Rafudoo Akarafa 1 - Anutuna Ufa

Isipa maqannaasa Isaraee maqannaasa mandaikamma nimaqaqau.

¹ Yakoboofa nari faiqi namu faqa Isipa maqusai ooqufusa, misa nuqu maaqimminoo maridanoo.

² Reubeenafa faqa Simeoonafa faqa Reefifa faqa Yudafa faqa

^3-4 Isakaraafa faqa Seeburunnafa faqa Beensaminafa faqa Dannaafa faqa Napatarifa faqa Kadaafa faqa Aseraafa faqa minamusa faqa misa faiqinamu faqa nári nikoona ninaakuna faqa Isipa maqa maaqaki ooqu fiqau.

⁵ Moodaanaki ruqauiqa ooqu fusa qaaramoo fasiqa niku nisauku taikasee moo fasiqa asaukuqara kai taikasee 70 Isipa maqa maaqaki ooqu mariqau. Yosefaafa ooqai miqoo maruqoo marinau.

^6-7 Miqoo mariiufaqa Yosefaafa faqa narí afasausamara faqa aiqama mi akiiqausa kuqu taikafufaqa misa faiqi namu niku nisauku findifufaqa faiqi moomoo uqanna maqasoofaqa kambiqaqau. Kambiqafiqa Isipa maqa maaqa umbiqa aqiqa mariqau.

⁸ Faraoofa Isipa maqannaa Kinna kuqufufaqa, kisaaqasaa marinoo moo fuka Faraoofa kambiqanau. Mifa Yosefaanara faqa aandaroo aukuana rakisiiunara faqa mina aiku asaukuara faqa sia irinau.

⁹ Faraoofa narí maqannaasa qimanniminoo qinau. Qafaaqa Isaraee maqannaasa misa maasa uridaaqaramasee moomoo uqanna kambiqaqa maridaqa.

¹⁰ Rakirafa kambiqainaqa misa maasa namuqaa faqa moodaanaki kammafi maasa darusee quqasee sandee foora. Inni saimbaqa naqifee mandee oonumafi irisee misa rafaaqafusaanaqee misa sia moomoo kambiqeefaree.

¹¹ Miqi qimasoofaqa Isipa maqannaasa Isaraee maqannaasa karafusa saika nimiseeqa, afeeka rakisirausa misasaa rakisi mariqau. Isaraee maqannaasa karafusaki maridaqa qaara maqusa auqiqau. Moo maqusa auqu Pitoona maqusa auqusee moo maqusa auqu Raqamaseesa maqusa marinau. Mi maqusa qanda Faraoofa narana afeedimaru maqusa qanda marinau. Qafee maqannai kai maaqa usakeemariqau.

¹² Isipa maqannaasa Isaraee maqannaa kaifaa kaifaa ummaara nimimarufaqa misa moomoo uqanna kambiqafufaqa maqa maaqa qumbiaqau. Isipa maqannaa misa nindafeeqa kaaqa rufiee mariqau.

¹³ Misa rufiqaidaqa sia moomoo asumu kambiqaaqeera firaa kadaapi uqanna misa nimuaaqa quqasoofaqa misa manda mariranaki mariqau.

¹⁴ Isipa maqannaasa qufaqa Isaraee maqannaa qafee maqa qumaree ausirira ooniara foora moomoo auquseeqa minannai maaqa usakaidaqa, kafaa afuqakinaa ainaina faqa imariqau. Miqi marufaqa sia Isipa maqannaasa misara qimudaoo qimariqau.

¹⁵ Faraoofa mi kadaapi rirana Isaraee maqannaasa nimiseenoo quandafinoo Isaraee maqannaa anaasee qaaraqanda Sifaraa nammarisa Puaa nammarisa inaamunai fusasaa rakisimaru anaasee qanda qimanniminau.

¹⁶ Inneeqara innaamunai oonureeqa dadaaqiqa faiqi maqa nimiseeqa qafaifaqa akoonaiqi faiqi maqasaifaqa aiqama aaqee kai rutuku aquaqa,manaaqa maqasiafaqa sia rutuku aquqa saifaqa kaqi mariaqa.

¹⁷ Qufaqa miqanda Anutunara rufiqasee sia akoonaiqi faiqiuqa maqasoosa rutuku aqiqau. Mi anaaseeqanda Faraoona ufa iriseeqara Anutuna ufara rufiaseeqa sia akoonaiqi faiuqa nárí mariqau, kaqi mariqau.

¹⁸ Faraoofa akoonaiqi moomoo kambiqoofanoo nindafama seenoo innaamunai nifiqaqanu aanaaseeqanda naaramaseenoo niqinoo qinau. Inneeqara naqaafee ifaqee sia akoonaiqi naridee qini ufa rukiaafanoo.

¹⁹ Miqanda mina ufa iriseeqa qiqau. Heeburu anaasee sia Isipa anaasee naannaraidaqa misa kaqi kaqi faiqi maqaidaqa. Maaqanda oonu raunaqa faasai faiqi maqaqaafaqa oonu nindafaidaqa.

²⁰ Anutufa mi anaaseeqanda oosana nindafama seenoo amiqi amiqimasoofaqa Isaraee maqannaasa moomoo kambiqafiqa afeeka maqannaa mariqau.

²¹ Miqanda Anutunara rufioofanoo mina akiiqara Anutufa miqanda faqa faiqi asumu niminau.

²² Faraoofa misa nindafeenoo narí maqannaasa aiqamausa naaramaseenoo afeeka ufa qimanniminau. Heeburu anaasee akoonaiqi maqasaifaqa innee mina mareeqee nammari firaana Niru nammariki aqusaifaqa kuquaqa. Kuqifaqa aiqama manaaqauqa kai kaqi mariaqeera qinau. Miqi qimasoofaqa misa miqimmi mariqau.