Zaburi 80 - Bibiliya Ijambo ry'imana D

Isiraheli ni umuzabibu w'Imana

¹ Iyi zaburi ni iy'umuyobozi w'abaririmbyi, iririmbwa hacurangwa umurya witwa “Indabyo z'amarebe”. Ni zaburi y'urwibutso ya Asafu.

² Mushumba w'Abisiraheli we, tega amatwi! Tega amatwi wowe uyobora abo bene Yozefu nk'uyobora umukumbi. Wowe uganza ku ntebe hagati y'abakerubi igaragaze.

³ Garagaza ububasha bwawe, urengere abakomoka kuri Efurayimu, urengere n'abakomoka kuri Benyamini no kuri Manase, ngwino udukize.

⁴ Mana udutarure, uturebane impuhwe udukize.

⁵ Uhoraho Mana Nyiringabo, uzageza ryari kuturakarira? Uzageza ryari kwirengagiza amasengesho yacu?

⁶ Dore nawe ibyokurya uduha ni amarira gusa, ibyokunywa turenzaho na byo ni amarira menshi.

⁷ Watugize imvano y'amakimbirane y'ibihugu duhana imbibi, abanzi bacu batugira urw'amenyo.

⁸ Mana Nyiringabo, udutarure, uturebane impuhwe udukize.

⁹ Wagemūye igiti cy'umuzabibu mu Misiri, umenesha abanyamahanga mu gihugu cya Kanāni uwuteramo.

¹⁰ Watunganyije aho uwuteye, umuzabibu na wo ushora imizi wuzura igihugu,

¹¹ igicucu cyawo gitwikira imisozi, amashami yawo aba manini asumba amasederi y'inganzamarumbu.

¹² Wagabye amashami amwe agera ku Nyanja ya Mediterane, andi mashami agera ku ruzi rwa Efurati.

¹³ None se ni iki cyatumye usenya uruzitiro rwawo? Dore abahisi n'abagenzi barawisoromera,

¹⁴ ingurube z'ishyamba zirawangiza, inyamaswa zo mu gasozi na zo zirawona.

¹⁵ Mana Nyiringabo, nyamuna garuka! Itegereze uri mu ijuru urebe, ugoboke uwo muzabibu.

¹⁶ Goboka icyo gishyitsi witereye, ugoboke iryo shami wakujije rigasagamba.

¹⁷ Umuzabibu barawuciye barawutwika, abantu bawe ubareba igitsure bashiraho.

¹⁸ Uhe ububasha umuntu watoranyije, ubuhe uwo muntu wakujije agakomera.

¹⁹ Bityo ntituzongera kukwimūra, uduhembure ni wowe tuzajya twambaza.

²⁰ Uhoraho Mana Nyiringabo udutarure, uturebane impuhwe udukize.