Zaburi 127 - Bibiliya Ijambo ry'imana D

Imigisha yose itangwa n'Uhoraho

¹ Indirimbo y'abazamuka bajya i Yeruzalemu. Ni iya Salomo. Iyo Uhoraho atari we wubaka inzu, abayubaka baba baruhira ubusa. Iyo Uhoraho atari we urinze umujyi, abawurinda babera maso ubusa.

² Mwebwe abazinduka kare murushywa n'ubusa, murakora ntimuruhuke mukarushywa n'ubusa, murirya mukimara mushaka ibibatunga, nyamara abo Uhoraho akunda abashakira ibibatunga bisinziririye.

³ Erega abana ni impano itangwa n'Uhoraho, urubyaro ni byo bihembo atanga!

⁴ Abahungu umuntu abyara akiri umusore bagira akamaro, bamubera nk'imyambi intwari ifite ku rugamba.

⁵ Hahirwa uwabyaye benshi, bamubera nk'imyambi yuzuye umutana. Bene uwo ntazatsindwa, ntazatsindwa naburanira n'abanzi be aho ibibazo bikemurirwa.