bishimisha Imana yo mukiza wacu,

⁴ yo ishaka ko abantu bose bakizwa bagashika ku kumenya ukuri.

⁵ Kuko hari Imana imwe, hakaba n’umuhuza umwe hagati y’Imana n’abantu, uwo na we ni umuntu, Kristo Yesu.

⁶ Yatanze ubuzima bwiwe nk’incungu ku bantu bose. Ubu ni bwo butumwa Imana yatanze igihe cayo kigeze.

⁷ Ni co gituma natowe nk’umuvuzi w’ubwo Butumwa nkongera nkaba intumwa, kugira ngo nigishe Abanyamahanga ivy’ukwizera n’ivy’ukuri. Mvuze ukuri sindengeje urugero.

⁸ Ndashaka ko abagabo aho bari hose basenga badugije ibiganza vyera, bataratse, batagira ibihari.

⁹ Kandi n’abagore ndashaka ko bagira inyambaro ibereye, badashazisha gutsiba imishatsi canke kwambara inzahabu, imaragarita canke impuzu z’igiciro kinini,

¹⁰ ariko bashazishe ibikorwa vyiza, bibereye abagore bavuga ko bubaha Imana.

¹¹ Abagore baze bige banumye, n’ukwubaha kwinshi.

¹² Singomba ko abagore bigisha canke bategeka abagabo. Bumvirize banumye.

¹³ Kuko Adamu yaremwe ubwa mbere, hanyuma haremwa Eva.

¹⁴ Kandi Adamu si we yahenzwe, umugore ni we yahenzwe, aca agwa mu caha.

¹⁵ Ariko abagore bazokirizwa mu kuvyara kwabo, ni baguma mu kwizera, mu rukundo, mu kwubaha Imana no mu kwicisha bugufi.