Zaburi 4 - Bibiliya Ijambo ry'imana D

Imana ni yo irenganura

¹ Zaburi y'umuyobozi w'abaririmbyi, iririmbwa hacurangwa umurya w'inanga. Ni zaburi ya Dawidi.

² Mana indenganura, ningutabaza ujye untabara. Ubwo nari mu makuba warangobotse, n'ubu ungirire impuhwe wumve amasengesho yanjye.

³ Mwa bantu mwe, muzantesha agaciro mugeze ryari? Muzakunda ibitagira umumaro mugeze ryari? Ese ibinyoma byo muzabishyigikira mugeze ryari? Kuruhuka.

⁴ Nimumenye ko Uhoraho yitoranyirije indahemuka, Uhoraho iyo mutakambiye arantabara.

⁵ Nimurakara ntibikabatere gukora icyaha, nijoro muryamye mujye mubitekereza mutuje. Kuruhuka.

⁶ Nimuture ibitambo bikwiye, mubiture Uhoraho mumwiringire.

⁷ Benshi baravuga bati: “Icyaduha ishya n'ihirwe. Uhoraho, turebane impuhwe utwakire.”

⁸ Ariko jyewe wanyujuje ibyishimo byinshi cyane, ibyishimo biruta ibyo bagira igihe ingano zabo zarumbutse, n'ibyo bagira igihe divayi ari nyinshi cyane.

⁹ Nzajya ndyama nsinzire nta cyo nishisha, kuko Uhoraho, ni wowe wenyine umpa amahoro.