IBRU 8 - A Xuxubus Maxat

Jisas ine a pris möxö xuxubus maxat

¹ A unine tinenge e rengrengen i bira: Ire ma önga mangana pris taxin nang ixo kisisik kö lime tuun te Öng i Taxin Saxit Köba ewe nang ibo kisisik kö kinis ne warkurai te ine riso xö watmaep.

² Io, ma ibo wewet a tinörön ne pris singan kö xönö möxö lotu riso xö watmaep. Ma ina na a gunon lotu turunon nang e God ibo kisisik könan. Ma Orong iat ixo uru ina gunon, kaim bara nangadi.

³ Ma a warkurai te Moses ixo tulus abo pris kirip bere idi tabo isik arabaa urungan te God. Io, önga sasaxan ixo kisisik bara a pris se ire, ine bölök irabo isik ke mangana arabaa urungan te God.

⁴ Nang bere ine ixoro xisixis sa xö öxöno lagunon, ine i kexebe eöt bara irabo kip a tinörön ne pris, möxösa, a dauleng iat ta nang tobo erabaa urungan te God eöt ma warkurai te Moses.

⁵ Idi tobo wewet abo tinörön te idi kölöme xö önga xönö möxö lotu nang a malalar mon ine xö xönö runon möxö lotu lömö xö watmaep. Ma ixo xarnang bölök ke Moses. Nang e Moses ixo eka uru a gunon ne lotu nang idi toxo eka wewet arixe ma man, God ixo ötumarang ine bira, “Örobo mana balaure ödeek nöngön tua wewet abo lalaa eöt turunon ma nang e xo osen nöngön tiso xö puot.”

⁶ Inexalik a tinörön ne pris nang e Jisas ixoro kip lo i deek köba xö nang idi toxo rörön min mesila, xarnang bölök mon a xuxubus nang e Jisas ixo pet kaluluonin e God ma nangadi rua lalamus idi urungan te ine, i deek kö xuxubus mesila. Ma a xuxubus se Jisas i deek kö xuxubus mesila, möxösa, abo lalaa e God ixo tengen tua wewet kölöme xö ina xuxubus se Jisas, i deek köbo lalaa niang abo warkurai te Moses ixo tengen bara tabo pet kö xuxubus mesila.

⁷ Ma nang bara a sisila ne kunubus ixoro rörön deek, God i kexebe dödöm bara irabo kulas mere öng maxat.

⁸ Inexalik God ixo pere bara ina nangadi toxo saban sik bang, io, ine ixo tengen bira: “Pere bang! E a Orong, e tengen bara a axana bung i eka inuan orim nang arabo pet a kunubus maxat arixe me idi, a nine bung marapun mee Israel me Juda.

⁹ Ina xuxubus maxat i karabo eöt ma a xuxubus nang e xo pet arixe mabo untubuno idi xö axana bung e xo lamus lo idi, me e xo silien ösu idi mero Isip. E a Orong, e tengen bara e karabo pet ina xuxubus maxat eöt ma sinilane, möxösa, idi tokoxobo tame a sinilane xuxubus se e. Io nang, e xo wan talu idi.

¹⁰ E a Orong, e tengen bara a mangana xuxubus e rabo pet ma bung marapun mee Israel kö önga axana bung melamu, ine bira: E rabo bulus abo warkurai te e xö dinödöm pe idi. Ma inabo warkurai e rabo geet oxe xö baladi. Xö ina axana bung melamu e rabo God te idi, me idi tabo a nangadi re e.

¹¹ Re öng i karabo usu re ais se ine bara re tönö bira, bara, ‘Örobo mana ösöxö sik a Orong.’ Kaim. Ruasa, möxösa, idi xirip tabo ösöxö sik e meringan köbo maris turunon, ot köbo asuono orong.

¹² Idi tabo ösöxö sik e, möxösa, e rabo döxömen taun abo sasaban te idi ma a abalamu, me e karabo döxömen lo öbaling im.”

¹³ Io, nang e God ixo tengen a xuxubus se Jisas bara a lak maxarine, i maras bara ixo perexulen a sinilane xuxubus bara a lak maut nang tabo ganim tewe. Ma bara önga laa i maut ma te ganim tewe, i eka xakawam esexere.