1 Korinto 12 - Bibiliya mu Kirundi coroshe

Ibijanye n’ingabire za Mpwemu Yera

¹ Bene Data, ibijanye n’ingabire za Mpwemu Yera, nshaka ko mubitahuzwa neza.

² Murazi ko mukiri abanyamahanga mwazimizwa n’ibigirwamana bitavuga.

³ Ni co gituma ndababwira ko ata wuvugishwa na Mpwemu w’Imana yovuga ati: “Yesu ni ikivume,” kandi nta wovuga ati: “Yesu ni Umwami,” kiretse abivugishijwe na Mpwemu Yera.

⁴ Hari ingabire zitandukanye ariko Mpwemu azitanga ni umwe.

⁵ Imirimo ni myinshi ariko Umwami dukorera ni umwe.

⁶ Ibikorwa vy’Imana ni vyinshi, ariko iyo Mana nyene ni yo ibikorera muri twebwe twese.

⁷ Mpwemu w’Imana yiyerekanira mu ngabire kuri umwe umwe wese ku neza ya bose.

⁸ Bamwe bahawe na Mpwemu gutanga impanuro zirimwo ubwenge, abandi uwo Mpwemu nyene abaha ubumenyi budasanzwe,

⁹ abandi abaha ingabire y’ukwizera, abandi abaha gukiza ingwara,

¹⁰ abandi abaha ububasha bwo gukora ibitangaza, abandi abaha kuvugishwa n’Imana, abandi abaha gusesangura impwemu, abandi abaha kuvuga mu ndimi, abandi na bo abaha kuzisigura.

¹¹ Izo ngabire zose zitangwa na Mpwemu umwe, bivanye n’uko agomba kuzitanga.

Turi ingingo nyinshi zigize umubiri umwe

¹² Umubiri ni umwe n’aho ugizwe n’ibihimba vyinshi; kandi n’aho ibihimba vyawo ari vyinshi bigize umubiri umwe. N’umubiri wa Kristo ni uko.

¹³ Twese twabatijwe na Mpwemu umwe mu mubiri umwe: Abayuda, Abagiriki, abagurano, n’abidegemvya, kandi twese twahawe Mpwemu umwe.

¹⁴ Umubiri ntugizwe n’igihimba kimwe, ugizwe n’ibihimba vyinshi.

¹⁵ Ikirenge kivuze giti: “Ko ntari ukuboko, sindi igihimba c’umubiri,” ivyo ntivyotuma kireka kuba igihimba c’umubiri.

¹⁶ Kandi ugutwi kuvuze guti: “Kuko ntari ijisho, sindi igihimba c’umubiri,” ivyo ntivyotuma kureka kuba igihimba c’umubiri.

¹⁷ Mbega nka hamwe umubiri wose woba ijisho gusa, wokwumvira he? Canke na ho nka hamwe umubiri wose woba ugutwi, womoterwa biciye he?

¹⁸ Ariko noneho Imana yashize ibihimba bitandukanye ku mubiri, kimwekimwe cose aho biyihimbaye kugishira.

¹⁹ Umubiri ntiwoba umubiri mu gihe woba ugizwe n’igihimba kimwe gusa.

²⁰ Nk’uko bimeze rero, hari ibihimba vyinshi ariko umubiri ni umwe.

²¹ Ijisho ntiryobarira ukoboko riti: “Sindagukeneye,” kandi umutwe ntiwobwira ibirenge uti: “Sindabakeneye.”

²² Ahubwo n’ibihimba vyose womenga ni bitobito kurusha ibindi birakenewe cane.

²³ Kandi ibihimba womenga ntivyubashwe cane ni vyo twitwararika cane kwambika. Ibihimba tutipfuza ko bija ahabona ni vyo twitwararika gufata neza,

²⁴ ariko ibija ahabona tubifata ibisanzwe. Imana yafatanije ibihimba vy’umubiri vyose ica iha icubahiro ibitagifise,

²⁵ kugira ngo ntihabe ukwitandukanya kw’umubiri, ahubwo ibihimba vyose vyitaneho ku rugero rungana.

²⁶ Iyo hagize igihimba kimwe kigwara, ibindi vyose bigwarana na co. Kandi iyo igihimba kimwe cubashwe, ibindi vyose binezeranwa na co.

²⁷ Namwe muri umubiri wa Kristo, kandi umwe wese muri mwebwe ni igihimba c’umubiri cawo.

²⁸ Ibi ni vyo bihimba vy’umubiri Imana yashize mw’ishengero: hari intumwa, abavugishwa n’Imana, abigisha, abakora ibitangaza, abafise ingabire zo gukiza ingwara, abafise ingabire zo gufasha abandi, abafise ingabire z’uburongozi, n’abavuga indimi zitandukanye.

²⁹ Bose si intumwa, kandi si abavugishwa n’Imana, si abigisha kandi bose ntibakora ibitangaza.

³⁰ Bose ntibafise ingabire zo gukiza ingwara, ntibavuga mu ndimi zitamenyekana, kandi bose ntibasobanura indimi.

³¹ Ariko mwipfuze ingabire zisumba izindi zose. Reka ndabereke inzira irashe gusumba izindi zose.