Zaburi 8 - Bibiliya Ijambo ry'imana D

Ikuzo ry'Imana n'icyubahiro yahaye umuntu

¹ Zaburi y'umuyobozi w'abaririmbyi, iririmbwa hacurangwa umurya w'inanga w'i Gati. Ni zaburi ya Dawidi.

² Uhoraho Mwami wacu, erega ikuzo ryawe rigaragara ku isi yose, icyubahiro cyawe ukigaragariza ku ijuru!

³ Imvugo y'ibitambambuga n'iy'abana bonka uyitsindisha abakurwanya, icecekesha abanzi n'abahōra inzigo.

⁴ Iyo nitegereje ijuru wiremeye, nkitegereza ukwezi n'inyenyeri warishyizeho,

⁵ ndibaza nti “Umuntu ni iki byatuma umuzirikana, ikiremwamuntu ni iki byatuma ucyitaho?”

⁶ Mana, habuzeho gato ngo umuntu umugire nkawe, wamutamirije ikamba ry'ikuzo n'icyubahiro.

⁷ Wamuhaye gutegeka ibyo waremye, byose urabimuha kugira ngo abigenge.

⁸ Wamuhaye kugenga amatungo magufi n'amaremare, umuha kugenga n'inyamaswa zo mu gasozi,

⁹ n'ibiguruka mu kirere n'amafi yo mu mazi; n'ibindi biremwa byose biyabamo.

¹⁰ Uhoraho Mwami wacu, erega ikuzo ryawe rigaragara ku isi yose!