1 Korinto 16 - Bibiliya mu Kirundi coroshe

Gufasha abera

¹ Ku bijanye no kwegeranya uburyo bwo gufasha abizera b’i Yerusalemu, mubikore nk’uko nabihanuye amashengero y’i Galatiya.

² Ku musi wa mbere w’indwi, umwe wese muri mwebwe arabika amahera ku yo yungutse. Ntimuzorindire ko nshika hiyo hanyuma ngo muce muyatoreza rimwe.

³ Ninashika hiyo, nzokwandika amakete nzorungikana abo muzoba mwatoranije kugira batware infashanyo zanyu i Yerusalemu.

⁴ Kandi nivyaba nkenerwa ko njana na bo, bazomperekeza.

Ivy’ukugendera ishengero ry’i Korinto

⁵ Nzobagendera mvuye i Makedoniya kuko nipfuza gucayo.

⁶ Ndashobora kuzomarana namwe igihe, mbere nshobora kuhamara igihe c’imbeho nyinshi cane, kugira ngo muzomfashe ku bijanye no kubandanya urugendo, iyo nzoba ngiye hose.

⁷ Sinshaka kuhaca ndengana, nipfuza kumarana namwe umwanya ukwiye Umwami Imana abikunze.

⁸ Ariko mu kurindira nzoba ndagumye aha muri Efeso gushitsa ku musi wa Pentekote,

⁹ kuko hariho akaryo keza ko gukorera Imana naho hari abangwanya benshi.

¹⁰ Timoteyo niyashika hiyo, muzomwakire neza kugira agubwe neza muri mwebwe, kuko ariko akora igikorwa c’Umwami co kimwe nanje.

¹¹ Ntihazogire uwumugaya, ahubwo mumuhezagize ibikenewe mu rugendo rwiwe agarutse. Twe na bene Data tumurindiranye igishika.

¹² Ku vyerekeye mwene Data Apolo na we, naramwinginze ngo azanane n’abandi bene Data iwanyu, ariko ntiyipfuje kuza ubwo nyene, azoza niyaronka akaryo keza.

¹³ Mube maso, mushikame mu kwizera, mube abagabo, mugire umwete, mugire umutima rugabo.

¹⁴ Ivyo mukora vyose mubikore mu rukundo.

¹⁵ Murazi ko abo mu muryango wa Setefana ari bo bizeye ubwa mbere muri Akaya, baca bihebera gukorera abizera: ndabinginze rero bene Data,

¹⁶ ngo murongorwe n’abantu nka bo, canke n’abifatanije na bo muri ico gikorwa.

¹⁷ Naranezerewe cane numvise ko Setefana, Forotunate na Akayiko bashitse ngaha. Bamfashishije ivyo nari nkeneye vyose mu kibanza canyu.

¹⁸ Baranteye intege nk’uko babateye intege. Abantu nk’abo ni abo gushimira ku bw’ibikorwa vyiza bakora.

Intasho

¹⁹ Amashengero yo muri Aziya arabatasha. Akwilasi na Pirisila na bo barabatasha cane mu Mwami, co kimwe n’ishengero rihurira mu nzu yabo.

²⁰ Bene Data bose turi kumwe hano barabatasha. Muramukanye mu kugumbirana kwera.

²¹ Jewe Pawulo, ndabandikiye ndabatasha n’ukuboko kwanje.

²² Nimba hariho uwudakunda Umwami, uwo aravumwe. Kaze Mwami!

²³ Ubuntu bw’Umwami wacu Yesu bubane namwe.

²⁴ Ndabakunda mwese muri Kristo Yesu. Amen.