Tɨtɨ 2 - bjv Makɨtɨbɨ lə Luwə kɨ ta Nangɨnda

Ta dɔ dɨje tɨ kɨ tɔgɨ, kɨ ngan basa je kɨ mandɨ je, kɨ ɓəə je

¹ Nɨngə kɨ sɔbɨ dɔi, majɨ kadɨ ɨndo nḛ kɨ aw naa tɨ kɨ nḛ ndo kɨ rɔjetɨ.

² Əl baw dɨngəm je kadɨ əi dɨje kɨ njé kuwə rɔde gɨn tɔgɨde tɨ, dɨje kɨ asi ta kɔsɨ-gon, dɨje kɨ njé ra nḛ kɨ go rəbe tɨ, dɨje kɨ awi kɨ kadɨ-me kɨ tɔge to, kadɨ əi dɨje kɨ awi kɨ ndɨgɨ-naa mede tɨ, dɨje kɨ njé kore mede.

³ Əl ko̰ dəne je kae tɨ wa kɨn be tɔ. Əl-de kadɨ pa njɨyəde e pa njɨyə dɨje kɨ ayi njay, kadɨ əi njé kəl ta kɨ majal dɔ dɨje tɨ al, taa kadɨ əi go̰ kasɨ je al tɔ. Nɨngə, kadɨ əi njé ndo dɨje nḛ kɨ majɨ.

⁴ Majɨ kadɨ ndoi dəne je kɨ du kadɨ ndɨgi ngawde je kɨ ngande je.

⁵ Kadɨ əi njé ra nḛ kɨ go rəbe tɨ, əi njé ngəm rɔde, əi njé kɨndə kəmde go me kəy je tɨ ləde majɨ, əi dɨje kɨ majɨ, əi njé kulə dɔde gɨn ngawde je tɨ. Re rai be nɨngə, dɨje əli ta kɨ mal dɔ ta tɨ lə Luwə al.

⁶ Əl ngan basa je kɨ ngan mandɨ je tɔ, kadɨ awi kɨ kal kɨ majɨ me nḛ je tɨ pətɨ.

⁷ Nɨngə ḭ wa kɨ dɔi, sɔbɨ kadɨ ḭ nḛ ndajɨ me nḛ ra je tɨ kɨ majɨ mbata tɨ ləde. Kadɨ nḛ ndo ləi e nḛ ndo kɨ tɔgɨ gangɨ kɨ ndam goto me tɨ.

⁸ Kadɨ ta kəli e ta kəl kɨ ay njay, kɨ dəw asɨ kadɨ a əl ya̰ne ɔsɨ-n kade al. Re ɨra be nɨngə, njé kɔsɨ-je ta a gəri nḛ kɨ kadɨ rai al, kadɨ awi kɨ ta kɨ majal kare kadɨ əli dɔje tɨ al.

⁹ Əl ɓəə je kadɨ uləi dɔde gɨn tɔgɨ tɨ lə ɓade je me nḛ je tɨ pətɨ. Kadɨ ɓade je ɨngəi majɨ rɔde tɨ. Kadɨ naji ta ɓade je tɨ al,

¹⁰ taa kadɨ ɓogi-de al tɔ. Kadɨ nayḭ-naa kɨ lo ka dana tɨ kɨ asɨ naa bərəre, kadɨ ɓade je adi-de mede. Re rai be ɓa, dɨje a ɔsɨ-gon nḛ ndo lə Luwə kɨ nje kajɨ-je me nḛ je tɨ pətɨ.

Me-majɨ lə Luwə

¹¹ Luwə tɔjɨ me-majɨ ləne kɨ kadɨ gɨn dɨje pətɨ ɨngəi kajɨ kɨ taga wangɨ adɨ dɨje oi.

¹² Me-majɨ lə Luwə kɨn ndo-je kadɨ jɨ tusɨ nḛ ra kɨ go ɓəl Luwə tɨ al, kɨ ngur nḛ lə dunɨya̰ j-ɨyə̰ kɔ. J-ɨyə̰ kɔ mba kadɨ j-ɨsɨ kɨ dɔje taa dɔ kagɨ lo tɨ kɨ ɓone kɨn me njɨyə tɨ kɨ go rəbɨ tɨ kɨ dana, kɨ təl rɔ go ndu Luwə tɨ.

¹³ Jɨ rai be taa kadɨ jɨ ngɨnəi majɨ kɨ j-ɨndəi meje dɔ tɨ, kɨ ndɔ tɔɓa kɨ a re adɨ e ndɔ lə Luwə ləje kɨ bo, kɨ e nje kajɨ-je Jəju Kɨrɨsɨ.

¹⁴ Kɨrɨsɨ kɨ un rɔne adɨ kɨ mbata ləje, mba kadɨ gangɨ-n dɔje ta nḛ ra tɨ kɨ majal pətɨ. Gangɨ dɔje kadɨ jɨ təli dɨje lie kɨ kay njay kɨ tɨngəi bɨl me nḛ ra je tɨ kɨ majɨ.

¹⁵ E kɨn ə, e nḛ kɨ kadɨ ɨndo dɨje, kadɨ ulə-n dɨngəm mede tɨ. Tɔgɨ kɨ aw-n kɨn, kadɨ ɨndangɨ-n-de kɨ rɔ kɨ tḭ katɨ. Ɨra adɨ dəw madɨ kɨdi al.