Pɨləmo̰ 1 - bjv Makɨtɨbɨ lə Luwə kɨ ta Nangɨnda

Kuwə jinaa

¹ Mi Pol kɨ mi dangay tɨ mbata Poy Ta kɨ Majɨ lə Jəju Kɨrɨsɨ, naa tɨ kɨ ngoko̰je Tɨmote ə jɨ ndangɨ makɨtɨbɨ kɨn j-adi ḭ Pɨləmo̰ kɨ ḭ madɨje kɨ ngay taa ḭ madɨ-kɨlə je tɔ kɨn.

² J-uwə jii, j-uwə ji konanje Apɨya, taa j-uwə ji Arsɨpɨ kɨ e madɨ rɔ ləje kɨ mbata lə Kɨrɨsɨ kɨn tɔ. Nɨngə j-uwə ji njé kaw-naa je kɨ ɨsi me kəy tɨ ləi tɔ.

³ Kadɨ me-majɨ kɨ kɨsɨ maje lə Bawje Luwə əi kɨ Ɓaɓe ləje Jəju Kɨrɨsɨ e səsi.

NDɨgɨ-naa kɨ kadɨ-me lə Pɨləmo̰

⁴ M-ra oyo Luwə ləm, mbata dɔ kagɨ lo je pətɨ kɨ m-ɨsɨ m-əl sie ta nɨngə, mem ole dɔi tɨ ḭ Pɨləmo̰.

⁵ Tadɔ m-o poy ndɨgɨ kɨ ɨndɨgɨ ngan je lə Luwə pətɨ kɨn nɨm, kadɨ kɨ adɨ mei Ɓaɓe Jəju Kɨrɨsɨ kɨn nɨm tɔ.

⁶ M-dəjɨ Luwə kadɨ kɨndə rɔ naa tɨ ləi səje dɔ kadɨ-me tɨ tḛḛ kɨ kandɨ nḛ kɨ taga. Kadɨ-me kɨn a tɔjɨ kadɨ dɨje gəri kɨlə je pətɨ kɨ majɨ kɨ j-asi ra kɨ ta kul kɨndə rɔ naa tɨ ləje kɨ Jəju Kɨrɨsɨ.

⁷ NGokom, m-ɨngə rɔnəl kɨ me sɔl ngay kɨ mbata ndɨgɨ-naa ləi, tadɔ kɨ ta kuli, me dɨje lə Luwə osɨ nangɨ.

Nḛ dəjɨ lə Pol mbata Onəjɨm

⁸ E be ə, re m-ɨngə tɔgɨ ji Kɨrɨsɨ tɨ mba kadɨ m-ɔjii nḛ kɨ sɔbɨ kadɨ ɨra ka,

⁹ m-ge kadɨ, kɨ ta kul ndɨgɨ-naa kɨ to danje tɨ kɨn, m-dəji nḛ tə dəjɨ yo. Təkɨ o-n, mi Pol mi ngatɔgɨ, taa dɔ kagɨ lo tɨ kɨn mi me kəy dangay tɨ mbata lə Jəju Kɨrɨsɨ,

¹⁰ m-dəji nḛ kare kɨ mbata ngonm kɨ me Kɨrɨsɨ tɨ Onəjɨm. NGɔsɨne, m-təl bawe kɨ go ta tɨ lə Jəju me kəy dangay tɨ ne.

¹¹ Kəte e dəw kɨ ndae goto ta kəmi tɨ, nə ngɔsɨne, təl dəw kɨ ndae to mbata ləje joo pu.

¹² M-təl m-ɨle kɨ rɔi tɨ gogɨ, e kɨ e dəw rɔm.

¹³ M-ge ngay kadɨ m-ngəm-e rɔm tɨ ne mba kadɨ ra kɨlə adɨ-m toi tɨ, dɔ kagɨ lo tɨ kɨ mi-n dangay tɨ kɨ mbata Poy Ta kɨ Majɨ lə Jəju kɨn.

¹⁴ Nə m-ndɨgɨ ra nḛ madɨ kɨ kanjɨ ndɨgɨ ləi, al. Mər ta ləm e kɨ mba kadɨ ra majɨ ləi e kɨ go me ndɨgɨ tɨ ləi ḭ wa, ɓɨ e kɨ tɔgɨ kɨ kɨndə dɔ tɨ al.

¹⁵ Dɔmajɨ ə, Onəjɨm gangɨ-naa səi dɔ kagɨ lo kɨ ndə̰y be, mba kadɨ re ɨnge gogɨ nɨngə, ɨsɨ səi ratata kɨ no̰ tɨ.

¹⁶ A ɨnge gogɨ tə ɓəə al ngata. A o-e tə dəw kɨ gate e ngay ɨtə ɓəə. A e ngoko̰i kɨ nje ndɨgɨ ləi me Kɨrɨsɨ tɨ. M-ndɨge ngay, nə m-gər kadɨ ndɨgɨ kɨ a ɨndɨge a ɨtə ya̰m ɓəy, kɨ go darɔ tɨ, ə se kɨ go rəbɨ tɨ lə Luwə.

¹⁷ E be ə, re o-m tə madɨ-kɨləi nɨngə, uwe rɔi tɨ təkɨ e mi wa ə uwə-m rɔi tɨ be.

¹⁸ Re ra səi nḛ madɨ kɨ nəl-i al, ə se re aw kɨ ɓangɨ ləi dɔe tɨ ka, ɨndə dɔm tɨ.

¹⁹ Mi Pol wa ə m-ndangɨ ta kɨn kɨ jim. M-a m-ɨgə-i ɓangɨ kɨn. NGa nɨngə, majɨ kadɨ ɨgər təkɨ m-aw kɨ ɓangɨ dɔi tɨ, adɨ e darɔi ḭ wa.

²⁰ Oyo NGokom, m-dəji mba kadɨ ɨra kɨlə kɨn adɨ-m me tɔ Ɓaɓe tɨ. Ɨra adɨ mem sɔl me tɔ Kɨrɨsɨ tɨ.

²¹ M-gər dɔm tɨ majɨ lo ndangɨ tɨ kɨ m-ɨsɨ m-ndangɨ makɨtɨbɨ kɨn kadɨ a təl rɔi go nḛ dəjɨ tɨ ləm kɨn. M-gər kadɨ a ɨra ɨtə e kɨ m-dəji kɨn ɓəy.

²² Nɨngə m-dəji kadɨ ɨndə dɔ kəy madɨ dana adɨ-m. Tadɔ m-ɨndə mem dɔ tɨ kadɨ, kəl kɨ ɨsɨ əli ta kɨ Luwə kɨ mbata ləm kɨn, a ra adɨ njé ko̰ɓe je a ɨyə̰i mi taa adi səsi.

Kuwə jinaa kɨ dɔbəy tɨ

²³ Epapɨrasɨ uwə jisi. E səm naa tɨ kəy dangay tɨ ne kɨ mbata lə Jəju Kɨrɨsɨ.

²⁴ Madɨ kɨləm je, Markɨ əi kɨ Arɨsɨtarkɨ, taa Dəmasɨ əi kɨ Lukɨ uwəi jisi tɔ.

²⁵ Kadɨ me-majɨ lə Ɓaɓe Jəju Kɨrɨsɨ e naa tɨ səsi.