Zaburi 60 - Bibiliya Ijambo ry'imana D

Isengesho ryo mu gihe cy'intambara

¹ Zaburi y'umuyobozi w'abaririmbyi, iririmbwa hacurangwa umurya w'inanga witwa “Ururabyo rw'Irebe.” Ni igisigo cy'urwibutso cya Dawidi kigamije kwigisha.

² Yagihimbye igihe yagabaga igitero akarwana n'Abanyasiriya bo muri Mezopotamiya n'ab'i Soba, ari na bwo Yowabu atikije ingabo ibihumbi cumi na bibiri z'Abedomu, akazitsinda mu kibaya cy'Umunyu.

³ Ayii Mana, wadutuye umujinya wawe uratureka! Waraturakariye ariko noneho tugarukire.

⁴ Igihugu cyacu wagihinduye nk'umuntu wakomeretse, agahinda umushyitsi, twomore ibikomere dore turadandabirana.

⁵ Ubwoko bwawe waduteje amakuba, waduhatiye kunywa inzoga ari yo burakari bwawe.

⁶ Wahaye abayoboke bawe ikimenyetso, warakibahaye ngo bahunge abarwanisha imiheto. Kuruhuka.

⁷ Inkoramutima zawe udukize akaga, udutabare udukirishe ububasha bwawe.

⁸ Imana nziranenge iravuga iti: “Ni jye nyir'ugutsinda, umujyi wa Shekemu nawugabanyijemo imigabane, ikibaya cya Sukoti na cyo nkigabamo iminani.

⁹ Akarere ka Gileyadi ni akanjye, akarere k'Abamanase na ko ni akanjye, ak'Abefurayimu ni ingofero y'icyuma inkingira umutwe, naho ak'Abayuda ni inkoni iranga ubutegetsi bwanjye.

¹⁰ Igihugu cya Mowabu ni igikarabiro cyanjye, icya Edomu nakigize inkoreragahato yanjye, naho igihugu cy'u Bufilisiti naragitsinze nkigamba hejuru.”

¹¹ Ni nde uzangeza muri Edomu? Ni nde uzangabiza umujyi ntamenwa waho?

¹² Nta wundi ni wowe Mana, nyamara waraturetse! Mana, ntukijyana n'ingabo zacu ku rugamba.

¹³ Tugoboke uhangane n'ababisha bacu, koko gutabarwa n'umuntu ntibigira umumaro.

¹⁴ Imana ni yo izaturwanira dutsinde, ababisha bacu ni yo izabanyukanyuka.