Tɨtɨ 1 - bjv Makɨtɨbɨ lə Luwə kɨ ta Nangɨnda

Kuwə jinaa

¹ Mi Pol kɨ ɓəə kɨlə lə Luwə nɨm nje kaw kɨlə lə Jəju Kɨrɨsɨ ə m-ndangɨ makɨtɨbɨ kɨn m-adi ḭ Tɨtɨ. Mi nje kaw kɨlə mba kadɨ dɨje kɨ Luwə mbətɨ-de adi mede, taa kadɨ m-ɔjɨ-de m-adɨ gəri nḛ kɨ rɔjetɨ kɨ go ndu Luwə tɨ tɔ.

² E be mba kadɨ ɨndəi mede dɔ kajɨ tɨ kɨ bɨtɨ kɨ no̰ tɨ, kɨ Luwə kɨ nje ngom al, un mɨndɨne adɨ-je dɔ tɨ kəte no̰ nḛ je tɨ pətɨ kɨn.

³ Luwə ɔjɨ ta ləne adɨ dɨje gəri dɔ kagɨ lo tɨ kɨ e wa ɔjɨ. Ta kɨn, ɨyə̰ jim tɨ kadɨ m-ɨlə mbḛe kɨ go ndɨgɨ tɨ lie e kɨ e nje kajɨ-je.

⁴ Nɨngə m-ndangɨ makɨtɨbɨ kɨn m-adi ḭ Tɨtɨ kɨ ḭ ngonm kɨ rɔjetɨ me kadɨ-me tɨ kɨ j-ɨndə rɔje naa tɨ dɔ tɨ. Kadɨ me-majɨ kɨ kɨsɨ maje lə Luwə kɨ Baw əi kɨ Jəju Kɨrɨsɨ kɨ nje kajɨ-je e səi naa tɨ.

Kɨlə kɨ kadɨ Tɨtɨ ra me ɓe tɨ kɨ Kɨrətɨ.

⁵ M-ɨyə̰i gogɨ dɔnangɨ tɨ kɨ Kɨrətɨ mba kadɨ tə ɨtɔl ta kɨlə je kɨ nay. Nɨngə kadɨ ɨndə ngatɔgɨ je dɔ njé kaw-naa je tɨ me ɓe-bo je tɨ kare kare pətɨ kɨ go kɔjɨ tɨ kɨ ndɔ kɨ m-ɔjii.

⁶ NGa nɨngə, sɔbɨ kadɨ dəw kɨ ngatɔgɨ e dəw kɨ ta goto dɔe tɨ, e ngaw dəne kɨ kare ba, kadɨ e dəw kɨ ngane je əi njé kadɨ-me je, kɨ kadɨ dəw ɨndə ta dɔde tɨ ɔjɨ dɔ kal kɨ majal ə se dɔ nga̰ al.

⁷ Sɔbɨ kadɨ nje kɔr no̰ njé kaw-naa je e dəw kɨ ta goto dɔe tɨ, mbata e nje kɨndə kəmne go dɨje tɨ lə Luwə. Kadɨ e nje to̰ rɔ al, e nje wongɨ al, e go̰ kasɨ al, e nje rɔ al, taa kadɨ e nje ge nḛ kɨ go rəbɨ tɨ kɨ dana al, al tɔ.

⁸ Sɔbɨ kadɨ e nje ra mba, kadɨ e nje ge nḛ ra kɨ majɨ, e nje kəl ta kɨ go rəbe tɨ, e dəw kɨ dana, e dəw kɨ ay njay, e nje kuwə rɔne gɨn tɔgɨne tɨ.

⁹ Majɨ kadɨ uwə rɔne nga̰ me ta tɨ kɨ rɔjetɨ, kɨ aw naa tɨ kɨ nḛ ndo kɨ ɨngə. Lo kɨn tɨ, a asɨ kadɨ ulə dɨngəm me ndəgɨ dɨje tɨ kɨ nḛ ndo kɨ rɔjetɨ. Taa a asɨ kadɨ ɔjɨ njé je kɨ ɨsɨ ndoi nḛ je kɨ rangɨ kadɨ gəri təkɨ ndəmi rəbɨ tɔ.

¹⁰ Dɨje ngay dan Jɨpɨ je tɨ kɨ adi mede əi njé mbatɨ təl rɔde go ta tɨ kɨ rɔjetɨ, ɨsɨ tɨdəi ta je kɨ bɨrɨri, ɨsɨ ədi dɨje kɨ ta kɨ ndae goto.

¹¹ Adɨ uti tade dɔ ta je tɨ ləde, tadɔ ɨsɨ tui dɔ dɨje pətɨ kɨ me kəy je tɨ kɨ nḛ ndo kɨ kadɨ dəw ndo al. Rai be mba kadɨ ɨngəi nḛ kɨngə kɨ go rəbe tɨ al ji dɨje tɨ.

¹² Dəw kare dande tɨ Kɨrətɨ no̰o̰ kɨ rai-e tə nje kəl ta kɨ ta Luwə tɨ əl ə nə: «Dɨje kɨ Kɨrətɨ tɨ əi njé kəl ta kɨ ngom kɨ ndɔ je pətɨ, əi da je kɨ mande majal, əi njé daw je kɨ kɨlə ləde e ra ta me par.»

¹³ Nɨngə ta kɨ əl kɨn e ta kɨ rɔjetɨ, ə majɨ kadɨ ɨndangɨ-de kɨ rɔ tḭḭ, kadɨ əi njé kadɨ-me je kɨ rɔjetɨ.

¹⁴ Ɓɨ kadɨ təli rɔde go su je kɨ kɨdə tɨ lə Jɨpɨ je kɨ go ndu kun tɨ lə dɨje kɨ njé mbatɨ ta kɨ rɔjetɨ kam al.

¹⁵ Kɨ rɔ dɨje tɨ kɨ ayi njay, nḛ je pətɨ ayi njay tɔ, nə kɨ rɔ dɨje tɨ kɨ mede majal kɨ adi mede al, nḛ kɨ ay njay goto rɔde tɨ. Nḛ kɨ ayi njay goto rɔde tɨ, tadɔ nḛ gər ləde yətɨ dɔde, taa mede uwə-de kɨ ta dɔ majal tɨ al tɔ.

¹⁶ Dɨje kɨn, əli tade tɨ təkɨ n-gəri Luwə, nə kɨlə rade najɨ ta gər-e. Əi njé ra nḛ kɨ to njḛ, əi njé ta̰ rɔ je, asi kadɨ rai nḛ madɨ kare kɨ majɨ, al.